1 Corinthians 2

¹Axinn'aka, miyo vale kaarowaly'aka wa nyuwo wira koolaleeryeni esiiri ya Muluku nkoonihenrye elavulelo yoothipelela wala moolumo oosuwela.

²Okhala wira miyo nkaatthunne owoniheryani etthu ekina, ohikhanle Yesu yoowo aakhomeliwe vamiikimanyo.

³Nave miyo kaari eriyari anyu ntoko mutthu oohilipa, oosareya woova ni oosareya othukumela wuulupale.

⁴Moolumo aka ni Ehapari yaalaley'aka nkaalavula ni moolumo ookuxa murima ni oosuwela nto kaalavula kiwooniheryakani Erooho Yooreera n'uwerya.

⁵Wira waamini wanyu ohilipihiweke n'usuwela w'atthu, nto olipihiweke n'uwerya wa Muluku.

⁶Tthiri waale ahikhanle oolipa muroohoni mwaya, miyo kinniwiixuttiha n'usuwela, nto kahiyo osuwela w'atthu a vathi-va, nnakhala w'atthu aneettiha elapo, yaawo anrowa opweteya.

⁷Nto ninlavula osuwela wa Muluku wiipithihiwe ni mwiriirya, weiwo Muluku waathanlaly'awe okhuma khalayi wira okhale nttittimiho nahu.

⁸Weiwo khaavo mukhulupale a mulaponi-mu osuwenle, aakhanle, aasuwenle, khiyaamukhomela vamwiikimanyo Pwiya a nttittimiho.

⁹Vano ntoko silempwaly'aya wira: Itthu niitho sihoonalya'aya, ni yiiwaka khuhoona, ni khuhiphiya va murimani va mutthu, ti seiyo Muluku aalokiherenly'awe ale animphenta.

¹⁰Nto Muluku oonooniherya itthu iyo muhina mwa Erooho awe, okhala wira Erooho eyo enithokosa itthu sothene hata sootepaxa otikiniha.

¹¹Tthiri mutthu xeeni onwerya osuwela itthu siri mmuru mwa mutthu mukina, ehikanle erooho ya mutthu yeeyo eri mmurimani mwawe?

¹²Vano hiyo khinaakhenle Munepa y'olumwenku, nto naakhenle Erooho enikhuma wa Muluku, wira niweryeke osuwela ele Muluku ennivah'awe mahala.

¹³Nave-tho ti seiyo sinlaley'ahu, kahiyo ninlaleya n'usuwela wa mutthu, nto ninlaleya ni moolumo yiixuttihiw'ahu ni Erooho Yooreera, siiso ninnitaphulela ikeekhayi sa muroohoni mwa iye siri sa muroohoni.

¹⁴Vano mutthu ontthara makhalelo awe, khonsuwela itthu sa Erooho ya Muluku, okhala wira onoona wira itthu s'elolo, ni khanwerya osuwele-xa oratta-ene, okhala wira iyo sinsuweliwa ni mukhalelo wa muroohoni.

¹⁵Mutthu orina Erooho Yooreera onniwerya olamula itthu sothene, ni khaavo mutthu onimulamula yoowo.

¹⁶T'ani anwerya osuwela sintthokolel'aya Apwiya, wira awerye waavaha miruku? Nto hiyo nookhalana ankhili a Kristu.