1 Corinthians 3

¹Vano miyo axinn'aka nkaawenrye woolavulihani ntoko atthu a muroohoni nto ntoko atthu ankhalela itthu seerutthu, ntoko atthu ayariwe naanaano mwa Kristu.

²Kihookhapelelani koovahakani eleeti, kihoovahakani yoolya yoolipa, okhala wira nyuwo khamwaawerya, hata mano vakhaani, nnakhala vano, nlelo khamunwerya.

³Maana nlelo muntthara makhalelo aerutthu, tthiri munnikhalelana nrima eriyari anyu, muniwana-wana ni munnikawanyana, siiso khamuhiyo atthu antthara makhalelo aerutthu, nave siiso khamuntthariha makhalelo aomutthu?

⁴Tthiri akhala mutthu onihimya wira miyo kinimutthara Paulo, vano mukina anahimya wira miyo kinimutthara Apolo, siiso khamunttharihela makhalelo aerutthu?

⁵Vano-nto ti pani Paulo, nave ti pani Apolo, awo arumeyi, mwa yaawo aahooruuhelani waamini, ni khanttharihela muteko Apwiya omukawenly'aya khula mmosa?

⁶Miyo kiphatteiye, Apolo khukhuwariki, nto Muluku khunnuwihaka.

⁷Siiso mutthu omphatteya kahiyo muulupale nnakhala ole onkhuwari khahiyo muulupale, nto muulupale Muluku yoowo oninnuwiha.

⁸Vano mutthu oniphatteya n'ule onikhuwari anoolikana, nto khula mmosa onimwaakhela etthuvo awe, enttharihela muteko awe.

⁹Okhala wira hiyo ninvara vamosa-ru Muteko wa Muluku, nyuwo mw'ematta ya Muluku n'ipa sa Muluku.

¹⁰Kittharihelaka mahala kivahiw'aka ni Muluku, miyo kihaala nluku ntoko funti ooratta, vano mukina onniteka vasulu vaya, nto khula mutthu aweheke enamuna sintek'awe vasulu va nluku nlo.

¹¹Maana khaavo onwerya othipa malitti makina, ohiya nle naaliwe-mo, yoowo ti Yesu Kristu.

¹²Vano mutthu onrowa oteka vasulu va nluku nlo, khuteka n'iweero hata n'iparatha nnakhala ni maluku oowaarya, hata ni ithaapwa wala ni mikhutta, nnakhala ni malaxi,

¹³muteko wa khula mutthu onimooniheriwa n'ikeekhayi, nihiku noolamuliwa nnimooniherya, okhala wira sinrowa osuweliwa sivinre-ene vamooroni, nave mooro yoowo onimooniherya olipa wa muteko wa khula mutthu.

¹⁴Empa ya mutthu otenke vasulu va nluku yaalipa, owo onootthuveliwa.

¹⁵Empa ya mutthu otenke vasulu va nluku yaapahiwa, mwaneene khantthuveliwa, nto owo onimoopowa, siivaavale mutthu onivir'awe vamooroni khuhivya.

¹⁶Nyuwo khamusuwenle wira mw'empa ya Muluku, ni wira Erooho ya Muluku onikhala mwa nyuwo?

¹⁷Akhala mutthu ontthuna opwexakasa empa ya Muluku, Muluku onoompwetexa, maana empa ya Muluku ti yooreera emp'eyo ti nyuwo.

¹⁸Ahikhale mutthu oniisoothotha, akhala mutthu eriyari anyu oniisuupuwela okhala musuweli elapo y'ela ya vathi, aikhalihe mulolo eriyari y'atthu wira akhale musuweli.

¹⁹Maana osuwela wa vathi-va ti elolo vamaithoni va Muluku, tthiri voolempwa wira: Muluku onnavara asuweli n'ulavilavi aya.

²⁰Voolempwa-tho wira: ?Apwiya annisuwela wira wuupuwela w'asuweli khuhiyo etthu.?

²¹Tivo ahikhale oniittittimiha v'atthu-ni okhala wira sothene ti sawinyu,

²²akhale Paulo, nnakhala Apolo, hata Sefa, akhale olumwenku, hata ekumi, nnakhala okhwa, okhale okathi ula ni mahiku anoorwa, sothene ti sawinyu,

²³nave nyuwo mw'atthu a Kristu nave ta Muluku.