Romans 13

¹Atthu othene awiiweleleke a makhulupale aneettiha elapo. Maana khiivo eyuulupale ehikhumme wa Muluku; makhulupale ari mulaponi akhalihiwe ni Muluku.

²Tivo ale anaavirikanya makhulupale a mulaponi, annivirikanya mukhalelo okumiheriwe ni Muluku. Nave ale aniira siiso aniiiphwanyiha ihukhumu mmansaya.

³Makhulupale khanoopiha wiiraka etthu yooreera, anoopiha wiiraka yootakhala. Vano nyuwo munnitthuna ohiwoova makhulupale awo? Nto mwiireke yooreera wira awo yoottottopeleni.

⁴Okhala wira okhulupale orin'aya ti wa Muluku, yoowo onaakhaliha atthu vooreera. Vano nyuwo mwiiraka yootakhala mooveke, maana okhulupale owo khonihukhumu vahimulattu vo; okhulupale owo omurummwa a Muluku, mulipa a xariya onaahukhumu ale aniira yootakhala.

⁵Tivo, muhaana owiiwelela makhulupale, wohikhala mwaha wo woova wohukhumuni paahi, nave nto nwiiweleleke mwaha wa murim'anyu.

⁶Tivo nyuwo vanaliv'anyu mpooxito makhulupale awo. Maana awo anvara muteko wa Muluku mahiku othene.

⁷Vano, mmulive khula mutthu etthu enimphwanela: Wakhala mpoxito, mwaavahe ale amphwanela olinvwa mpooxito, wakhala mulutha mwaavahe ale amphwanela olinvwa mulutha; wakhala woova, nwooveke ale amphwanela wooviwa; wakhala ottittimiha, mwaattittimiheke ale amphwanela ottittimihiwa.

⁸Ahikhale mutthu onimulokiha etthu mukhw'awe, ohikhanle ophentana mukina ni mukhw'awe, nto ole onimphenta mukhw'awe, onniiwelela ikano sa Muluku.

⁹V'ekeekhayi, ikano sinihimya wira: ?Muhiraruwe?, ?Muhimwiive mutthu?, ?Muhikhalele nrima itthu s'aneene?, n'ikano sikina sothene, sinthukumanyeya mwa nuulumo nla, nnihimya wira: ?Mumphenteke mukhw'inyu ntoko siniiphent'anyu.?

¹⁰Mutthu onimphenta mukhw'awe khanimwiirela yootakhala, maana ophenta wiiwelela voomalela ikano.

¹¹Niireke siiso, nisuwelaka okathi ula ory'ahu. Ola okathi woovenya waarup'ahu, maana vano woopoliwa wahu woophiya, ovikana okathi opacenry'ahu waamini.

¹²Ohiyu woovira; muthuko woophiya. Vano, nihiye miteko s'epiphi, nikuxe itthu sa muthuko.

¹³Neetteke ni makhalelo ooreera, voophwanelela miteko sa muthuko, nihiye wiipeliwa n'uhapaliwa, nihiye onamuttompe n'uraruwa, nihiye oruwanana n'ukhalelana nrima.

¹⁴Siiso, munware Pwiya Yesu Kristu, wira muhiye wuupuwela soosivela s'erutthu.