Romans 11

¹Vano miyo kinnikoha nlelo wira: Khino Muluku orimwaanyanyala atthu awe? Nnaari khanyanyanle. Maana miyo va ka mw'Isarayeli, osuulu w'Aparahaamu, nloko na Pencami.

²Muluku khaanyanyanle aIsarayeli yaawo yathanlaly'awe okhuma khalayi. Nyuwo munnisuwela oratta-ene Soolempwa wira Eliya ahivekela wa Muluku mwaha w'atthu a Isarayeli ahimyaka wira:

³?Pwiya, atthu a Isarayeli awiiva maprofet'anyu ni ahaapwexakasa altaari anyu; vano miyo mekhaaka kihanle, nto awo anniphavela okiiva.?

⁴Vano Muluku aamwakhunle sayi? Owo aamwakhunle wira: ?Miyo kihiisukerya atthu aka imiya miloko mithanu na miili (7000), yaawo ahimukokhorele Pahaali.?

⁵Siiso mahiku ala a vano, aakhala-tho atthu ahanle, athanliwe mwa mahala.

⁶Awo athanliwe mwa mahala, voohikhala mwaha wa miteko saya; maana vaakhanle siiso mahala a Muluku khiyaarowa okhala mahala.

⁷Vano nintthuna ohimya exeeni? Atthu a Isarayeli khiyaaphwannye etthu yaaphavel'aya, yaaphwannye t'ale Muluku aathannlaly'awe, nto atthu akina yahuumihiwa murima.

⁸Ntoko silemphwaly'aya wira: ?Muluku ohaavaha murima woohicala ohaavaha maitho ahinoona ni maaru ahiniiwa, mpakha oolelo va.?

⁹Nave Taviti oohimya wira: Yooly'aya ya niira ekhale ekhokwe ni ntapha nnaavariha, ekhale ekwathula ohoolo waya wira yaahukhumu.

¹⁰Nave maitho aya eriipihiwe wira ehooneke, muthan'aya okhurupuwe wa mahiku othene.

¹¹Miyo kinnikoha-tho wira: Khino awo yakwattuliwe wira amore? V'ekeekhayi nnaari! Maana mwaha wohiiwelela waya, amalapo aaphwanya woopowa, wira yawereihe nrima atthu a Isarayeli.

¹²Vakhala wira ohiiwelela waYuta woruuha mureerelo mulaponi, wala omora waya oharuuhela mureerelo amalapo nto khunrowa otepa waatta mureerelo aYuta othene yarukunuxa murima.

¹³Vano miyo kinlavula ni nyuwo amalapo. Okhala wira miyo ka murummwa oowaalaleerya amalapo yaawo, nave kinnittittimiha muteko aka,

¹⁴kiphavelaka wawereiha murima atthu a nloko naka, wira akina mwa yaawo yoopowe.

¹⁵Vakhala wira okhoottiwa waya onniruuha waataana w'atthu mulaponi, nto wakheliwa waya enrowa okhala exeeni, khinrowa okhala ekumi eriyari y'alipa-ookhwa?

¹⁶Milipu sareerihiwa mihokorokho sothene ti sooreera, siiso mitathaari sa mwiri sareera, n'iritta saya ti sooreera.

¹⁷Nto vakhala wira Iritta sikina sihiikitthiwa, vano nyuwo mukhanle mwiri wa itthema sa mutakhwani, moolupanyeriwa nipuro naari iritta iye siikitthiwe, nto vano mwiri uwo onnoovahani epwamwaasi aya enrwa mwa mutathaari aya.

¹⁸Nto muhiittottope muthanyaka iritta siikitthiwe. Maana khamuhiyo nyuwo munlyiha mutathaari, nto mutathaari t'unoolyihani nyuwo.

¹⁹Vano nyuwo munoohimya wira: ?Iritta iye siikittheliwe wira miyo kilupanyeriwe nipuro naya.?

²⁰Ekeekhayi wira awo yiikittheliwe mwaha wohiiwelela, nto nyuwo mulipihiwe mwaha wo waamini, vano nyuwo muhiittottope mwaha wa yeeyo, mooveke.

²¹Maana Muluku ohaalevelenle aYuta akhanle iritta s'ephattu, owo khanrowa wolevelelani nyuwo mukhanle iritta soolupanyeriwa.

²²Vano musuweleke wira Muluku t'oreera murima, ni t'owoopiha murima: Owo t'owoopiha murima w'ale yahaamwiiwelela, vano t'oreera murima w'ale animwaamini, nave nyuwo mwaahithipelele-ru oreera murima ni nyuwo-tho munimwiikitthiwa.

²³Nto awo yahitthipeleleru okhootta waamini, anoolupanyeriwa-tho ni mwiri wooreera, okhala wira Muluku onniwerya walupanya-tho.

²⁴Vakhala wira nyuwo mwaikitthiwe vamwirini wa itthema sa mutakhwani s'ephattu, khulupanyeriwa vamwirini wooreera wa olivera, khavanrowa otepa olupanyeriwa vamwirini vaavo nyuwo mukhanle iritta sa itthema s'ephattu?

²⁵Axinn'aka, miyo nkintthuna wira nyuwo muhisuwele esiir'ila, wira nyuwo muhiisoone okhala atthu oosuwela. Maana wuuma murima wa Isarayeli, ohaaphwanyiha okathi amalapo wookela mmulokoni mwa Muluku.

²⁶Tivo, atthu othene a Isarayeli animoopowa, ntoko silempwaly'aya wira: Onimoorwa akhumaka oSiyoni owo onoomaliha ohiiwelela w'atthu a Yakope.

²⁷Wenno t'unrowa okhala waataana waka kamala okumiha itampi saya.

²⁸Nahimya mwaha w'Ehapari Yooreera awo anikhala awanani mwaha wa nyuwo; nto nahimya mwaha wothanliwa awo t'ophentiwa mwaha w'axitiithi aya.

²⁹Okhala wira Muluku khanaakha sivahaly'awe nnakhala khaniwoomola ale yathanlaly'awe.

³⁰Siiso, khalayi nyuwo mwaari atthu oohimwiiwelela Muluku, nto vano Muluku ohoomorelani ikharari mwaha w'ohiiwelela waya.

³¹Tivo awo khaiwelenle, wira aphwanye-tho omoreliwa ikharari, weiwo ovahiwanyu.

³²Maana Muluku ohaahiya atthu othene ehiiwelelaka, wira aamorele ikharari othene aya.

³³V'ekeekhayi othaaciri wa Muluku n'ankhili awe n'usuwela wawe ti wuulupale! Khaavo oniwerya otaphulela muupuwelo awe nnakhala osuwela iphiro sawe

³⁴ntoko silempwaly'aya wira: T'ani onwerya osuwela muupuwelo w'Apwiya? Wala ti pani otonko wavaha miruku?

³⁵Hata ti pani opacenrye onvaha yoowo wira Muluku amutthuvele?

³⁶Maana itthu sothene, sipattuxiwe n'Apwiya; yaawo tanikhaliha seiyo nave itthu sothene sipattuxeriwe yaawo. Attittimihiwe yaawo mahiku othene. Amen!