Philemon 1

¹Pahulo, imbohe ya Kristo Yesu, na Timoteyo umuvukanyi, turakwandikiye Filemoni uwo dukunda, dusangiye igikorwa,

²na Apiya mushiki wacu, na Arukipo tusangiye urugamba, hamwe n'ishengero ryo mu nzu yawe.

³Ubuntu n'amahoro biva ku Mana, Data wa twese, no ku Mwami Yesu Kristo bibabemwo.

⁴Ndashima Imana yanje ubudasiba, ndaguhoza mu kanwa uko nsenze,

⁵kuko numvise urukundo rwawe n'ukwizera Umwami Yesu kwawe, ukwo wereka abera bose.

⁶Ndagusaba ngo ugufatanya kwawe mu kwizera gushobore vyinshi kubwa Kristo, mu kumenyekanisha ivyiza vyose vyo muri twebwe.

⁷Kuko urukundo rwawe rwanteye umunezero mwinshi rukandemesha, kandi imitima y'abera warayiruhuye, muvukanyi.

⁸Kubwo ivyo, naho mfise muri Kristo uburenganzira bwose bwo kugutegeka gukora ibikwiye,

⁹ndahisemwo kukwinginga kubwo urukundo, uko ndi kwose Pahulo umutama, kandi ubu hoho ndi imbohe ya Kristo Yesu.

¹⁰Ndakwitwayeko kubwo umwana wanje Onesimo uwo navyariye mu minyororo yanje,

¹¹atakugirira ikimazi kera, ariko noneho atugirira ikimazi twempi.

¹²Ni we nyene ndakurungikiye, ni we mutima wanje.

¹³Mba ndamugumije kugira ngo ankorere mu gishingo cawe, mboshwe n'iminyororo y'ubutumwa bwiza.

¹⁴Ariko nta co ngomba gukora ntakugishije inama, kugira ngo iciza ukora ntikibe ico ugoberewe, ariko ugikore ubikunze.

¹⁵Kumbure icatumye atandukanywa nawe igihe gito kwari ukugira ngo uzomwamane imisi yose.

¹⁶Atakiri umushumba wawe, ariko aruta umushumba, ari umwana wa So, akundwa. Akundwa nanje cane, ariko arushiriza gukundwa nawe, mu vyo umubiri no mu Mwami wacu.

¹⁷Nuko namba unyiyumvira ko dusangiye igikorwa, umwakire nk'uko nanje wonyakiriye.

¹⁸Ariko asangwa hari ico yaguhemukiyeko, canke hari umwenda agufitiye, ubimparureko.

¹⁹Ni jewe Pahulo nandikishije ukuboko kwanje yuko nzovyishura. Reka ndeke kukubwira yuko uri n'umwenda wanje, uwo mwenda ni wewe ubwawe.

²⁰Ego, muvukanyi, ndakubonemwo ikimazi mu Mwami wacu; unduhure umutima muri Kristo.

²¹Ndakwandikiye nizigiye ko uzonyumvira, nzi yuko uzokora n'ibiruta ivyo mvuze.

²²Kandi n'ikindi, untegurire indaro; kuko nizigiye yuko muzompabwa kubwo amasengesho yanyu.

²³Epafura, mugenzanje tubohanywe muri Kristo, aragutasha,

²⁴Mariko, Arisitariko, Dema na Luka, abo dusangiye igikorwa, baragutasha.

²⁵Ubuntu bw'Umwami Yesu Kristo bubane n'imitima yanyu. Amina.