Luke 14

¹Yinjiye mu nzu y'umwe mu bakuru b'Abafarisayo kw'isabato kurya, baramugenza.

²Imbere yiwe hari umuntu arwaye urusina.

³Yesu abaza abigisha ivyagezwe n'Abafarisayo ati: “Mbega biremerwa gukiza umuntu kw'isabato, canke ntivyemerwa?”

⁴Maze barihorera. Aramufata, aramukiza, aramusezera.

⁵Kandi arababaza ati: “Ni nde muri mwebwe afise umwana canke inka, hogira igikorokera mw'iriba, ntiyoca agikurayo kw'isabato?”

⁶Ntibashobora kumwishura muri ivyo.

⁷Kandi acira umugani abatumiwe, abonye ingene batanguranwa ivyicaro vy'icubahiro;

⁸arababwira ati: “Umuntu ni yagutorera ubukwe, ntuzokwicare mu cicaro c'abakuru; ngo kumbure ntihabeho umuntu akurusha icubahiro yatowe,

⁹kandi uwabatoye mwempi akaza akakubwira ati: “Ni ubise uwu ahicare. Ni ho uzomaramara, ukagenda, ukicara inyuma y'abandi bose.

¹⁰Ariko ni watumirwa, ugende, wicare inyuma y'abandi bose, kugira ngo uwagutoye aje, akubwire ati: “Igira ino haruguru mugenzi; ni ho uzobona icubahiro imbere y'abo mwicaranye musangira bose.”

¹¹Kuko umuntu wese yishira hejuru azocishwa bugufi, kandi uwicisha bugufi azoshirwa hejuru.

¹²Kandi abwira uwamutumiye ati: “Ni wategura inzimano ku murango canke mw'ijoro, ntuzotumire abagenzi bawe canke abo muvukana canke incuti zawe canke ababanyi bawe b'abatunzi; kuko kumbure na bo bogutumira, bakagusubiriza.

¹³Ariko ni wategura inzimano, upfume utumira aboro, ibirema, abacumbagira n'impumyi: ni ho uzoba uhiriwe;

¹⁴kuko badafise ivyo kukwishura, ariko uzokwishurwa mw'izuka ry'abagororotsi.

¹⁵Maze umwe mu bicaranye na we avyumvise, aramubwira ati: “Harahiriwe uwuzorira mu bwami bw'Imana.”

¹⁶Na we aramubwira ati: “Habaye umuntu yarondeje amazimano menshi, atumira benshi.

¹⁷Igihe co kurya gishitse, atuma umushumba wiwe kubarira abatowe, ngo baze, kuko bihejeje gutegurwa.”

¹⁸Bose bahuriza hamwe umutima wo kwidohora, baramwisaba. Uwa mbere ati: “Naguze itongo, nkwiye kuja kuriraba; ndakwinginze, uramvugira antunge.”

¹⁹Uwundi ati: “Naguze inka icumi, ngiye kuzirimisha ngo ndabe; ndakwinginze, uramvugira antunge.”

²⁰Uwundi ati: “Narongoye, ni co kimbujije kuza.”

²¹Maze wa mushumba agarutse, abwira shebuja uko vyagenze. Nyene urugo araraka, abarira umushumba wiwe ati: “Genda ningoga, uje mu nzira zagutse no mu nzira ntonto zo mu gisagara, uzane hano aboro n'ibirema n'impumyi n'abacumbagira.”

²²Umushumba wiwe ati: “Mugenzi, ico umbariye ndagikoze, ariko imyanya iracasigaye.”

²³Shebuja abarira uno mushumba wiwe ati: “Genda uje mu nzira zagutse no mu mihora, ubagobere baze, kugira ngo inzu yanje yuzure.”

²⁴Ndababwira yuko ata muntu n'umwe wo muri abo natumiye aza kugira ico atamira mu vyo nabateguriye.

²⁵Kandi ishengero ryinshi ryari rijanye na we. Arahindukira, arababwira

²⁶ati: “Umuntu ni yazako, ntiyanke se, nyina, umugore wiwe, abana biwe, abavukanyi biwe, bashiki biwe, mbere n'amagara yiwe na yo, ntashobora kuba umwigishwa wanje.”

²⁷Uwutikorera umusaraba wiwe ngo ankurikire, ntashobora kuba umwigishwa wanje.

²⁸Ni nde muri mwebwe agomba kwubaka umunara w'amatafari muremure, ntiyobanza kwicara, akarimbura igitigiri c'amahera yowubaka, ngo amenye yuko afise ayowuheraheza?

²⁹Ngo kumbure yoba ahejeje kwubaka amatafari y'intango, ntashobore kuwuzuza; ababibonye bose bagatangura kumutwenga

³⁰bavuga ko uwu yatanguye kwubaka, ntashobora kwuzuza.

³¹Canke hari umwami yoba agiye guhura n'uwundi ngo barwane, ntiyobanza kwicara, akaja inama, ko yoshobora kujana ingabo ibihumbi icumi guhwana ni uwumuteye ari n'ingabo ibihumbi mirongo ibiri?

³²Bisanzwe atari ko biri, wa wundi akiri kure cane, amutumako intumwa, akamubaza indishi yomuha ngo babane amahoro.

³³Ni ko biri, umuntu wese muri mwebwe adaheba ivyo afise vyose ntashobora kuba umwigishwa wanje.

³⁴Umunyu ni mwiza; ariko umunyu wo, woshira uburyohe, woba ukiryoshwa ni igiki?

³⁵Nta co umaze mu murima canke mw'icukiro; bapfa kuwuta. Uwuri n'amatwi yumva ni yumve.