Hebrews 1

¹Kera mu bihe vyinshi no mu buryo bwinshi, Imana yaganiriye ba sogokuruza ibicishije mu kanwa k'abavugishwa nayo.

²Muri iyi misi y'iherezo yatuganiriye mu kanwa k'Umwana wayo, uwo yashiriweho kuba samuragwa wa vyose, ni we yahaye kurema isi.

³Uwo, kuko ari ugukayangana kw'ubwiza bwayo, n'ishusho y'akameremere kayo, kandi ashigikiza vyose ijambo ry'ubushobozi bwiwe, ahejeje gushiraho umwuhagiro w'ivyaha, avyagira i buryo bw'icubahiro c'ubwami bwo mw'ijuru;

⁴amaze kuba uwuhambaye kurusha abamarayika, nk'uko izina yarazwe rirengeye ayabo.

⁵Ni nde wo mu bamarayika Imana yigeze kubarira iti: “Uri Ubura bwanje? Uwu musi ndakuvyaye?” Kandi iti: “Nzomubera Se. Na we azombera Umwana wanje?”

⁶Kandi aho izokwongera kuzana imfura yayo mw'isi izovuga iti: “Abamarayika b'Imana bose bamusenge.”

⁷Kandi ivyo abamarayika yarabivuze iti: “Ihindura abamarayika bayo imiyaga, Abasavyi bayo ibahindura imbeya z'umuriro.”

⁸Ariko, ivyo Umwana wayo yabivuze iti: “Ubutware bwawe, Mana, buhangamye ibihe bidashira, Icumu ry'ubutware bwawe n'icumu ry'uwuganza atunganye.

⁹Wakunze ukugororoka, wanka ubugarariji, Ni co catumye Imana, ni yo Mana yawe, ikurobanuza amavuta y'umunezero, ikakurutisha bagenzi bawe.”

¹⁰Kandi ni wewe, Uhoraho, mu bihe vya kera washizeho itanguriro ry'isi, Kandi amajuru n'igikorwa c'intoke zawe.

¹¹Ivyo bizoshira, ariko weho uzokwamaho; Ivyo vyose bizosaza nk'impuzu,

¹²Kandi uzobizinga nk'umutamana, Bikuranwe n'ibindi nk'uko impuzu zikuranywa. Ariko weho uri uko wamye, Imyaka y'ukubaho kwawe ntizoshira.

¹³Ariko ni nde wo mu bamarayika yigeze kubarira iti: “Icara i buryo bwanje, Ushitse aho nzohindurira abansi bawe indava yo musi y'ibirenge vyawe?”

¹⁴Mbega abamarayika bose si impwemu ziyikorera, zitumwa gukora igikorwa kubwo abazoragwa agakiza?