Romans 14

¹Mmwaakheleke oratta-ene ole oohilipa-lipa waamini wawe, muhinvanyihaka mwaha woohoverya wawe.

²Maana mukina onnaamini olya itthu sothene, nto ole oohilipalipa waamini wawe onlya makukhu paahi.

³Vano, ole onlya sothene sinlyiwa ohinveeheke ole ohinlya sikinaku. Nave ole ohinlya solya sikina ohimulamule ole onlya sothene, okhala wira Muluku oomwaakhela yoowo.

⁴Nyuwo mwa pani munimulamula namuteko a mwaneene? Owo aarimweemela wala amoraka, eyo ti ya pwiy'awe. Tivo onimweemela okhala wira Apwiya aakhalana owerya womweemexa.

⁵Ookhala onuupuwela wira nookhala nihiku noottittimiheya ovikana mahiku makina; nave ookhala mukina onuupuwela wira mahiku othene anoolikana, vano khula mutthu aaminiki mmurimani mwawe.

⁶Ole onuupuwela wira nookhala nihiku nottittimiheya ovikana makina, iireke aattittimihaka Apwiya, ole onkhuura enama, akhuureke aattittimihaka Apwiya, tivo amuxukhuruku Muluku; nave ole ohinkhuura enama, ahikhuureke aattittimihaka Apwiya, n'uwo amuxukhuruku Muluku.

⁷Maana Khaavo mutthu onikhala aikhalelaka mwaneene, wala khaavo mutthu onikhwa aikhwelaka mwaneene.

⁸Naakhalaka akumi nnaakhalela Apwiya. Nave, naakhwaaka nnaakhwela Apwiya; Tivo hata nikhalaka akumi wala nikhwaaka, n'atthu a Apwiya.

⁹Tivo wa mwaha yoola, Kristu vakhwiy'awe ni vahihimunw'awe mookhwani wira akhale Pwiya a atthu akumi ni akhwiiye.

¹⁰Vano exeeni nyuwo enimulamulelanyu mukhw'inyu? Nave exeeni enimuthanyery'anyu mukhw'inyu? Musuweleke wira othene ahu ninrowa olamuliwa ohoolo wa Muluku.

¹¹Maana valempwa wira: Miyo kinnilaphela wira makutha othene animoorwa, okokhora ohoolo waka nave malumi othene anohimya wira miyo ka Muluku anihimya t'Apwiya.

¹²Tivo, khula mmosa a hiyo onrowa wiihimya mwaneene ohoolo wa Muluku.

¹³Siiso nihiye waalamula akhw'ihu. Ohiya-tho vo, nihihele ekwathula ohoolo, wala ekhokwe ohoolo wa munn'ihu.

¹⁴Miyo kinlavula ntoko mutthu ori mw'Apwiya Yesu, kinnaamini wira khiivo yoolya eniihela mwiikho mmans'aya, akhala mutthu ontthokolela wira yookhala yoolya ya mwiikho, yooly'eyo enimukhalela mwiikho mutthu yoowo.

¹⁵Nto nyuwo mwamuriipiha murima munn'inyu mwaha w'etthu enly'anyu, khamuniira voomphenta. Mwaha wa yooly'anyu muhimurimeelihe munn'inyu yoowo Kristu omukhwenly'awe.

¹⁶Ahikhale oniveeha ele enoonanyu wira etthu yooreera.

¹⁷Okhala wira omwene wa Muluku kahiyo olya n'uwurya. Omwene wa Muluku exariya, murettele ni otteeliwa murima mwa Erooho Yooreera.

¹⁸Othene ale animutthara Kristu yiiraka siiso, annimusiveliha Muluku nave annittottopeliwa n'atthu.

¹⁹Vano niphaveleke wira itthu sinniphwanyiha murettele ni sinnimulipiha mukina ni mukhw'awe.

²⁰Muhihonone muteko wa Muluku mwaha wa solya. Ekhweeli wira soolya sothene ti sooreera, nto ti yootakhala olya etthu enimukwattuliha mukw'inyu.

²¹Fataari ohikhuura enama wala ohiwurya eviinyu n'uhiira etthu ekina, enimukwattuliha mukhw'inyu.

²²Etthu enkupaly'anyu mwaha wa itthu seiya, mukupaliki nyuwo mmansinyu ni Muluku. Ooreeriwa t'ule ohiniilamula mwaha w'etthu enoon'awe wira ti yooreera.

²³Vano ole onlya ahoveryaka mmurimani mw'awe oolamuliwa; okhala wira owo khanlya aaminiki. Vano sothene siniir'ahu nivirikanyaka waamini, etampi.