1 Corinthians 4

¹Atthu anikhapeleleke ntoko arumeyi a Kristu ni anamuteko anlaleya isiiri sa Muluku.

²Ohiya vo-etthu enikhanyereriw'ahu hiyo arumeyi t'ila: Khula mmosa akhaleke oororomeleya mmutekoni mwawe.

³Vano miyo nkincala waakiphwanelaka olamuliwa ni nyuwo, wala ni mphuki mukina a vathi-va, miyo mmansaka hata mano vakhaani nkiniilamula.

⁴Tthiri ankhili aka khana-mulattu, nto siiso nkiniihimya wira kooleveleliwa, maana ankilamula t'Apwiya.

⁵Tivo, muhimulamule mutthu okathi ohiphiye, mpakha Apwiya orwa, nave-tho yaawo anoomwaleela vamuthukoni itthu sothene soovithiwa sa mweepiphini nave onimooniherya muupuwelo ori mmurimani mwa khula mutthu, vano-nto khula mutthu onootthuveliwa ni Muluku attottopeliwaka.

⁶Axinn'aka itthu iya sothene miyo sihimaly'aka kinneettela seiyo miyo vamosa n'Apolo, mwaha w'owoophentani nyuwo, wira mwiixutte wa hiyo muhivikanihaka mukano soolempwa, ohikhale oniikuxererya mwaha wa mutthu mmosa khuyamuthanya mukina.

⁷Taani ookhalinheni muulupale wavikana akina? Nave yookhala erin'anyu muhivahiwe? Nto vakhala wira moovahiwa xeeni eniisoonel'anyu okhalaka ntoko khanvahiwe?

⁸Vano mookhalana sinci-ene! Nave vano moothaaciri! Nyuwo mwa mwamwene vonihiya hiyo, vaamureera tthiri mw'ari mwamwene, wira ni hiyo-tho nikaweliwe omwene anyu.

⁹Kinoona wira Muluku oonihela hiyo arummw'awe nipuro nookiserya ntoko atthu alamuleliwe wiviwa, tthiri ninkhalihiwa atthu ooveeheya ohoolo w'olumwenku n'uhoolo w'ankelo n'uhoolo w'atthu.

¹⁰Hiyo n'alolo, mwaha woomphenta Kristu nave nyuwo mw'asuweli, mwa Kristu, hiyo n'atthu oohilipalipa nyuwo mw'atthu ookhoomala, nyuwo munnittittimihiwa hiyo nnoovehiwa.

¹¹Mpakha olelo-va ninnihaawa etala ni ntthona, n'othaleliwa, nnoomaniwa, ni khanrina nipuro nookhala,

¹²nave hiyo ninnikhulumuwa, nivaraka muteko ni matat'ahu, naaruwaniwaka nnaakhula ni murima wooreera, ninnilupatthiwa nave ninnihaawa,

¹³naaruwaniwaka ninnivekelela, mpakha vano, hiyo nnoolikana n'ikokhola s'olumwenk'ula, ni ntoko ntthupi na vathi ohoolo w'atthu othene.

¹⁴Nkinoolepelani moolumo ala wira kiwuulihiheni muru, nto kinnootumereryani ntoko an'aka anaaphent'aka.

¹⁵Tthiri, munamwi mwaarookhalana atthu miloko muloko aniweettiheryani ephiro, okhala wira miyo kooyanreni mwa Yesu Kristu, koolaleeryakani Ehapari.

¹⁶Vano kinnootumereryani wira mutthareke mweettelo aka.

¹⁷Mwaha wa itthu iya kihoorumihelani Timotiyo, yoowo ori mwan'aka kinimphent'aka ni ooromeleya mw'Apwiya, owo onoowupuxeryani iphiro sineettel'aka mwa Kristu n'inamuna siniixuttih'aka mapuro othene ni wa khula Ekerexa.

¹⁸Atthu akina annitteeliwa murima vanci-ene yuupuwelaka wira miyo nkaarwa-tho wa nyuwo.

¹⁹Nto Muluku atthuna kinimoorwa naanaano wa nyuwo, siiso kinoosuwela itthu siniir'aya atthu aneetta esarenye-ene wiisoona ohiya siniwerya wira paahi.

²⁰Maana omwene wa Muluku khunkhalihiwa ni moolumo nto onkhalihiwa n'uwerya.

²¹Muntthuna-ni? Muntthuna kirwe wa nyuwo ni murepettho wala kireeke n'uphenta ni murima woovilela?