Galatians 1

¹Pahulo, intumwa itatumwe n'abantu, kandi nta muntu yabariwe kuntuma, ariko natumwe na Yesu Kristo, n'Imana Data wa twese yamuzuye mu bapfuye,

²mfatanije n'abavukanyi turi kumwe bose kubandikira, mwebwe abo mu mashengero y'i Galatiya.

³Ubuntu n'amahoro biva ku Mana Data wa twese no ku Mwami wacu Yesu Kristo bibe muri mwebwe.

⁴Uwo mwami Yesu Kristo yitangiye ivyaha vyacu, ngo aturokore muri iki gihe kibi c'ubu, nk'uko Imana yacu yagomvye, ni yo Data we twese.

⁵Icubahiro kibe icayo ibihe bitazoshira. Amina.

⁶Natangajwe ni uko muriko murareka vuba mutyo Iyabahamagaye ku bwo ubuntu bwa Kristo, mukemera ubutumwa bunyuranye n'ubwo,

⁷kandi ata bundi buriho; ariko hariho abantu babahagarika imitima, bakagomba guhindura ukundi ubutumwa bwa Kristo.

⁸Ariko naho yoba ari twebwe canke umumarayika avuye mw'ijuru, ababarira ubutumwa bunyuranye n'ubwo twababariye, arakavumwa.

⁹Nk'uko twavuze ubwa mbere, n'ubu nongeye kubivuga ko ni hagira umuntu ababarira ubutumwa bunyuranye n'ubwo mwemeye, arakavumwa.

¹⁰Mbega ubu n'ishimwe ry' abantu ngomba, canke ni iryo Imana? Canke se ndondera kunezereza abantu? Iyo mba nkinezereza abantu, simba ndi umushumba wa Kristo.

¹¹Ku vyo ubutumwa navuze, ndabamenyesha bavukanyi, yuko atari ubwo abantu.

¹²Kuko nanje ntabuhawe n'umuntu, kandi sinabwigishijwe, ariko ni Yesu Kristo yabumpishuriye.

¹³Mwumvise ingeso zanje nari mfise kera, nkiri mw'idini y'Abayuda, ingene nahiga ishengero ry'Imana birengereje, nkaritikiza.

¹⁴Kandi mu bwoko bwacu narushije benshi bo mu bo twarukanye kuja imbere mw'idini y'Abayuda, kuko nabarusha kugira ishaka ry'imigenzo twarazwe na ba sogokuruza.

¹⁵Ariko aho bihimbariye Imana yandobanuye nkiri mu nda ya mama, ikampamagara ku bwo ubuntu bwayo,

¹⁶guhishurira umutima wanje Umwana wayo, ngo mvuge ubutumwa bwiwe bwiza mu banyamahanga. Ako kanya sinagishije inama abafise inyama n'amaraso,

¹⁷kandi sinaduze i Yerusalemu ku bantanguriye kuba intumwa, ariko nagiye muri Arabiya, kandi hanyuma nsubira i Damasiko.

¹⁸Maze imyaka itatu ishize nduga i Yerusalemu kwibonanira na Kefa, mara i we imisi icumi n'itanu.

¹⁹Ariko mu zindi ntumwa nta wundi nabonye, atari Yakobo, mwene nyina w'Umwami Yesu.

²⁰Ivyo ndabandikiye ni ukuri, ehe ndabivugiye imbere y'Imana, simbesha.

²¹Maze nja mu ntara z'i Siriya n'i Kilikiya.

²²Abo mu mashengero y'i Yudaya yo muri Kristo ntibaribwambone.

²³Ariko bumva gusa abamvuga bati: Umwe yahora aduhiga mbere, ubu asigaye yamamaza ivyizerwa yari yagerageje kuzimanganya.

²⁴Nuko bahimbaza Imana kubwanje.