1 Corinthians 5

¹Vano vanniiwanyeya mapuro othene wira wookhala mwa nyuwo onamuttompe, onamuttompe yoowo ohiniiriwe hata eriyari y'amalapo, eyo p'iyo, mutthu onrupa ni mwaara a tiithi awe.

²Munnikhala oowisoona, nto hata mano vakhaani khamuriipiwe murima mwaha woohikumihiwa eriyari anyu mutthu oniira siiso.

³Vano, miyo v'ekekhayi, ohiya okhala ottai-wene n'erutthu, nto murim'aka ori ni nyuwo, kikhalaka siiso ni nyuwo koomulamula mutth'uwo iirale yootakhala eyo,

⁴mwa nsina na Yesu Kristu, nyuwo vamosa ni miyo muhina mwa erooho aka n'uwerya wa Yesu Kristu Pwiy'ahu,

⁵mutth'uwo avahereriwe Satana, wira erutthu awe epweteye ni wira erooho awe yoopowe nihiku ninrw'awe Pwiya Yesu.

⁶Wiittottopa wanyu khunreera. Khamunsuwela wira miropo vakhaani sinniipiha otthu wothene?

⁷Vano mwiireerihe, mukumihaka eriyari anyu miropo sa khalayi, wira mukhale otthu wa naanaano, ntoko siiso siry'anyu muhiheliwe miropo. Okhala wira Kristu ori paasikh'ahu ohiiviwa mwaha wa hiyo.

⁸Tivo, ntthapeleleke niira, voohikhala vamosa ni miropo sa khalayi, hata vamosa ni miropo sirina murima wotakhala n'usiveliwa wira sootakhala, nto ntthapeleleke ni mikatthe soohikhala miropo siri sa xariya ni s'ekeekhayi.

⁹Ehapari ekina yoolepenly'akani, kihoohimeeryani wira muhikhaleke vamosa n'anamuttompe.

¹⁰Kaahimyaka siiso, nkinaahimya anamuttompe othene oolumwenk'ula, wala okhala vamosa n'anamilili, hata n'anawiiye, wala n'ale anaakokhorela amuluku aethiru, okhala wira vaari siiso mwaahaana okhuma moolumwenkuni-mu.

¹¹Nto vano kihoolepelani wira muhataane n'ale anoothererya okhala axinna khuniira ari anamuttompe, wala anamilili, wala anaakokherela amuluku aethiru, wala ale anaaveeha akhw'aya wala anamuhapaliwa, wala anawiiye, atthu siisa, nyuwo hata muhilyeeke poromosa.

¹²Tthiri miyo-tho kirina-ni kikhanly'aka oowaaphuka atthu ahikhanle aKristu? Nyuwo khamunaaphuka a atthu a munlokoni mwanyu?

¹³Vano Muluku t'unrowa waphuka ale ahikhanle aKristu. Tivo, mmoomole eriyari anyu mutth'uwo ootakhala.