Luke 15

¹Abatozakori bose n'abanyavyaha bariko baramwegera, ngo bamwumve.

²Abafarisayo n'abahinga b'ivyanditswe baridodomba bati: “Uwo yiyegereza abanyavyaha, agasangira na bo.”

³Abacira uwu mugani

⁴ati: “Hogira umuntu muri mwebwe afise intama ijana, yozimiza imwe muri zo, ntiyosiga izindi mirongo icenda n'icenda mu gahinga, akaja kurondera iyazimiye, kugeza aho ayibonera?”

⁵Iyo ayibonye, ayiterera ku bitugu anezerewe;

⁶yashika mu rugo, agahamagara incuti ziwe n'ababanyi biwe, akababwira ati: “Tunezeranwe, kuko ndabonye intama yanje yari yazimiye.”

⁷Ndababwira yuko mw'ijuru bazonezererwa batyo umunyavyaha umwe yihanye, bakamurutisha abagororotsi mirongo icenda n'icenda batarinda kwihana.

⁸Canke umugore yogira amahera icumi, akabura rimwe, ntiyodomeka itara, agakubura inzu, akarondera ashishikaye kugeza aho aribonera?

⁹Iyo aribonye, ahamagara incuti ziwe n'ababanyi biwe, akababwira ko anezewe, kuko abonye ihera yari yazimije.

¹⁰Ndababwire, Uko ni ko haba umunezero imbere y'abamarayika b'Imana ku bwo umunyavyaha umwe yihanye.

¹¹Kandi arababwira ati: “Habaye umuntu yari afise abahungu babiri.”

¹²Umuhererezi abwira se ati: “Data ni umpe umugabane w'ibintu notwaye.” Abagaburira itunga ryiwe.

¹³Imisi mike ishize, umuhererezi akoranya ibintu vyiwe vyose, aragenda, aja mu kindi gihugu ca kure; ashitseyo asesagurira ibintu vyiwe mu buhumbu.

¹⁴Abimaze vyose, ikigoyi gikomeye gitera muri ico gihugu, atangura gufutana.

¹⁵Aragenda, ashumba ku muntu wo muri ico gihugu, amurungika ku gasozi kiwe kuragira ingurube.

¹⁶Yifuza guhazwa n'ibishishwa ingurube zarya, ntihagira uwubimunutsa.

¹⁷Yisubiyemwo, aribwira ati: “Abacangero ba data bangana kuriya, kandi bahazwa n'ivyo kurya bakabisigaza, nayo jeho inzara iriko iranyicira hano.”

¹⁸Reka mve hasi, nje kwa data, ndamubwire nti: “Data, nacumuye ku Yo mw'ijuru no mu maso yawe,

¹⁹singikwiye kwitwa umwana wawe. Pfuma ungira umucangero wawe.”

²⁰Ava hasi, aja kwa se. Se amubona akiri kure, amutera akagongwe, arirukanga, amugwa mu nda, aramugumbira.

²¹Wa muhungu aramubwira ati: “Data, nacumuye ku Yo mw'ijuru no mu maso yawe, singikwiye kwitwa umwana wawe.”

²²Maze se abarira abashumba biwe ati: “Ni muzane ningoga ikanzu iruta izindi, muyimwambike, mumwambike n'impeta ku rutoke n'ibirato mu birenge.

²³Muzane ya nka ivyibushe inuze, muyibage, turye tunezerwe.

²⁴Kuko uwu mwana wanje yari yarapfuye, none arazutse; yari yarazimiye none arabonetse.” Nuko batangura kunezerwa.

²⁵Ariko umwana wiwe w'imfura yari mu murima; ariko araza, agira ashike ku nzu, yumva inanga n'intambo.

²⁶Ahamagara umwe mu bashumba, amubaza ibibaye ivyo ari vyo.

²⁷Aramwishura ati: “Murumunawe yaje, so yamubagiye ya nka ivyibushe inuze, kuko amubonye agikomeye.”

²⁸Araraka, yanka kwinjira. Se arasohoka, aramwinginga.

²⁹Maze abwira se ati: “Raba iyi myaka ingana itya ndagukorera, nta ho nigeze kwanka ico wangezeko, nanje nta ho wigeze kumpa n'agasuguru, ngo nezeranwe n'abagenzi.”

³⁰Maze uwo mwana wawe aje, yamaze ivyawe abisambanisha, umubagira ishuri inuze.

³¹Na we aramubwira ati: “Mwana wanje, tubana imisi yose, kandi ivyanje vyose ni ivyawe.

³²Ariko akanyamuneza no guhimbarwa biratubereye. Kuko uwu murumunawe yari yapfuye, none arazutse; yari yarazimiye none arabonetse.”