Romans 7

¹Axinn'aka khamunsuwela wira (miyo kinlavula n'atthu ansuwela ikano), khamunsuwela wira ikano iyo sookhalana owerya womuruma mutthu okathi wothene owo onikhal'awe mukumi?

²Vanlikana ni muthiyana ootheliwa: Owo onnivareliwa n'ikano wira akhaleke n'iy'awe, owo anari mukumi. Nto iy'awe akhwa vale, muthiyan'owo onnitaphuliwa mukanoni mootheliwa.

³Tivo, atheliwa ni mulopwana mukina, iy'awe akhanle-ene mukumi, owo onkhala namararuwa. Vano iy'awe akhwa onnitaphuliwa mukanoni mootheliwa, siiso khanikhala namararuwa, hata owo atheliwaka ni mulopwana mukina.

⁴Tivo axinn'aka nyuwo-tho muhookhwa mwa ikano muhina w'erutthu ya Kristu yoowo ohihimunwe mookhwaani, wira mwiimeke mihokorokho wa Muluku.

⁵Okathi neettel'ahu s'oosivela s'erutthu, minkhela s'etampi, sinrwa mwa ikano, saanivara muteko mweerutthuni mwahu wira hiyo nikhalaneke mihikorokho siniruuha okhwa.

⁶Nto vano nootaphuliwa mukanoni, okhala wira itthu saaniwerya soonikhwelela. Siiso, vano ninniwerya omurumeela Muluku ni makhalelo a naanaano a muroohoni, nave nihirumeelaka makhalelo oolempwa a khalayi.

⁷Vano nihimyeke exeeni? Nihimyeke wira ikano etampi? Nnaari! Khasihiyo etampi, maana sahaakhanle ikano, miyo nkaasuwela etampi, nave nkaasuwela wira nrima etampi, sahaakhanle ikano ohimya wira: ?Muhikhalele nrima itthu s'aneene.?

⁸Vano etampi yoophwanya mukanoni owerya wokitepiha ophavela itthu sikhoottihiwe. Sahaakhanle-vo ikano, etampi khiyaakhala-tho.

⁹Wahikhala okathi miyo kaakhal'aka vohikano; Nto varwiiy'aya ikano, etampi ehoorwa-tho, nave miyo kihookwa.

¹⁰Siiso kihoona wira ikano saarowa okiruuhela ekumi, sikiruuhenle okhwa.

¹¹Tthiri etampi vaphwanny'aya okathi ovahiw'aya n'ikano, yokoototha, khukiiva mwaha wa ikano seiyo.

¹²V'ekeekhayi, ikano ti sooreera ni yooruma ti yooreera, ti yaxariya ni tisooloka.

¹³Nto nihimyeke wira yoolok'eyo etthu enikiiva? Nnaari, nto wira etampi esuweliwe okhala etampi, yokiruuhela okhwa muhina mw'etthu yaari yooloka, wira mwa ikano seiyo, etampi ekhale etthu yotepa otakhala.

¹⁴Noosuwela wira ikano ti muroohoni, vano miyo nkihiyo a muroohoni, miyo ka mutthu ootumihiwe ntoko epottha y'etampi.

¹⁵Vano nkinsuwela kiniir'aka, maama nkiniira ele entthun'aka, nto ele ehintthun'aka kiniir'aka.

¹⁶Nto, kiiraka ele ehintthun'aka, kinnikupali ikano iyo wira ti soreera.

¹⁷Siiso, nkihiyo miyo mmansaka kiniira, nto etampi enikhala mwa miyo tiniira.

¹⁸Miyo koosuwela wira mweerutthuni mwaka khiivo yoloka, okhala wira kinniphavela wira yooloka nto nkinwerya wira yeeyo.

¹⁹Tivo miyo nkiniira ele yooloka yaatthun'aka wira, nto yoonanara yahaatthun'aka wira, kiniir'aka.

²⁰Vano, miyo kiiraka ele ehintthun'aka, okhala wira nkihiyo miyo kiniira, etampi enkhala mwa miyo tiniira.

²¹Tthiri kinniphwanya mwa miyo yoruma ela: Kaaphavelaka wira yooreera, yoonanara tiniir'aka.

²²Mmirimani mw'aka onkisivela weettela ikano sa Muluku,

²³nto kinnoona ikano sikina sivaraka muteko mweerutthuni mwaka, sivirikanyaka ikano sa muupuwelo aka, sikikhalihaka ipottha sa ikano s'etampi, sinvara muteko mweerutthuni mwaka.

²⁴Masikhini ntoko miyo! Taani ontthuna wakiha erutthu ya okhwa nno?

²⁵Attottopeliwe Muluku mwa Yesu Kristu, Pwiy'ahu, okhala wira miyo mmansaka, kinnuupuwela wira miyo k'epottha sa ikano sa Muluku, vano nto mweerutthuni k'epottha sa ikano s'etampi.