1 Corinthians 7

¹Vano mwaha wa itthu sikilepenly'anyu, oreera waya waari mulopwana okhala ahithenle.

²Nto wira atthyawe onamuttompe, khula mulopwana akhalaneke mwaar'awe ni khula muthiyana akhalaneke iy'awe.

³Mulopwana anvaheke mwaar'awe etthu emphavela'awe, siiso-tho muthiyana anvaheke iy'awe etthu emphavel'awe.

⁴Muthiyana kahiyo mwaneene erutthu awe, mwaneene t'iy'awe, siiso-tho, mulopwana kahiyo mwaneene erutthu awe, mwaneene ti mwaar'awe.

⁵Muhikhoottaneke mukina ni mukhw'awe, vahikhanleru wira murimwiiwanana siiso okathi vakhaani, wira mwiire mavekelo, nto numala, mphitaaneke-tho wira Satana ahiwehereryeni mwaha w'ohilipa wanyu.

⁶Tthiri iya soohimeenryaakani kasihiyo soruma, nto miruku.

⁷Okhala wira kaaphavela wira alopwana othene ekhaleke ntoko miyo, nto okhala wira khula mutthu ookhalana yovaha evahiw'awe ni Muluku, mukina ovahiwe enivirikana ni ya mukhw'awe.

⁸Vano kinnaahimeerya ale ahithenle n'athiyana anaamukhweli wira etthu enaareerela okhala siiso ntoko siry'aka miyo.

⁹Nto mwaahiweryeke ovilela, mutheleke ni mutheliweke. Maana fataari othela ohikhanle opaha murim'anyu n'tthu sootthuna.

¹⁰W'ale athenle hata atheliwe, kinaaruma vohikhala miyo, nto Apwiya tanaaruma wira muthiyana ahimwalane n'iy'awe.

¹¹Nto, amwalana, ahitheliwe, ahiya vo atthikelane n'iy'awe, siso-tho mulopwana ahimwalane ni mwaar'awe.

¹²Vano w'atthu akina kinnaahimeerya muruko aka kahiyo yooruma y'Apwiya, wira: Akhala munna okhalanne mwaar'awe oohaamini, ni khuyatthuna okhala poromosa ahimwalane muthiyana muthiyana owo.

¹³Nave, akhala muthiyana otheliwe ni mulopwana oohaamini, vano mulopwana owo khuyatthuna okhala poromosa ni muthiyan'owo, ahimwalane mulopwan'owo.

¹⁴Okhala wira mutheli oohaamini onireerihiwa muhina wa muthiyana; nave muthiyana oohaamini onireerihiwa muhina wa iy'awe, vahaakhanle siiso an'inyu yaarowa okhala oonanara murima, nto vano t'oreera murima.

¹⁵Nto mulopwana wala muthiyana oohaamini, atthuna omwalana, amwalaneke, okhala wira mwaha siisa, munna mulopwana wala muthiyana ookhalana ehakhi yoowiira etthu entthun'awe, maana Muluku oniihanenle murettele.

¹⁶Vano nyuwo muthiyana munsuwela sayi mwaaweryaka omoopola iy'anyu? Wala nyuwo mutheli munsuwela sayi mwaaweryaka omoopola mwaar'inyu?

¹⁷Nto siiso khula mutthu eetteke ntoko Muluku sinvahaly'awe, khula mmosa ntoko Apwiya simwiihanaly'aya. T'itthu kinirum'aka ikerexa sothene.

¹⁸Ookhala mutthu iihaniwe onnuwihiwe-ene? Akhaleke oowunnuwihiwa siiso. Ookhala mutthu iihaniwe ohinnuwihiwe? Ahinnuwihiwe.

¹⁹Winnuwihiwa wala ohinnuwihiwa kahiyo etthu, etthu yuulupale, wiwelela sooruma sa Muluku.

²⁰Khula mutthu akhaleke ntoko saary'awe okathi okupanly'awe wiihaniwa ni Muluku.

²¹Mwiihaniwe nlelo munari epottha? Muhithokorerye opotthiwa iwo, nto nyuwo mwaaweryaka okhala ootaphuwa, muttottele mureerel'owo.

²²Maana ole oniitthaniwa n'Apwiya, ari-ene epottha, vano toowoopoliwa, oniihaniwa ari-ene ootaphuwa, onikhala epottha ya Kristu.

²³Muroothummwa n'esisapo yinci-ene, muhiikhaliheke ipottha s'atthu.

²⁴Axinn'aka, khula mmosa akhaleke ohoolo wa Muluku siiso saary'awe okathi wiihaniwawe.

²⁵W'ale ahinaphitaane ni mulopwana, nkirina nikano n'Apwiya, nto kinaavaha miruku saka, ntoko mutthu ophwannye omoreliwa ikharari n'Apwiya, wira akhale oororomeleya.

²⁶Miyo kinoona wira vannireera wira mutthu akhale ntoko siry'awe, mwaha w'okath'ula wooxanka ninkhal'ahu.

²⁷Nyuwo mwathela? Muhiphavele omwalana ni mwaar'inyu. Nyuwo khamuthenle? Weeso muhiphavele othela.

²⁸Nto mwathela khamunttheka, siiso-tho muthiyana ohinaphitaane ni mulopwana atheliwa khanttheka, nto miyo kaatthuna owoopolani mixankiho nyuwo sinrow'anyu ophwanya muhina wookhala muthenle-ene wala mutheliwe-ene.

²⁹Axinn'aka etthu yaaphavel'aka wohimeeryani tiila: Okathi onnihaleela ori vakhaani, okhuma olelo orowa ohoolo, ale athenle ekhaleke ntoko kathenle,

³⁰ale aninla ekhaleke ntoko khaninla, ale antthapa ekhaleke ntoko khantthapa, ale antthama ekhaleke ntoko karina iye sithumy'aya,

³¹ale anrumeela sooreera s'olumwenk'ula ekhaleke ntoko khanrumeela, maana oreera w'olumwenk'ula onoovira.

³²Miyo kaaphavela wira mukhale ootaphuwa wa itthu sooxankiha. Ole ohithenle wala ohitheliwe onnithokorerya oratta-ene itthu s'Apwiya, w'enamuna yoowasiveliha Apwiya

³³Nto ole othenle onithokorerya itthu s'olumwenku, ophavelaka enamuna yoomusiveliha mwaar'awe,

³⁴ti vo wannikawanyeya, muthiyana ootheliwa n'ule oohitheliwa muthiyana oohitheliwa onnithokorerya muteko w'Apwiya, wira akhale ooreera murima mwerutthuni, hata muroohoni, nto muthiyana ootheliwa onithokorerya itthu s'olumwenku, w'enamuna yoomusiveliha iy'awe.

³⁵Kinihimya siiso, kiirelaka oreeriwa wanyu, kahiyo kimphavela wooreyani muraakho, ohiya vo, kimphavela wira mwiireke itthu sooloka ni wira mwiivahereryeke ovara miteko s'Apwiya n'ulipiherya.

³⁶Nto akhala mutthu onuuliwa muru aanwehaka muthiyana ohinaphitaane ni mulopwana omwaakamenly'awe avikanaka iyaakha sootheliwa, iireke entthun'awe ethelaneke, amuthela khanttheka.

³⁷Nto mulopwana owo akhala oolipa murima, okhala ahithenle, oona vale wira onoowerya ovilela makhalelo awe, khutthuna ni murim'awe ohakuvela omuthela, nto atthuna siiso onniira etthu y'oreera.

³⁸Siiso-tho ole onthelihiwa muthiyana ohinaphitaane ni mulopwana, omwaakamenly'awe oniira etthu yooreera, vano ole ohinithelihiwa onniira etthu yootepa oreera.

³⁹Muhina mwa ikano muthiyana ootheliwa onikhala ootthukanihiwa n'iyawe mpakha iy'awe okhwa, nto iy'awe akhwa muthiyan'owo onniwerya otheliwa ni mulopwana onimutthun'awe, nto ethelaneke aKristu-ru.

⁴⁰Vano, onootepa oreeriwa, okhala siiso ahitheliwe, nto wuupuwela waka, nave-tho kinnitthokelela wira ni miyo kinlavula kikhaliheriwaka ni Erooho ya Muluku.