Romans 2

¹Tivo, nyuwo munaalamula akhw'inyu hata mukhale pani khamunleveleliwa, tthiri mwaalamulaka akhw'inyu muniilamula mmansinyu. Maana nyuwo-tho munniira itthu seiyo siniiraaya ale analamulaanyu.

²Vano hiyo noosuwela wira olamula wa Muluku ti waxaria, aalamulaka ale aniira itthu seiyo.

³Nyuwo munaalamula akhw'inyu aniira sootakhala, ni nyuwo-tho mwiiraka seiyo; nto munuupuwela wira munootthyawa olamuliwa ni Muluku?

⁴Wala nyu munithanya oreera wawe murima wuulupale, n'uvilela wawe, n'uleva wawe, muhisuwelaka wira oreera wawe murima Muluku oniwooniheryani orukunuxa murim'anyu?

⁵Nto mwaha woolipa wanyu murima ni wohitthuna wanyu orukunuxa murima, munootepa wuncererya ehukhumu enrowaanyu ophwanya, nihiku Muluku ninrowawe wooniherya olamula wawe w'exariya.

⁶Owo onoomutthuvela khula mutthu ntoko simphwanelawe ni miteko sawe.

⁷Ale anikhalela nthiti ovara miteko sooreera, ephavelaka nttittimiho n'uvuwa, n'erutthu ehinikhwa, Owo onimwaavaha ekumi ehinimala.

⁸Vano Muluku onimwaaviruwela ale aneettela sootakhala aniiphavelela itthu sooreera paahi ni ahiniiwelela ekeekhayi.

⁹Anrowa ohaawa n'uxanka atthu othene aniira sootakhala: Opacerya aYuta, nave-tho amalapo;

¹⁰onimwaavaha nttittimiho, n'ovuwa ni murettele, ale aniira sooreera; opacerya aYuta nave-tho amalapo.

¹¹Maana Muluku khanimuthanya mutthu.

¹²Othene ale yiinre etampi ehisuwelaka ikano anoopweteya vohikano, vano othene ale aniira itampi asuwelaka ikano anoolamuliwa n'ikano seiya.

¹³Okhala wira vamaithoni va Muluku atthu aniiwa ikano paahi kahiyo anaxariya nto anikhalihiwa anaxariya t'ale aneettela ikano iyo.

¹⁴Amalapo ahinsuwela ikano, yeettelaka soreera ntoko sinuupuwelaya murim'aya, ankhili aya t'ikano saya, enamwi ehikhalanne ikano.

¹⁵Mweettelo aya onnithoonyiherya wira itthu sinruma ikano, silempwale mmurimani mwaya. Ankhili aya ti namoona aya: Awo muupuwelo aya onniwaakiha wala onnaahimeerya yattheka.

¹⁶Itthu iya sinrowa wooneya nihiku Muluku onrowawe olamula mwa Kristu Yesu itthu sothene sivithiwe mmurimani mwa mutthu, Ntoko enihimy'aya Ehapari Yooreera kinlaleyaka.

¹⁷Vano nyuwo muniihimya okhala muYuta, mulipanaka Ikano sa Monse nave munniittottopa mwaha wa Muluku;

¹⁸ni munisuwela otthuna wawe n'uthanla itthu sooreera mwiixuttihiwaka n'ikano.

¹⁹Ni munuupuwela wira mwa muhooleli a alipa oohoona, ni mwa muthuko onaamwaleela ale ari mweepiphini,

²⁰ni mwa mwiixuttihi a atthu ahinsuwel'etthu ni mwiixuttihi a axinamwane, okhala wira mookhalana mukanoni enamuna ya osuwela ni ya ekeekhayi;

²¹Nto nyuwo muniwiixuttiha akhw'inyu, xeeni muhisixuttihaka mmansinyu? Nyuwo munalaleerya akhw'inyu wira muhiiyeke, nto muniiyeryani?

²²Nyuwo munaahimerya akhw'inyu wira ehiraruweke, nto nyuwo munraruwelani? Nyuwo munthanya ilatarato s'amuluku a ethiru, nto nyuwo muniiyeryani itthu sinvahiwa amuluku awo mpaani mwaya?

²³Nyuwo muniittottopa osuwela ikano, nto muninveeheryani Muluku muhiiwelelaka sinihimy'aya ikano iyo?

²⁴Tivo, ntoko silempwaly'aya wira: ?Mwaha wa nyuwo nsina na Muluku ninniveehiwa n'amalapo?

²⁵Olyihiwa masoma etthu yoorera mwiiwelelaka-ru ikano sinihimyaya, nto mwahiiwelele ikano, onlikana n'ohilyihiwa masoma.

²⁶Nto ole oohilyihiwa masoma aiwelelaka sooruma sa ikano, owo khanikhalihiwa ntoko atthu oolya masoma?

²⁷Siiso ole oohilyihiwe masoma mweerutthuni mwawe, nto aiwelelaka sooruma sa ikano onimoolamulani nyuwo muhiniiwelela, murina ikano soolempwa ni mulyihiwe masoma.

²⁸Okhala wira mutthu khanikhala muYuta mwaha wo wooneya ota-ru pahi, hata khanikhala oolyihiwa masoma y'ole olyihiwe masoma mw'erutthunipaahi.

²⁹Muyuta t'ule onooneya mmurimani mwawe; ni olyihiwa masoma t'iwe onooneya mmurimani, muhina wa muroohoni ohiya wa ikano soolempwa. MuYut'owo ottottopeliwa wawe khunrwa w'atthu, onrwa wa Muluku.