Revelation 4

¹Ore pee eidipayu ena, naing'orisho, nadol etii atua keper kutukaji nabolo! Ore oladuoo toilo latang'asa aning aairorie te dukuya, etiu anaa ole ntarumpeta. Nejo, “Ilepu, tinyiku ene, pee aaitodol ina nemeeta nchere pee measayu asuju ena.”

²Ore nabo kata naaigany Enkiyang'et, naa ng'ura, euno olorika le nkitoo te keper, netii obo otonita te ilo orika.

³Ore ilo otonita teine neikununo anaa osoit oji Yaspa, o ltoto oonyori ooji karnelian nemanita olokirrai ilo orika oikununo anaa iltoto ooji emerald.

⁴Nemanita ilo orika ilorikan tikitam oong'uan le nkitoo. Netonita te lelo orikan le nkitoo ilpayiani tikitam oong'uan ooishopito nkilani naaibor, neeta too lukuny enye nkopiyiani e nkitoo e saabu.

⁵Nepuku te ilo orika le nkitoo inkiwuang'at naaimerlel o ndarat o enkikurrukur. Ore te dukuya ilo orika le nkitoo neyupuyup ilkilang'ilang'eta oopishana le nkima, naa ninche inkiyang'eta naapishana e Nkai.

⁶Ore te dukuya ilo orika le nkitoo netii entoki natiu anaa enaiposha e kiok nayia anaa oltotoi oibor, nemanita ilo orika le nkitoo too nkaloli pooki ing'uesi ong'uan naaishu, naabore nkonyek dukuya o siadi.

⁷Ore ina ng'ues e dukuya naishu neikununo anaa olng'atuny, ore ina ng'ues e are naishu neikununo anaa olkiteng, ore ina ng'ues e uni naishu neeta enkomom o ltung'ani, ore ina ng'ues e ong'uan naishu neikununo anaa olkurragos olo ti ai.

⁸Ore nena ng'uesi ong'uan naaishu neeta ake nabo inaipuko ile, nebore ninche inkonyek pooki wueji, oriong o atua. Ore dama o kewarie nemegira aekata meranyisho ejo, “Osinyati, Osinyati, Osinyati, Osinyati, Olaitoriani Enkai, Olaidimani le pooki, otii apa netii taata, naa ninye olotu.”

⁹Naa ore ake pee eisho nena ng'uesi naaishu enkisisa, o enkitoo o enkanyit enashe ilo otonita to lorika le nkitoo, oishu ntarasi o ntarasi.

¹⁰Nebatata lelo payiani tikitam o oong'uan te dukuya ilo otonita to lorika le nkitoo, neserem ilo oishu ntarasi o ntarasi, neirragie nkopiyiani enye e nkitoo te dukuya ilo orika le nkitoo, neranyisho aajo,

¹¹“Kinchiaakino iyie, Olaitoriani lang o Enkai ang, pee ing'amu enkisisa o enkanyit o engolon, amu iyie oitobirua intokitin pooki, naa te yieuna ino eetae ninche neitobiruaki ninche.”