Galatians 2

¹Maze hahise imyaka icumi n'ine, nongera kudugana na Barunaba, kandi na Tito ndamujana.

²Kandi naduzeyo ku bwo guhishurirwa, ndabashira imbere ubutumwa bwiza mvuga mu banyamahanga, ariko ndabushira imbere y'abashimwa twiherereye, ngo sinirukire ubusa, canke simbe narirukiye ubusa.

³Ariko na Tito twari kumwe naho yari Umugiriki ntibamugobereye guhimburwa igikoba c'ubugabo.

⁴Kandi ari co coshimishije abigira abavukanyi banyegetejwe mw'ishengero, binjiye mu mpisho ngo basume urusaku ukwidegemvya kwacu dufise muri Kristo Yesu, kugira ngo badushire mu buja.

⁵Abo ntitwabumviye na gatoya ngo tuganzwe na bo; kugira ngo ukuri kw'ubutumwa bwiza kugume muri mwebwe.

⁶Ariko abashimwa ko ari bakuru —uko bari bameze ubwa mbere sindabibabaye, kubwanje vyose ni bimwe, Imana ntirobanura abantu ku cubahiro—abo bashimwa nta co banyongerereje.

⁷Ariko babonye yuko najejwe ubutumwa bwo kwigisha abatahimbuwe igikoba c'ubugabo, nk'uko Petero yajejwe ubwo kwigisha abahimbuwe igikoba c'ubugabo.

⁸Kuko Iyashoboje Petero gutumwa ku bahimbuwe igikoba c'ubugabo, ari yo yanshoboje nanje gutumwa kubatari Abisirayeli.

⁹Yakobo, Kefa na Yohana, bashimwa ko ari inkingi, bamaze kumenya ubuntu nahawe, baduha ukuboko twe na Barunaba, ngo dufatanye nabo; ngo twebwe tuje ku batari Abisirayeli, na bo baje ku bahimbuwe igikoba c'ubugabo.

¹⁰Ariko ico bagomvye gusa n'uko twibuka aboro, ari co nyene nanje nari nsanzwe mfitiye umwete.

¹¹Ariko Kefa aje muri Antiyokiya, namuharirije imbonankubone, kuko yari n'ibimutsindishije.

¹²Kuko imbere yuko abavuye kwa Yakobo bashikayo yasangira n'abanyamahanga; ariko bashitseyo, ariyonjorora, arabanena, kuko atinye abo mu bahimbuwe igikoba c'ubugabo.

¹³Kandi n'abandi Bayuda bahumbana na we, bitayeko na Barunaba atwarwa n'ubwo buhumvyi bwabo.

¹⁴Ariko ndabonye badaca mu nzira igororotse, nk'uko ukuri kw'ubutumwa bwiza kuri, mbaririra Kefa imbere ya bose nti: Ko wewe witondera ingeso z'abanyamahanga, zitari izo Abayuda, kandi uri Umuyuda, ugobera ute abanyamahanga kuba nk'Abayuda?

¹⁵Twebwe mu kameremere kacu turi Abayuda, ntituri abanyavyaha bo mu banyamahanga.

¹⁶Ariko tuzi yuko umuntu adatsindanishirizwa n'ibikorwa bishinzwe n'ivyagezwe, ariko atsindanishirizwa no kwizera Yesu Kristo. Natwe twizeye Kristo Yesu, ngo kwizera Kristo kube ari kwo kudutsindanishiriza, atari ibikorwa bishinzwe n'ivyagezwe; kuko ata muntu atsindanishirizwa n'ibikorwa bishinzwe n'ivyagezwe.

¹⁷Ariko namba twabonetse ko turi abanyavyaha, hamwe twarondera guhindurwa intungane no kuba muri Kristo, mbega Kristo ni umukozi agabura icaha? Eka na mba!

¹⁸Nokwongera kwubaka ivyo nasambuye noba niseruye ko ndi umuntu acumura.

¹⁹Ivyagezwe vyanteye gupfa ku vyagezwe, ngo mbeho ku Mana.

²⁰Nabambanywe na Kristo, ariko ndiho; yamara si jewe nkiriho, ni Kristo ariho muri jewe. Ivyo nkora vyose nkiriho mu mubiri ndabikoreshwa no kwizera Umwana w'Imana yankunze, akanyigura.

²¹Simpindura ubusa ubuntu bw'Imana, kuko asangwa ukugororoka kuzanwa n'ivyagezwe, Kristo azoba yapfiriye ubusa.