Romans 4

¹Nihimye exeeni sa muhatiith'ihu Aparahaamu mwa erutthu? Exeeni ephwanyalyawe ni miteko sawe?

²Maana vaari wira Aparahaamu aakhalihiwe naxariya mwaha wa miteko sawe, anwerya wiittottopa. Nto khaawera wiittottopa vamaithoni va Muluku.

³Nto Soolempwa sa Muluku sinihimya-ni? Aparahaamu aahimwaamini Muluku, ti vo, Muluku aamukhalihaly'awe naxariya.

⁴Tthiri, ole onivara muteko onnaakhela musurukhu musurukh'uwo kahiyo woovahiwa, okhala wira nliveryo n'awe wa muteko ovanry'awe.

⁵Vano ole ohinvara muteko, nto khiyamwaamini ole onaavaha exariya anatampi, mwaha wo waamini wawe onnikhalihiwa naxariya.

⁶Hata Taviti onnimuhimya ooreeriwa mutth'ule Muluku onimukhalihawe naxariya, voohikhala miteko sawe.

⁷Ooreeriwa t'ale aleveleliwe itampi s'aya, ale sittipihiwe itampi s'aya sothene!

⁸Ooreeriwa t'ule Apwiya ahinimuhimy'aya itampi s'awe.

⁹Vano oreeriwa nno ti w'atthu oolyihiwa masoma paahi wala ti w'atthu-tho oohilyihiwa masoma? Noohimya naanaano va wira: ?Muluku oomukhaliha Aparahaamu naxariya mwaha wo waamini wawe.?

¹⁰Nave okathi xeeni Aparahaamu okhalihiwaawe naxariya? Iira Aparahaamu alyihiwe-ene masoma wala ahinatthi olyihiwa masoma? Kahiyo alyihiwe-ene masoma, nto ahinatthi olyihiwa masoma.

¹¹Nto owo ohaakhela ethoonyeryo yoolyihiwa masoma, wira ekhale ekanyeryo ya xariya mwaha wo waamini, weiwo waarinaawe khalayi ahinatthi olyihiwa masoma; wira akhale tiithi a atthu othene anaamini, naari ahilyihiwe masoma, wira n'awo-tho akhalihiwe anaxariya.

¹²Siiso-tho owo tiithi a atthu oolyihiwa masoma, nave kahiyo oolyihiwa-ru masoma, nto n'ale antthara ephiro yoowaamini y'eyo tiith'ihu Aparahaamu yaattharaawe khalayi ahinatthi olyihiwa masoma.

¹³Aparahaamu n'osuulu awe khiyaaroromelihiwe okhala mulipa oohalana olumwenku, mwaha wo weettela ikano, nto owo aaroromelihiwe mwaha wokhalana exariya yeeyo enrwa muhina wo waamini.

¹⁴V'ekeekhayi, vaakhanle wira ale aniiwelela ikano tanrowa okhala alipa oohalana olumwenku, waamini waarowa okhala ethiru nto nroromeliho na Muluku khinaarowa okhalana efaita.

¹⁵Okhala wira ikano sinniruuha oviruwa wa Muluku, vano nto vahikhanle ikano, khiwaavo ohiiwelela.

¹⁶Tivo, nroromeliho ninrwa mwaha wo waamini, wira nikhale mwaha wa mahala, ni wira nroromeliho nlo nikhale nlipiheryo na osuulu w'Aparahaamu, kahiyo ale paahi antthara ikano, nto n'aale-tho othene aneettela waamini ntoko Aparahaamu, yoowo okhanle tiith'ihu hiyo othene.

¹⁷Ntoko silempwaly'aya wira: ?Kihookhalihani tiithi a maloko manci-ene.? Aparahaamu owo, tiith'ihu vamaithoni va Muluku, yoowo omwaaminny'awe, onaavaha ekumi ale akhwiye ni onikhaliha itthu sahaakhanle.

¹⁸Aparahaamu, aroromelaka itthu sahaaphwanelawe ororomela, ahaamini, ni siiso aahikhala tiithi a maloko manci-ene, ntoko sahimeeriwawe wira: ?Osuulu anyu onrowa waatta siisa.?

¹⁹Aparahaamu vaasuwenly'awe wira ahuuluvala maana aarina iyaakha saattamela miloko muloko (100), ni wira Sara mwar'awe khaayara-tho okhala wira n'uwo ahuuluvala, waamini w'awe khiwaavukun'we,

²⁰ni khaahovenrye, khaahiyale waamini nroromeliho na Muluku; nto aahilipihirya ni waamini w'awe amuttittimihaka yoowo.

²¹Nave owo aanisuwelexa wira Muluku aahikhalana owerya womaliherya yamuroromelihaly'awe.

²²Tivo, mwaha wo waamini wawe Muluku t'omukhalihaly'awe naxariya.

²³Vano moolumo ala oowiira: ?Muluku t'omukhalihaly'awe naxariya?, khalempwe mwaha w'Aparahaamu paahi.

²⁴Alepeliwe-tho mwaha wa hiyo, tthiri hiyo-tho ninrowa okhalihiwa anaxariya, okhala wira ninnimwaamini Muluku omuhihimuxale mookhwaani Yesu Kristu Pwiy'ahu

²⁵Owo oovahereriwa wookhwani mwaha wa itampi s'ahu, oohihimuxiwa wira anikhalihe anaxariya.