Romans 5

¹Siiso, nikhalihiw'ahu anaxariya mwaha wo oowaamini, nookhalana murettele ni Muluku mw'Apwiy'ahu Yesu Kristu.

²Mwa yoowo hiyo noophwanya mahala yaawo anlipan'ahu muhina wo waamini, nave ninnitteeliwa murima mwaha wa nroromelo nri munttittimihoni mwa Muluku.

³Ohiya vo, nlelo ninnitteeliwa murima mwaha w'ohaawa wahu, maana noosuwela wira ohaawa onniphwanyiha nthiti,

⁴ni wira nthiti ninniphwanyiha wiilipiha, vano wiilipiha onnivaha ororomela.

⁵Ororomela nno khunoototha, okhala wira Muluku oomwarexela mmurimani mwahu ophenta wawe mwa Erooho Yooreera enivahaly'awe.

⁶Okathi waary'ahu nlelo oohilipalipa, Yesu Kristu ohaakhwela atthu ootakhala murima okathi woophwanelela.

⁷Orikarika omphwanya mutthu oniileva wira amukhwele mukhw'awe a xariya, hata mutthu ooreera murima aivahereryaka omukhwela mukhw'awe.

⁸Nto Muluku onooniherya oniphenta w'awe, maana okathi wiir'ahu nlelo nri anatampi, Kristu oonikhwela hiyo.

⁹Okhala wira hiyo nookhalihiwa anaxariya mw'ephome awe, nto vootepa-tho vano, mwa yoowo onrowa onoopola oviruwa wa Muluku!

¹⁰Okathi w'ary'ahu awanani a Muluku, owo oonaataaniha ni yoowo, mwaha w'okhwa wa mwan'awe. Vootepa-tho vano vataanihiw'ahu ni Muluku, ninrowa woopoliwa mwa ekumi ya Kristu.

¹¹Nto kahiyo yeeyo-ru paahi, nave-tho hiyo ninnimutthapela Muluku mwa Yesu Kristu Pwiy'ahu, yoowo onaataaninhe ni Muluku.

¹²Mutthu mmosa paahi t'oruuhale etampi mulumwenkuni, etamp'iyo yoruuha okhwa. Siiso okhwa ohaaphwanya atthu othene, okhala wira atthu othene aakhalana itampi.

¹³Sihinatthi okhala ikano etampi yiira ekhanle-ene mulaponi, nto etampi kherina owerya sihikhanle ikano.

¹⁴Nave-tho, okhuma Atamu mpakha Monse, okhwa wahaawerya atthu othene; hata ale yahaarina etampi mwaha wohiiwelela ikano ntoko n'Atamu, yoowo okhanle ethoonyeryo y'ole atthuna orwa.

¹⁵Siiso, mahala khanlikana n'itampi; nto vakhala wira etampi ya mutthu mmosa, ahookhwa atthu anci-ene, nto aatepa-tho mahala a Muluku ni yoovaha ya mahala ya mutthu mmosa, Yesu Kristu wavaha-tho atthu anci-ene.

¹⁶Nave yoovaha ya Muluku khenlikana n'etampi ya mutthu mmosa; okhala wira ophukiwa w'etampi ya mutthu mmosa yookumiherya mulattu mulaponi, nto vano itampi sirookhala-ru sinci-ene, mahala annaphwanyiha atthu exariya.

¹⁷Mwaha w'etampi ya mutthu mmosa paahi yooruuha okhwa, aatepa-tho ale anaakhela voowatta mahala ni yoovaha ya xariya, awo anookhala mw'ekumini mwaha wa mutthu mmosa paahi, okhanle Yesu Kristu.

¹⁸Siisale etampi ya mutthu mmosa paahi yaaphwanyihaly'aya ehukhumu atthu othene, siiso-tho muteko mmosa paahi wa xariya ohaaphwanyiha atthu mahala atthu othene, yaawo anaavaha ekumi atthu othene.

¹⁹Maana ntoko ohiiwelela wa mutthu mmosa, atthu anci-ene aakhalihiwa anatampi, siiso-tho mwaha wo wiiwelela wa mutthu mmosa paahi, atthu anci-ene anookhalihiwa anaxariya.

²⁰Nave ikano sihincereriwa wira itampi sincerereyeke, nto, vaavo vanincererey'aya itampi, mahala a Muluku anootepa wuncerereya.

²¹Nto siisaale, etampi yoonihenry'aya owerya mukhwani, siiso-tho mahala a Muluku akhalaneke owerya mwa xariya wira anivahe ekumi mwa Yesu Kristu, Pwiy'ahu.