Romans 10

¹Axinn'aka, etthu eniphavel'aka ni murima wothene nave eninvekel'aka Muluku mmavekeloni mw'aka wira yoopowe atthu a Isarayeli.

²Kinnaakhalela onamoona wira awo annikhalela nthiti omuttittimiha Muluku, nto nthiti naya nlo khanihiyo nookhalana akhili.

³Okhala wira awo khansuwela exariya enrwa wa Muluku, ni ephavelaka weettela exariy'aya, annikhootta wiwelela exariya ya Muluku.

⁴Maana Kristu t'ukhanle emalelo ya ikano, wira othene ale animwaamini yoowo ekhalihiwe anaxariya.

⁵Monse oolepa wa mwaha w'exariya enrwa mwa ikano wira: ?Mutthu oneettela ikano, mwa ikano seiyo onoophwanya ekumi.?

⁶Vano exariya enrwa moowaamini ennihimya wira: Muhihimye mmurimani mwanyu wira: T'ani ontthuna owela wirimu, (eyo p'iyo, wira anruuhele Kristu?)

⁷Wala ti pani onrowa okhuruwela mulittini mowiixa? (Eyo p'iyo, wira amukumihe Kristu mw'alipa ookhwa).

⁸Tthiri Soolempwa sinnihimya wira: ?Nsu na Muluku nri vakhiviru vanyu, nri mwaano mw'anyu ni nri mmurimani mw'anyu? eyo p'iyo, nsu noowaamini ninlaley'ahu.

⁹Mwaahimyakaru n'eyano anyu ohoolo w'atthu, wira Yesu ti Pwiya, ni mwaaminikiru mmurimani mwanyu wira Muluku oomuhihimuxa Yes'uwo mwa'alipa ookhwa, nyuwo munimoopowa.

¹⁰Maana mutthu onaamini ni murim'awe onaphwanya exariya, nave onihimya n'eyano awe onaphwanya woopowa.

¹¹Ntoko Soolempwa sinihimy'aya wira: Ole onimwaamini yoowo khanrowa wuuliwa muru.

¹²Siiso khiwaavo ovirikana muYuta ni mmalapo, okhala wira Pwiya mmosaru yoowo, ti Pwiya a atthu othene, ni onnareeriha vanci-ene atthu othene aninvekela.

¹³Maana ?ole onivekela nsina n'Apwiya onimoopowa.?

¹⁴Nto antthuna onvekela sayi ole ahinimwaamini aya? Ni antthuna omwaamini sayi ehilaleeriwe? Vano antthuna olaleeriwa sayi, ehikhanle atthu oowalaleerya?

¹⁵Nto anrowa olaleya sayi, ahirummwale? Ntoko silempwaly'aya wira: ?Ootepexa oreera t'ale anruuha Ehapari yooreera.?

¹⁶Vano kahiyo atthu othene yiiwelenle Ehapari Yooreera. Ntoko Yesaya vahimaly'awe wira: ?Ti pani aaminni Ehapari yalaley'ahu??

¹⁷Siiso waamini onrwa ni wiiwa Ehapari Yooreera, vano ehapari Yoreera eniiwiwa alaleiwaka masu a Apwiya.

¹⁸Vano miyo kinnikoha wira: Awo khayiiwale masu awo? V'ekeekhayi ahiiwa: Nsu n'aya nihiiwanyeya mulaponi mothene, nave moolumo aya, aaphiya mpakha wokiseryani welapo.

¹⁹Kinnikoha-tho wira: Khino Isarayeli khaaiwale oratta-ene? Ahiiwa tthiri, maana opacerya wene Monse oohimya wira: Miyo kinimoowereihani nrima mwaha w'atthu ahirina elapo kinimwaaruma woviruwelani, atthu ahirina ankhili.

²⁰Yesaya onnilipiherya-tho ohimya iiraka: ?Ale yahaakiphavela aakiphwanya miyo kihiisuweliha w'ale yahaakicala.?

²¹Vano mwaha w'atthu a Isarayeli oohimya wira: Nihiku ti nihiku kihaalattulela waamini atthu oohaamini ni oohiiwelela.