1 Corinthians 1

¹Paulo oniihaniwa okhala murummwa a Yesu Kristu, vootthuna wawe Muluku, ni munna Sostene,

²ninnaalepela atthu a Ekerexa ya Muluku eri oKorinto, ale areerihiwe mwa Kristu Yesu, enaitthaniwa ooreera murima, vamosa n'ale othene anromola nsina n'Apwiya Yesu Kristu nipuro ti nipuro.

³Mahala ni murettele onrwa wa Muluku Tiith'ihu ni wa Pwiya Yesu Kristu akhale ni nyuwo.

⁴Mahiku othene kinnimuxukhuru Muluku aka mwaha wa nyuwo wa mahala avahiw'anyu ni Muluku mwa Kristu Yesu.

⁵Okhala wira mwa yaawo moosarihiwa sooreera sothene, wa masu n'usuwela wothene.

⁶Siiso ntoko Kristu oisoonihenryaawe mwa nyuwo.

⁷Siiso khiivo yoovaha ya Muluku enoohaleelani nyuwo, munlipelela wiisoniherya w'Apwiy'ahu Yesu Kristu,

⁸Nave owo-tho onimoolipihani mpakha woomaleloni, wira mukhale atthu a xariya nihiku ninrw'awe Pwiy'ahu Yesu Kristu.

⁹Muluku toororomeleya yoowo owiitthanenleni wira mwaataaneke ni Mwan'awe Yesu Kristu Pwiy'ahu.

¹⁰Axinn'aka kinnoxonttelani mwa nsina na Yesu Kristu Pwiy'ahu, wira mwiiwananeke, ni ohikhale okawanyeya eriyari anyu, ohiya vo mukhaleke vamosaru ni murima mmosa-ru ni muupuwelo mmosa-ru.

¹¹Okhala wira, axinn'aka, atthu eetthoko ya Klowe aakileela wira wookhala owana-wana eriyari anyu.

¹²Siiso kimphavela ohimya wira, khula mmosa a nyuwo onnihimya wira: Miyo kinimutthara Paulo, nave akina anihimya wira miyo kinimutthara Apolo, nave akina anihimya wira miyo kinimutthara Kefa, akina anihimya wira miyo kinimutthara Kristu.

¹³Munuupuwela wira Kristu tookawanyeya? Wala Paulo ti khomeliwe vamwiikimanyo mwaha wa nyuwo? Wala mpatisiwe mwa nsina na Paulo?

¹⁴Kinnimuxukhuru Muluku, okhala wira mwa nyuwo khaavo ompatisaly'aka, ohikhanle Krispu ni Kaio,

¹⁵wira ahikhale onihimya wira opatisiwe mwa nsina naka.

¹⁶Nave-tho kihaapatisa atthu eetthoko ya Sitefano, waahiya ala, nkisuwenle kaampatinse mutthu mukina.

¹⁷Maana Kristu khakirumme opatisa, owo okirumme olaleya Ehapari Yooreera, kahiyo ni moolumo oosuwelaxa wira okhwa wa Kristu vamwiikimanyo ohikhalihiwe ethiru,

¹⁸Tthiri, masu a vamwiikimanyo etthu y'elolo w'ale anipwetheya, nto mwa hiyo noopoliwe, owerya wa Muluku.

¹⁹V'ekeekhayi voolempwa wira: ?Kinoopwetexa miruku s'asuweli, ni kinoomaliha osuwela w'atthu a akhili.?

²⁰Vano musuweli ori vayi? Mwiixuttihi a ikano ori vayi? Anamasuwela oolumwenk'ula ari vayi? Tthiri Muluku ohooniherya wira osuwela w'oolumwenk'ula ti w'olelo.

²¹Olumwenku khosuwela miriku sa Muluku mwaha wa miriku saya.

²²Okhala wira aYuta anvekela ethonyeryo, aKresia aneettela osuwela waya.

²³Nto hiyo nnimulaleya Kristu aakhomeliwe vamwiikimanyo, aYuta annoon'aya okhala etthu yoonanara, nave aKresia anoona okhala etthu y'ololo.

²⁴Vano vamaithoni v'ale oothanliwa, ekhale aYuta hata aKresia ninnaalaleerya Kristu ori owerya n'usuwela wa Muluku.

²⁵Okhala wira miteko sa Muluku sinooniwa okhala selolo tisootepaxa akhili ovikana osuwela w'atthu, ni miteko sa Muluku sinooniwa okhala soohilipa tisootepexa olipa ovikana miteko s'atthu.

²⁶Axinn'aka, tthiri moone wihaniwa wanyu, maana nttharihelaka makhalelo anyu khiyihaniwe asuweli anci-ene hata khiyihaniwe atthu oowerya anci-ene nnakhala makhulupale manci-ene.

²⁷Nto Muluku ohaathanla atthu anooniwa okhala alolo vathi-va wira aavirikanye atthu oosuwela, nave Muluku ohaathanla atthu oohilipa oolumwenk'ula wira aavirikanye ale oolipa,

²⁸nave-tho Muluku ohaathanla atthu anooniwa okhala oohiloka ni oothanyeya n'atthu oohikhalana muteko oolumwenk'ula wira aamaalihe atthu anooniwa okhalana muteko.

²⁹Wira ahikhale mutthu oniittittimiha ohoolo wa Muluku.

³⁰Vano nyuwo mw'atthu a Muluku, mwa Yesu Kristu, yoowo wa hiyo Muluku oomukhaliha osuwela wahu, ni exariy'ahu, n'ureerihiwa wahu, ni woopoliwa wahu.

³¹Siiso ntoko silempwaly'aya wira: Ole oniittittimiha aittittimiheke mw'Apwiya.