Romans 16

¹Kinoveleelihani wa nyuwo murokor'ihu Fepe, yoowo onivara muteko ekerexa ya oKenkereya.

²Mmwakhele oratta-ene ntoko simphwanel'aya wira atthu ooreera murima, mwa nsina n'Apwiya; nave mmukhaliherye mwa sothene sinrow'awe wovekelani, maana owo khareere waakhaliherya atthu anci-ene, hata miyo-va mmansaka.

³Mmukhomase Prisila n'Akila, anvaran'aka muteko mwa Kristu Yesu.

⁴Awo yaahileva ekumi aya mwaha wa miyo; mwa y'eyo miyo kihaaxukhuru, nave kahiyo miyo paahi, hata ikerexa sothene s'amalapo sihaaxukhuru.

⁵Mukhomase muloko w'akristu, yoowo onthukumana vate vaya. Nave-tho mmukhomase Epeneto, onimphentex'aka, yoowo aapacenrye omwaamini Kristu elapo ya wAsiya.

⁶Mmukhomase Maria, yoowo ohireere woovarelani muteko.

⁷Mmukhomase Antroniko ni Yuniya, axinna ni axipatthani aka yaatthukelaniw'aka vamosa mukhatteya; awo toottittimiheya eriyari y'arummwa, nave t'opacerya omwaamini Kristu miyo kihinatthi.

⁸Mmukhomase Ampliato, munn'aka onimphentex'aka mw'Apwiya,

⁹Mmukhomase Urpano, yoowo onvaran'ahu muteko mwa Kristu, ni Estakhiyo, onimphentex'aka.

¹⁰Mmukhomase Apele, murumeyi oororomeleya mwa Kristu. Mwaakhomase atthu a etthoko y'Aristopulo.

¹¹Mmukhomase munna Herotiyoni. Mwaakhomase atthu a etthoko ya Narsiso, yaawo ari mw'Apwiya.

¹²Mmukhomase Trifena ni Trifosa, athiyana yaawo anvara muteko w'Apwiya. Mmukhomase Persite, nave-tho muthiyana onvara muteko munce-ene w'Apwiya.

¹³Mmukhomase Rufo, oothanliwa mw'Apwiya, mwaakhomase-tho amam'awe, yaawo ni miyo-tho ari amam'aka.

¹⁴Mmukhomase Asintiko ni Flekonte ni Herme ni Patropa ni Herma n'axinna anthukumana ni yaawo.

¹⁵Mmukhomase Filoloko ni Yuniya ni Nerewo ni murokor'awe ni Olimpia n'atthu othene ooreera murima anthukumana ni yaawo.

¹⁶Mukhomasaneke mukina ni mukhw'awe nvahanaka epeeco yooreera. Vano ikerexa sothene sa Kristu sinnoveleelihanihani makhomaso.

¹⁷Axinn'aka, kinnotumereryani wira mwiipasoopeke w'ale ankumiherya ohiiwanana n'ale anaakacamiha akhw'aya, evirikanyaka miixuttiho saakhenly'anyu, nyuwo mwaahuluweke yaawo.

¹⁸Maana atthu awo khanimurumeela Kristu Pwiy'ahu; awo anrumeela erukulu aya. Ni moolumo aya ooreera ni ooweepesa, annoototha mirima sookhweya.

¹⁹Atthu othene annisuwela omwiiwelela wanyu Kristu; tivo miyo kinniittottopa mwaha wa nyuwo. Vano, kintthuna wira mukhaleke atthu a miruku, mwiiraka sooreera, ni wira mukhale oohittheka, mutthyawaka sootakhala.

²⁰Muluku a murettele, onoomunyakatta Satana voohilekela, vathi va inawu s'anyu. Mahala a Apwiy'ahu Yesu akhale ni nyuwo.

²¹Timotiyo onvaran'aka muteko, onnookhomasani, siiso-tho onnookhomasani Lusiyo ni Yasoni ni Sosipatro, axinn'aka.

²²Miyo Tersio, kilempe epaphelo ela, kinnookhomasani mwa nsina n'Apwiya.

²³Kaio, kimmakenly'aka owanny'awe, ni akristu othene anthukumana weiwo, annookhomasani. Onnookhomasani Erastu, musuki a musurukhu a muttetthe, nave onnookhomasani munn'ihu Kwarto.

²⁴Mahala a Apwiy'ahu Yesu Kristu akhale ni nyuwo othene. Amen!

²⁵Vano, ole orina owerya, wo wohimeeryani ntoko mwa Ehapari Yooreera enlaleiwa Yesu Kristu, siiso ntoko wuupululiwa w'esiiri yaavithiwe mahiku a khalayi,

²⁶nto vano ehuupululiwa, khusuwelihiwa muhina mwa soolempwa sa maprofeta, siiso ntoko Muluku ohinimala saarummy'awe, wira atthu a ilapo sothene amwaaminiki ni amwiiweleleke,

²⁷Muluku mmosaru a miruku, attittimihiwe mwa Yesu kristu, wa mahiku othene. Amen!