Romans 15

¹Hiyo ninlipiherya waamini nihaana wavilela ale oohilipalipa wamini waya, nave nihiisiveliheke mmansihu.

²Khula mutthu aphavele omusiveliha mukhw'awe mwa itthu sooreera, wira amulipiheke waaminini wawe.

³Kristu mwaneene khaaphavenle wiisiveliha, ntoko silempwaly'aya wira: ?Maruwano a atthu ale yooruwanani, aakimorela miyo.?

⁴Vano sothene silempwe khalayi, silepeliwe wira siniixuttihe, wira mwaha wa ovilela n'ulipiha murima nimphwany'ahu mwa soolempwa, nikhalane ororomela.

⁵Muluku oovilela ni oolipiha murima, oovaheeni murima mmosaru wo wiwanana mukina ni mukhw'awe, mmuttharihelaka Kristu Yesu.

⁶Siiso, ni murima mmosaru ni nsu nimosaru paahi, munomuttittimiha Muluku tiithi awe Pwiy'ahu Yesu Kristu.

⁷Tivo, mwaakhelaneke mukina ni mukhw'awe, ntoko Kristu siwaakhelenly'aweni wira attittimihiwe Muluku.

⁸Vano miyo kinnohimeeryani wira: Kristu ahiikhakiha epottha y'ale oolyihiwa masoma, mwaha wophenta ekeekhayi ya Muluku, wira alipiherye nroromeliho na Muluku nenlo naalaphenly'awe axitiithi a khalayi.

⁹Nave wira amalapo amuttittimihe Muluku, mwaha woomoriwa wawe ikharari, ntoko silempwaly'aya wira: ?Tivo, miyo kinimoottittimihani, eriyari y'amalapo; ni kinoowipelani kinimwiipa isipo sootthapa kittottopelaka nsina nanyu.?

¹⁰Vaahimmwa-tho wira: ?Nyuwo amalapo mutteeliweke murima vamosa n'atthu awe.?

¹¹Khuhimmwa-tho wira: ?Mwattittimihe Apwiya nyuwo amalapo othene; nyuwo atthu othene a mulaponi nwiipele Apwiya.?

¹²Nave profeta Yesaya oohimya wira: ?Mutathaari wa Yese onoophuwela, owo onimoorwa wira aweettiheke atthu mulaponi; mwa yoowo amalapo anoomulipelela.?

¹³Muluku oororomeliha oosariheni otteeliwa murima wothene ni murettele mwaha w'omwaamini yoowo, wira mutepeke ororomela n'uwerya mwa Erooho Yooreera.

¹⁴Vano nyuwo axinn'aka, miyo mmans'aka koosuwela voohaanyiherya wira moosareya oreera murima, ni munnisuwela voomalela, ni munniwerya ovahana miruku.

¹⁵Vano epaphelo ela kihoolepeleni itthu sikina n'ulipiherya wira kiwuupuxeryeni-tho itthu siixuttihiwanyu; kihoolepelani siiso mwaha wa mahala a Muluku akivahaly'awe,

¹⁶okhala murummwa a Kristu Yesu, eriyari y'amalapo, okhala namukuttho onlaleya Ehapari Yooreera ya Muluku wira amalapo akhale yoovaha enimusivela Muluku, yooreerihiwa ni Erooho Yooreera.

¹⁷Tivo mwa Kristu Yesu, kinniwerya wiittottopa mwaha wa muteko wa Muluku onivar'aka.

¹⁸Miyo nkirina etthu ekina yoohimya, ehikhanle ele Kristu ekirummy'awe wira mwa miteko ni masu awe, wira amalapo amwiiweleleke Muluku,

¹⁹mwa owerya wa ithoonyeryo ni mitikiniho, muhina mwa owerya wa Erooho Yooreera. Siiso kinnilaleya Ehapari Yooreera ya Kristu, okhuma oYerusalemu ni mittetthe soowattamela, mpakha elapo y'Oliriko,

²⁰Mahiku othene kinniphavela olaleya Ehapari Yooreera mapuro y'ale paahi ahinsuweliw'awe Kristu, wira siiso kiheemexe empa mmalittini mwaathimpwe khalayi ni mutthu mukina.

²¹Ntoko silempw'aya wira: ?Anomoona ale ahitonko wiiwa alaleiwaka yoowo, ni anoomusuwela ale ahitonko wiiwa alavuliwaka yoowo.?

²²Mwaha wa itthu iya, imaara sinci-ene sinnikoceeliha orwa wooxekuryani.

²³Nto vano, koomaliha muteko aka ilapo iya, okhala wira soovira iyaakha sinci-ene kiphavelaka woxekuryani.

²⁴Kinoophiya weiwo okathi onrow'aka w'Espanya, veekeekhayi kavira vale, kinniroromela owoonani, kikhalaka mahiku vakhaani ni nyuwo, wira kimalihe munkhela kirin'aka, ni wira mukikhaliherye ekwah'ak'eyo.

²⁵Vano kimpacerya orowa oYerusalemu wira kaarumeele atthu ooreera murima a weiwo.

²⁶Okhala wira atthu a oMasetonia ni a w'Akhaya yahithukumanya soovaha saya wira yaavahe atthu ooreera oothoiwa a oYerusalemu.

²⁷Yahoona oreera wira siiso, nave veekeekhayi atthu anlokihiwa n'atthu ooreera murima a oYerusalemu. Tivo vakhala wira amalapo awo ahiira mpantta wa sooreera sa muroohoni s'aYuta, nave-tho ahaana warumeela aYuta ni mireerelo saya.

²⁸Vano, kamaliha mutek'ola kamwinnyaru voororomeleya soovaha iya, kinovenya kirowaka wEspanya. Okathi uwo, kinohapuwa wira kooxekuryeni.

²⁹Koosuwela wira karwa wa nyuwo, kinoophiya kisareiye-ene ni sooreera sa Kristu.

³⁰Vano axinn'aka, kinnoovekelani mwa nsina n'Apwiya Yesu Kristu ni mwaha wophenta wa Erooho Yooreera wira mukikhaliherye mukivekelelaka wa Muluku.

³¹Nvekeleke wira miyo koopowe mmatatani mwamalapo a oYuteya, ni wira muteko ak'ola waakheleliwe oratta-ene n'atthu ooreera murima a oYerusalemu,

³²wira mwa othuna wa Muluku, kirwe wa nyuwo n'utteeliwa murima ni kikhalanaka okathi womumula vamosa ni nyuwo.

³³Siiso Muluku a murettele, akhale ni nyuwo othene. Amen!