Romans 8

¹Vano khiivo ehukhumu enaaphwanya ale ari mwa Yesu Kristu.

²Okhala wira mwa Kristu Yesu, ikano sa Erooho y'ekumi yokoopola mukanoni mwa etampi ni okhwa.

³Maana ele ehinwenry'aya wira ikano, mwaha woohilipalipa w'erutthu, Muluku ohiira, vamurummy'awe mwan'awe, ntoko natampi, wira akhale yoovaha ya mwaha w'etampi, siiso Muluku oohukhumu etampi mweerutthuni mwa mutthu.

⁴Wira hiyo niiwelele voomalela ikano sa xariya sivahiw'ahu, hiyo nihineetta ntoko erutthu sintthun'aya, nto nneetta ntoko Erooho entthun'aya.

⁵Ole aneettela ntoko erutthu sintthun'aya, onuupuwela iye erutthu sintthun'aya, nto ole oneettela ntoko Erooho entthun'aya, onuupuwela iye sintthuna Erooho.

⁶Maana muupuwelo w'erutthu okhwa, vano muupuwelo wa Erooho ekumi ni murettele.

⁷Tivo muupuwelo w'erutthu nwanani a Muluku, okhala wira khoniiwelela ikano sa Muluku, hata khoniwerya wira.

⁸Ale aneettihiwa n'erutthu, khanwerya omusiveliha Muluku.

⁹Vano nyuwo khamuneettihiwa n'erutthu, nto munettihiwa ni Erooho ya Muluku, vakhala wira Erooho eyo enikhala mwa nyuwo. Nto akhala mutthu ohirina Erooho ya Kristu, mutth'uwo kahiyo a Kristu.

¹⁰Vano Kristu akhala mwa nyuwo, erutthu anyu ehookhwa mwaha w'etampi, nave Erooho eri ekumi mwaha w'exariya.

¹¹Nave vakhala wira Erooho awe ole omuhihimunxe Yesu mookhwaani enikhala mwa nyuwo, yoowo-tho omuhihimunxe Kristu mookhwaani, onoovaha ekumi irutthu sanyu sinkhwa, mwaha wa Erooho awe, y'eyo enikhala mwa nyuwo.

¹²Tivo, axinn'aka, muteko onrummw'ahu kahiyo otthara itthu s'erutthu, nnakhala weettela sintthun'aya yeeyo.

¹³Vano nyuwo mwaatthara soosivela s'erutthu, munimookhwa, nto mwaxintta miteko iyo s'erutthu mukhaliheriwaka ni Erooho, munookhalana ekumi.

¹⁴Maana othene ale aneettihiwa ni Erooho ya Muluku, t'ana a Muluku.

¹⁵Okhala wira nyuwo khimwaakhenle Erooho onookhalihani ipottha wira mooveke-tho: Nto mwaakhenle Erooho enookhalihani aana, mwa y'eyo ninkhuwelan'ahu niiraka: ?Appa? eyo p'iyo Tiithi.

¹⁶Erooho y'eyo ennilavula muroohoni mwahu, wira n'ana a Muluku.

¹⁷Nakhala wira hiyo n'ana a Muluku, nto n'atthu oohiyeriwa; oohiyeriwa sa Muluku ni oohiyeriwa vamosa ni Kristu. Nave naahaawaka vamosa ni yoowo, nave nnoottittimihiwa vamosa ni yoowo.

¹⁸Kinnikupali wira ohaawa wothene orin'ahu okathi ula, khuhiyo wolikanyihiwa ninttittimiho ninrowa woniheriwa mwa hiyo.

¹⁹Itthu sipattuxiwe sothene sinnilipelela vanci-ene, wooniheriwa w'ana a Muluku.

²⁰Tthiri itthu sipattuxiwe ti sootakhaliwa, kahiyo votthuna waya, nto vootthuna wawe ole iirihale siiso.

²¹Okhala wira itthu soopattuxiwa seiyo-tho sinniroromela wira sinrowa woopoliwa mwaakhalihiwaya ipottha, mwaaphwetexiwaya, wira sikaweliwe otaphuwa ninttittimiho n'ana a Muluku.

²²Noosuwela tthiri wira soopattuxiwa sothene nlelo sinniipulela, sinnoona owereya ntoko muthiyana ayaraka.

²³Vano khasinhaawa itthu iyo paahi: Hata hiyo naxineene, nrokhalana-ru mihokorokho soopacerya sa Erooho, ninniipulela mmurimani mwahu nlipelelaka wira Muluku anikhalihe an'awe, anoopole mwa sootakhala s'erutthu ahu.

²⁴Okhala wira hiyo nihoopoliwa ni nroromelo, nave nroromelo nenlo nnooneya, kahiyo nroromelo. Vano ti pani onroromela ele enoon'awe?

²⁵Vano hiyo naaroromelaka ele ehinoonahu, ninnroromela ni nthiti.

²⁶Siiso-tho, Erooho y'eyo, ennoorwa onikhaliherya hiyo ohilipa-lipa, okhala wira khaninsuwela ovekela ntoko vanreerel'aya. Erooho y'eyo enninivekelela ni moolumo owiipulela ahinwery'ahu ohimya.

²⁷Vano ole ontokonasa mirima, onnisuwela oratta-ene ele entthuna Erooho, okhala wira Erooho ennavekelela atthu ooreera murima, ntoko Muluku sintthun'awe.

²⁸Nto hiyo noosuwela wira Muluku onnivaha itthu sothene wira areerihe ale animphenta, yaawo awihanny'awe vootthuna wawe.

²⁹Maana ale awuupuwenly'awe n'uphenta wawe okhuma wopaceryani, Muluku ohathanla okhuma wopaceryani wira elikaneke ni mwan'awe; siiso wira mwan'awe akhlale mwaana oopacerya eriyari y'axinn'awe anci-ene.

³⁰Vano, ale Muluku athannlaly'awe, oowiihana; ale awiihanny'awe, ohaakhaliha anaxariya; ale yakhalinh'awe anaxariya, ohaavaha nttittimiho.

³¹Nihimye exeeni mwa itthu seiya? Vakhala wira Muluku ori ni hiyo, nto ti pani ontthuna onivirikanya?

³²Yoowo khaamovelenle Mwan'awe, nto oomuleva wira anikhwele hiyo othene, vano onrowa ohinivaha sayi itthu sothene vamosa ni yoowo?

³³Ti pani onrowa waahimyana mulattu ale Muluku aathannlaly'awe? Muluku yoowo t'unaakhaliha anaxariya.

³⁴Ti pani onrowa waalamula? Ti Kristu Yesu okhwiiye, ohiya-tho vo, ohihimunwe mookhwaani, ni ori moono woolopwana wa Muluku, nave-tho onninivekelela hiyo.

³⁵Ti pani onrowa onimwalanyiha ni ophenta wa Kristu? Khino ohaawa, Wala ovela-vela, wala olupatthiwa, wala etala, wala othaaleliwa, wala soowoopiha, wala exoowa?

³⁶Ntoko silempwaly'aya wira: Mwaha wa nyuwo, ninnihaawa mahiku othene. Ninnikhalihiwa ntoko ipwittipwitthi sinrowa ohitiwa.

³⁷Nto mwa itthu sothene iya, hiyo n'atthu ootepa oxintta wavikana akina, mwa y'ole oniphentale.

³⁸Tthiri koosuwelexa wira hata okhwa wala ekumi, nnakhala ankelo wala minepa sootakhala, hata vano nnakhala ohoolo, nnakala owerya n'ikuru sikina,

³⁹nnakhala owerya w'osulu, wala owerya wa vathi, nnakhala itthu sikina mwa itthu sothene sipattuxiwe, khiivo enrowa onimwalanyiha ni ophenta wa Muluku ori mwa Kristu Yesu Pwiy'ahu.