Romans 9

¹Mwa nsina na Kristu, kinihimya ekeekhayi, nkinootha; ankhili aka annikikhalela onamoona mwa Erooho Yooreera.

²Murim'aka onnikiriipa vanci-ene; kinnihaawa nihiku ti nihiku vohihiyererya,

³nto miyo mmansaka kaanitthuna otakhalihiwa ni ovalanyihiwa mwa Kristu mwaha wo waphenta axinn'aka, a nloko naka mwa erutthu,

⁴Awo atthu a Isarayeli, yaawo yakhalihaly'awe an'awe, ni yavahaly'awe nttittimiho nawe; nave aataanaly'awe ni yaawo, khwavaha ikano sawe, n'enamuna yomukokhorela veekeekhayi, aavahaka nroromeliho.

⁵Yaawo akhanle axitiithi a khalayi, yaawo ari a nloko na Kristu mwa erutthu, Yoowo ori Muluku mwa itthu sothene, attittimihiwe Muluku mahiku othene. Amen!

⁶Nihuupuwele wira masu a Muluku anoohilaleiwa, tivo kahiyo wira osuulu wothene wa Isarayeli, aIsarayeli.

⁷Nnakhala ale ankhuma mwa osuulu w'Aparahaamu kahiyo wira othene aya t'an'awe, maana Muluku oohimya wira: ?Ale ankhuma mwa osuulu wa Isakhi t'anrowa okhala osuulu anyu.?

⁸Eyo enihimya wira: ?Aana a Muluku kahiyo ale aniyariwa n'erutthu, nto awo aana aniyariwa mwaha wa nroromeliho nawe, yaawo tansuweliwa okhala osuulu w'Aparahaamu.

⁹Vano moolumo a nroromeliho t'ala: ?Kinoovira-tho vaava mwaahiyu okathi yoola, nave Sara onomuyara mwaana mwamulopwana.?

¹⁰Ohiya vo nlelo, aana a Repeka, tiithi aya aari mmosa-ru, Isakhi, tiith'ihu a khalayi.

¹¹Vano aan'awo ehinatthi oyariwa, hata ehinatthi wira etthu yooreera wala yoonanara, wira otthuna wa Muluku okhale womaliheriwa, vohikhala mwaha wa miteko, nto mwaha w'ule owiihanne,

¹²siiso aahihimeeriwa wira: ?Ole muulupale onomurumeela ole mwamukhaani.?

¹³Ntoko silempwaly'aya wira: Kinnimphenta Yakopo nto kinamunyokha Esawu.

¹⁴Vano ninrowa ohimya exeeni? Ninrowa ohimya wira Muluku kharina exariya? Nnaari!

¹⁵Maana Muluku aahimuhimeerya Monse wira: ?Kinomoonela othunku ole ontthun'aka omoonela othunku nave kinoomorela ikharari ole ontthun'aka ommorela ikharari.?

¹⁶Tivo, Muluku khanimoonela othunku mutthu mwaha wootthuna wawe mutth'uwo, nto onimoonela othunku mwaha woomoriwa wawe ikharari.

¹⁷Ti siiso Muluku samuhimeeraly'awe Farawo wira: ?Nto kowoopolani wira kothoonyeryeni owerya waka, wira nsina naka nttittimihiwe mulaponi mothene.?

¹⁸Tivo Muluku onnaamorela ikharari ale anaatthun'awe wamorela nave onniwuumiha murima ale anaatthun'awe owuumiha.

¹⁹Vano akinaku wa nyuwo anookikoha wira: ?Exeeni Muluku nlelo onnivah'awe milattu? Nave ti pani onkhootta otthuna wawe?

²⁰Mulopwana! Nyuwo mw'apani oovaanyihana ni Muluku? Etthu yowuupiwa eniwerya sayi omukoha mulipa-oowuupa wira mukuupenleni siisa??

²¹Nave tho mulipa-oowuupa kharina owerya wo wuupa n'uloko yoowo mmosaru myaapu sooreera ni myaapu soonanara?

²²Muluku aatthunale, anwerya wooniherya onanariwa wawe n'usuweliha owerya wawe; nto ahaavilela vanci-ene ale yaaphwanela oviruweliwa n'upwetexiwa.

²³Muluku ohiira siiso wira anisuwelihe nttittimiho nawe nuulupale, nenlo nakawenly'awe ale amorenly'awe ikharari, yale athanlenly'awe ottittimihiwa okhuma khalayi.

²⁴Yaawo ti Hiyo niitthaniwe ni Muluku, nave kahiyo-tho eriyari y'aYuta paahi, nto eriyari y'amalapo.

²⁵Ntoko Muluku ohimyaly'awe muliivuruni mwa Hoseya wira: ?Kinoowiihana atthu aka ale yahaakhanle atthu aka; nave kinoowiihana mposi aka ale yahaakhanle mposi aka,?

²⁶nave nipuro nenlo naahimeeriw'aya wira: ?Nyuwo khamuhiyo atthu aka, vaavo anohimeeriwa-tho wira: Nyuwo munookhala aana a Muluku a ekumi.?

²⁷Siiso-tho Yesaya oohimya mwaha w'atthu a Isarayeli wira: Enaamwi osuulu wa Isarayeli waantte-ene ntoko mihaava soophareya, atthu vakhaani paahi ahanle tanrowa woopowa.

²⁸Tivo Muluku onoomaliherya oratta-ene ni voowakuveya moolumo awe vathi va.

²⁹Ntoko Yesaya saahimmy'awe khalayi iiraka: Apwiya Muluku oowerya sothene yahaanihiyenrye osuulu ahu, naarowa okhala ntoko siiraneiy'aya oSotoma ni oKomora.

³⁰Nanso, nintthuna ohimya exeeni? Nnihimya wira amalapo yahaaphavela exariya, vano akhalana exariya yeeyo enrwa mwaha wo wamini.

³¹Nto atthu a Isarayeli, yaatthara ikano saatthuna wakhaliha anaxariya, khiyaaphwannye exariy'eyo.

³²Nto exeeni? Okhala wira awo khiyaamini, maana yaaphavela exariya muhina wa miteko saya, tivo awo yaahikwathuliwa ?n'ekwathula yaari ohoolo waya?.

³³toko silemphwly'aya wira: Miyo kinoompweha oSiyoni ekwathula ni nluka nuulupale nnaamoroxa atthu, vano ole onrowa waamini nenlo, khanrowa-tho wuuliwa muru.