Romans 12

¹Axinn'aka! Mwaha wa ikharari s'Apwiya, kinotumereryani wira mwiivahererye wa Muluku, ntoko mukuttho mukumi ni wooreerihiwa ni womusivela Muluku. Okhanle omuttittimiha wanyu Muluku woomalela.

²Muhitthareke mweettelo wa vathi-va, nto murukunuxe makhalelo anyu muluulaka muupuwelo anyu; wira nwerye osuwela etthu yooreera, enimusivela Muluku, n'utthuna wawe womalela.

³Mwaha wa mahala avahiwaaka ni Muluku, kinohimeeryani nyuwo othene, wira ahikhale oniisoona ovikana simphwanel'awe, nto mwiisuupuweleke muttharihaka miruku ni mweeryo wo waamini, Muluku omukawenly'awe khula mutthu.

⁴Siisaale ntoko erutthu ahu erin'aya ipantte sinci-ene, nave ipantte iyo sothene s'erutthu khasinvara muteko mmosaru.

⁵Siiso hiyo, nri atthu anci-ene, ninnikhala erutthu emosa mwa Kristu, ninnuupana mutthu ni mukhw'awe ntoko ipantte s'erutthu.

⁶Vano khula mutthu ookhalana soovaha sihinlikana, sittharaka mahala Muluklu onvahaly'awe. Ole ovahiwe mahala oolaleya masu a Muluku alaleyeke attharihelaka waamini wawe,

⁷akhala wira ovahiwe mahala oowarumeela akhw'awe, aarumeeleke; akhala wira ovahiwe mahala oowiixuttiha, iixuttiheke;

⁸akhala wira ovahiwe mahala oowalipiha murima akhw'awe, aalipiheke murima; akhala wira ovahiwe mahala oowavaha akina oothoiwa, aavaheke oratta-ene, akhala wira ovahiwe mahala oohoolela, ahooleleke oratta-ene, akhala wira ovahiwe mahala oowakhaliherya atthu oohaawa, akhaliheryeke n'utteeliwa murima.

⁹Ophenta w'anyu okhaleke w'ekeekhayi. Munyokheke yootakhala, mwiireke yooreera.

¹⁰Mphentaneke ntoko axinna, mureerelanaka murima, mulipiheryeke ottittimihana mukina ni mukhw'awe.

¹¹Mwaarumeelaka Apwiya, muhikhale oowoolowela muteko anyu, mukhaleke oolipiherya muroohoni.

¹²Mutteeliweke murima moororomelani; mwahaawaka nvileleke, mulipiheryeke ovekela.

¹³Mwakaweleke sirin'anyu akristu oohawa, ni nwaakheleke oratta-ene aletto.

¹⁴Mwareeriheke ale anoolupatthani; mwareerihe nto muhaatakhalihe.

¹⁵Mutteeliweke murima vamosa n'ale antteeliwa murima; munleke vamosa n'ale aninla.

¹⁶Mwiiwananeke oratta-ene mukina ni mukhw'awe. Muhiittottopeke, mphaveleke okhala n'ale ahinooneliwa vatthu, muhiisooneke okhala asuweli.

¹⁷Muhiilive yootakhala eniireliw'anyu ni yootakhala ekina. Mphaveleke wira yooreera ohoolo w'atthu othene.

¹⁸Mphaveleke murettele n'atthu othene.

¹⁹Axinn'aka muhiwunlele ikuhu akhw'inyu, onanariwa wanyu mmuhiyerye Muluku. Maana voolempwa wira: ?Wunla ikuhu muteko aka; miyo kinooliverya,? Apwiya tanihimya.

²⁰Voolempwa-tho wira: ?Nwanan'inyu avoliwa etala, munvahe eyoolya avoliwa ntthona munvahe maasi. Mwiiraka siiso, munuukela makhala a mooro vamuru vawe.?

²¹Muhiihiye muxinttiwaka ni yootakhala, nto muxintteke yootakhala, mwiiraka yooreera.