Romans 6

¹Vano nihimyeke exeeni? Nikhaleleke nthiti etampi, wira mahala a Muluku yincerereyeke?

²Nnaari! Hiyo nihookhwa mutampini; nto ninrowa okhalaka sayi nlelo mutampini?

³Wala nyuwo Khamunsuwela wira othene ahu nipatisiwe mwa Kristu Yesu, nipatisiwe mookhwaani mwawe?

⁴Nipatisiwaka mookhwaani mwawe, noovithiwa vamosa ni Kristu, wira ntoko Kristu vahihimuxiwawe mookhwaani n'uwerya wa nttittimiho n'Atiithi, siiso ni hiyo-tho neetteke mwekumini ya naanaano.

⁵Vakhala wira hiyo nihataana ni yoowo, mwa okhwa wawe, veekeekhayi hiyo-tho ninrowa waataana ni yoowo mohihimuwani mwawe.

⁶Noosuwela wira omutthu ahu wa khalayi wookhomeliwa va mwiikimanyo vamosa ni Kristu, wira erutthu y'etampi epwetexiwe, wira nihikhale-tho ipottha s'etampi.

⁷Okhala wira ole okhwiiye vamosa ni Kristu; ohoopoliwa mutampini.

⁸Vakhala wira hiyo nihookhwa vamosa ni Kristu, ninnaamini wira ni hiyo-tho nnookhala vamosa ni yoowo.

⁹Noosuwela wira Kristu vahihimuwaly'awe mookhwaani, owo khanikhwa-tho; okhwa khuninwerya-tho.

¹⁰Maana Kristu, okhwenle mwaha wa itampi, emaara emosa paahi. Vano ekumi enikhalawe owo onimukhalela Muluku.

¹¹Siiso-tho nyuwo mwiisuupuweleke wira muhookhwa mwaha w'etampi, nto mwaakhalaka, munkhala mwaha wa Muluku, mwa Yesu Kristu.

¹²Tivo, muhihiye etampi yeettihaka erutthu anyu enrowa okhwa, ehokhanyererihekeni wira itthu sinsiveliwa n'erutthu.

¹³Muhihiye hat'etthu y'erutthu anyu erumeelaka etampi, ntoko itthu sinrumeela etampi. Nto mwiivahereryeke mmansinyu wa Muluku ntoko atthu akumihiwe mookhwaani, khurowaniwa w'ekumini, nave nvahereryeke wa khula epantte y'erutthu anyu wa Muluku, ntoko itthu sa exariya.

¹⁴Etampi ehooweryekeni-tho, okhala wira khamunikhalela ikano; nyuwo munikhalela mahala a Muluku.

¹⁵Vano niihimyeke exeeni? Niireke etampi mwaha woheettela ikano, nave ni mwaha wo weettela mahala? Nnaari!

¹⁶Nyuwo khamunsuwela wira okathi muniivahereryanyu omwiiwelela mutthu, munikhala ipottha sa mutthu yoowo onimwiiwelelanyu: Hata mukhalaka ipottha s'etampi yeeyo eniruuha okhwa, wala ipottha sowiiwelela weiwo oniruuha exariya?

¹⁷Vano, ninnimuxukhuru Muluku okhala wira khalayi nyuwo mwaari ipottha s'etampi, nto vano muhiiwelela ni murim'anyu wothene mwiixuttiho yoowo ovahiwanyu.

¹⁸Nyuwo muhaakiheriwa etampi, khukhalihiwa ipottha sa exariya.

¹⁹Kinlavula ntoko sinlavul'aya atthu, okhala wira erutthu anyu ti yohilipalipa, vano, ntoko siisale nyuwo mwaavaherenry'anyu ipantte s'erutthu anyu wira sikhale ipottha s'etampi, siiso-tho nvahereryeke ipantte seiyo wira sikhale ipottha y'exariya, yeeyo eniruuha ooreera murima voomalela

²⁰Vaary'anyu ipottha s'etampi, khamwarumeela exariya.

²¹Nto mwaaphwannyeni okathi uwo mwiiranyu itthu siniwuulihani muru mpakha olelo va? Itthu iyo simmalela wookhwaani.

²²Nto vano mwaakiheriwaanyu etampi, mokhalihiwa ipottha sa Muluku, mireerelo siniphwany'anyu sinniruuha oreera murima woomalela, nave ommalela wekumini ehinimala.

²³Nlivelo na etampi, okhwa, vano nto yoovaha ya mahala a Muluku ekumi ehinimala mwa Kristu Yesu, Pwiy'ahu.