1 Corinthians 6

¹Mwiiwe, mutthu mmosa a nyuwo orina mulattu ni mukhw'awe, onirowa sayi ovekela ophukiwa ni mutthu ohinaxariya khuhiya orowa ohoolo wa mutthu ooreera murima?

²Nyuwo khamunsuwela wira atthu ooreera murima anoophuka olumwenku? Vano olumwenku waaphukiwaka ni nyuwo, nto khivanoophwanelani ophuka itthu icikhaani.

³Nyuwo khamunsuwela wira ninrowa walamula ankelo? Vano vaatepexa okhweya itthu s'ekumi ula.

⁴Nto mwakumiheryana mulattu wa ithu sookhweya s'ekumi ula, munaaroihela ale ahirina muteko ohoolo w'ekerexa?

⁵Wira ewuuliheni muru, kinnokohani wira munlokoni mwanyu khaavo mutthu aakhili nnakhala mmosa onsuwela ophuka milattu eriyari y'axinn'inyu?

⁶Vano vanikhala sayi munna omurowanaka munn'awe ohoolo wa aphuki, khuniira ari aphuki oohiroromeleya.

⁷Tthiri, veekeekhayi kahiyo etthu yooloka okumiheryana milattu yeenyu-ru, khino xeeni muhinaakhulel'anyu wiireliwa yootakhala nnakhala wiiyeriwa?

⁸Nto ti nyuwo muniwirela yootakhala axinn'inyu ni munniwiiyerya.

⁹Khamunsuwela wira ale ahina-xariya khankela moomweneni mwa Muluku?

¹⁰Kahiyo mwaari anamuttompe, nnakhala ale anaattittimiha amuluku aethiru, hata anamararuwa, nnakhala alopwana anrupihana yawo-ru, nnakhala ale anihonona itthu s'aneene, nnakhala anawiiye, nnakhala anamilili, n'ale anaaveeha akhw'aya, nnakhala ale aniwiiyerya akhw'aya, khanikela moomweneni mwa Muluku.

¹¹Itthu iya akhala akina mwa nyuwo yiira, nto vano nyuwo moorapihiwa; ni mooreerihiwa, ni mookhalihiwa anaxariya mwa nsina na Pwiya Yesu Kristu ni mwa Erooho ya Muluku ahu.

¹²Miyo kinniwerya wira itthu sothene sintthun'aka, nto kahiyo sothene ti sooreerela wira, kinniwerya wira itthu sothene, nto miyo nkiniihiya kikhalaka epottha ya itthu seiyo.

¹³Yoolya epakeliwe napwiipwi, vano napwiipwi opakeliwe yoolya, nto Muluku onoomaliha soopiili, vano erutthu ahu khipakeliwe wira yaarumeeleke Apwiya, nave Apwiya arumeeleke erutthu.

¹⁴Nave-tho Muluku yoowo aahihimuxale Apwiya, onnonihihimuxa hiyo n'uwerya waya.

¹⁵Nyuwo khamunsuwela wira irutthu sanyu mpantta w'erutthu ya Kristu? Tthiri kookhala oowaakuxa atthu aerutthu ya Kristu, wira kaakhalihe atthu aerutthu y'enamuttompe? Khivanirerela.

¹⁶Wala khamunsuwela wira ole onataana ni namuttompe oniikhaliha erutthu emosa ni yoowo? Tthiri vannihimmwa wira oowanli aya ankhala erutthu emosa-ru.

¹⁷Vano ole onaataana n'Apwiya, erooho enikhala emosaru.

¹⁸Mutthyaweke onamuttompe. Itampi sothene mutthu siniir'awe khasinttekiha erutthu, nto ole oneetta onamuttompe onnitthekiha erutthu awe.

¹⁹Wala khamunsuwela wira erutthu anyu empa ya Erooho Yooreera enikhala mwa nyuwo, onikhuma wa Muluku, ni khamunsuwela wira nyuwo khamuhiyo aneene mmansinyu.

²⁰Tthiri muroothummwa n'esisapo yinci-ene, vano mmuttittimiheke Muluku n'erutthu anyu ni erooho anyu, maana sothene ti sa Muluku.