Romans 3

¹Vano mutthu akhala mu Yuta oniphwanyani? Olyihiwa masoma efait'aya t'ivi?

²Wookhalana ifaita sinci-ene, opacerya, Muluku ohaahiyerya aYuta moolumo awe.

³Vano, vakhala wira akina a yaawo khayaamini, varini-vo? Khino ohaamini waya onnihiiha ororomeleya wa Muluku?

⁴Nnari! Hata Muluku akhalaka a ekekhayi, nto atthu othene akhalaka owootha, ntoko silempwaly'aya wira: Mooniherye ni moolumo anyu, okhala naxariya; wira muxintte mwaalamuliwaka, mukhale oohittheka

⁵Vakhala wira otakhala wahu murima onooniherya exariya ya Muluku, nto nintthuna ohimya exeeni? Nintthuna ohimya wira Muluku t'ohixariya, maana onninihukhumu? (Kinlavula ntoko sinlavulaaya atthu).

⁶V'ekeekhayi nnaari! Muluku ahaakhanle naxariya, owo aarowa olamula sayi olumwenku?

⁷Masi, vakhala wira wootha waka ontthoonyerya ekeekhayi ya Muluku, wa nttittimiho nawe yoowo, vano, kinlamuleliwa-ni nlelo okhala natampi?

⁸Nave okhala wira khanihimmye ntoko sinihimy'aya atthu akina vowothererya vanihimy'aya wira: Awo aniira sootakhala wira aphwanye sooreera? Ohukhummwa waya ti wa xariya.

⁹Vano nintthuna ohimya-ni? Hiyo ti nireeranxe murima waavikana akina? Nnaakhala vakhaani! Miyo koohimya wira atthu othene, aYuta n'amalapo anatampi.

¹⁰Ntoko sinihimyaya Soolempwa sa Muluku wira: Khaavo naxariya, nnakhala mmosa.

¹¹Khaavo onisuwela, khaavo animukokhorela Muluku.

¹²Atthu othene aahiya ephiro yooreera, othene aya khuhisoonela vatthu. Khaavo oniira yooreera. Nnakhala mutthu mmosa mano.

¹³Mmilo aya mahiye owuuhuliwa, ni nlumi n'aya, annihimya soowootha. Moolumo a mwaano mwaya isenye s'evili.

¹⁴Mwaano mwaya moosareya okhwiri ni sootakhala sothene.

¹⁵Awo annakuvela orowa, omwarexa ephome.

¹⁶Munviraya mothene muri-mo ohonona n'ehasara;

¹⁷Awo khansuwela ephiro ya murettele.

¹⁸Va maithoni vaya Khanimoova Muluku.

¹⁹Vano hiyo noosuwela wira sothene sinihimy'aya ikano, sinaahimeerya ale aneettela ikano, wira atthu othene emaaleke nave olumwenku wothene w'ottheka vamaithini va Muluku.

²⁰Tivo khaavo onkhalihiwa naxariya vamaithoni va Muluku mwaha wo weettela ikano, maana mwa ikano iyo, sinimusuweliha mutthu okhala natampi.

²¹Nto vano voohikhala ikano sa Monse, ehooneya exariya ya Muluku, y'eyo maprofeta ni ikano ekhalenly'aya onamoona;

²²exariya ya Muluku eyo, enrwa muhina womwaamini Yesu Kristu, w'atthu othene ni mw'atthu othene ale anaamini, ahimutthanlaka mutthu.

²³Maana atthu othene anatampi ni anniphavela nttittimiho na Muluku.

²⁴Atthu annikhalihiwa anaxariya vamahala-ene, mwa mahala a Muluku, mwaha wo woopoliwa ni Kristu Yesu.

²⁵Yoowo Muluku omutthanlaly'awe wira ephome awe ekhale mukuttho woottipiha itampi s'atthu animwaamini, ni wira ooniherye exariya awe, mwaha wooreera wawe murima, maana khalayi owo aahivilela khuhaahukhumu atthu mwaha wa itampi s'aya.

²⁶Owo ohiira siiso, wira ooniherye exariya awe okathi ula wa vano, ni wira akhale naxariya, yoowo onaavaha exariya ale animwaamini Yesu.

²⁷Vano nto siisa, ninniwerya wiittottopa? Nnakhala! Nihinweryela mwaha wa ikano? Wala mwaha wa soowira sahu? Nnaari: Nto mwaha w'ekano yoowaamini.

²⁸Tthiri ninnoona wira mutthu onaakheliwa ni Muluku mwaha wo waamini, kahiyo mwaha wo weettela ikano.

²⁹Niireke Muluku t'aYuta paahi? Nnaari, wala owo-tho t'amalapo? Ayo, nave-tho owo t'amalapo.

³⁰Okhala wira Muluku ori mmosa-ru paahi, yoowo onaavaha exariya ale alyiiye masoma n'ale ahilyiiye masoma, muhina mwo waamini.

³¹Vano mwaha wo waamini, hiyo ninnikhootta ikano? Nnaari! Khanimmaliha, nto ninnilipiha ikano iyo.