Romans 1

¹Paulo, epottha ya Yesu Kristu, iihaniwe okhala murummwa, ovalaanyiwe mwaha w'Ehapari Yooreera ya Muluku,

²yoowo khalayi aaroromelihiwe ni maprofeta a Muluku muhina mwa Soolempwa sawe,

³Sa mwaha wa Mwan'awe, yoowo mwa erutthu, oyariwe n'osuulu wa Taviti,

⁴pwiy'ahu Yesu Kristu ohiihaniwa Mwaana a Muluku n'uwerya, mwaha w'erooho enireeriha vahihimuxiwawe mookhwaani.

⁵Mwa yoowo ti naakhenly'ahu mahala ni omurummwa mwaha wowiiwelela nsina nawe wira nikhalane wiiwelela weiwo onrwa ni waamini, eriyari y'amalapo othene.

⁶Eriyari y'atthu yaawo, ni nyuwo-tho muhihaniwa wira mukhale atthu a Yesu Kristu.

⁷Nyuwo othene anyu muri oRooma, oophentiwa ni Muluku, muri ooreera murima, wira mahala ni murettele Muluku, Tiith'ihu, ni Pwiy'ahu Yesu Kristu okhale ni nyuwo.

⁸Opacerya wene kinnimuxukhuru Muluku aka, mwa Yesu Kristu, mwaha wa nyuwo othene. Okhala wira waamini w'anyu woovuwa mulaponi mothene.

⁹Maana Muluku ti namoon'aka, yoowo kinimurumeel'aka ni murim'aka wothene, mw'Ehapari Yooreera ya Mwan'awe. Owo onnisuwela veekeekhayi wira miyo kinniwuupuwelani mahiku othene.

¹⁰Okathi p'ukathi onvekelaaka, kinninvekela Muluku wira, owo atthuna vale niphiye nihiku ninweryaaka orwa woxekuryani.

¹¹Maana kinniphavela vanci-ene woowehani, wira koovaheeni soovaha sikina sa muroohoni wira mulipihiwe,

¹²eyo p'iyo, wira miyo ni nyuwo, nilipihaneke mukina nimukhw'awe muhina mwo waamini orin'ahu.

¹³Axinn'aka, muhuupuwele wira miyo nkintthuna orwa wowehani, nnaari, ehaavo etthu enikipisiha mpakha va. Tthiri miyo kaaniphavela wira muteko aka okumihe mihokorokho mwa nyuwo, ntoko sinikumih'aka mwa amalapo.

¹⁴Miyo ka mulipa oolokihiwa n'atthu oosilimu n'ale oohisilimu, atthu oosuwela n'ale oohisuwela.

¹⁵Tivo miyo kintthunaka orwa wolaleeryani Ehapari Yooreera nyuwo muri oRooma.

¹⁶Vano miyo, olaleya Ehapari Yooreera khunikuuliha muru. Maana mwa yeeyo t'uwerya wa Muluku oniwoopola othene ale anaamini, opacerya aYuta mpakha amalapo.

¹⁷Okhala wira muhaparini Yooreera ennooniheriwa Exariya ya Muluku ennooneya, waamini ni waamini. Ntoko valempwaly'aya wira: ?Naxariya onookhalana ekumi mwaha wo waamini.?

¹⁸V'ekeekhayi, oviruwa wa Muluku onikhuma wirimu wakhuruwelaka atthu othene animukhootta, ahineettela exariya ya Muluku, anitthukela ekeekhayi mwa sootakhala saya.

¹⁹Tivo osuwela wa Muluku ti wo wooneya mwa yaawo, okhala wira Muluku owooniherya yaawo.

²⁰Okhala wira makhalelo ahinooneya a Muluku, ni owerya ohinimala, n'oMuluku awe, onnoniheriwa oratta-ene, okhuma wopaceryani woolumwenku, wooniheriwaka mwa itthu Muluku sipattunxawe. Tivo atthu awo khanleveleliwa;

²¹okhala wira, hata emusuwelaka Muluku, khiyaamuttittiminhe nnakhala khiyaamutthapenle ntoko Muluku. Ohiya vo, aathweelela mwa sootthokelela saya soohiloka, ni siiso murim'aya w'elolo wookela mweepiphini.

²²Awo anniisoona okhala asuweli, numala ari-ene alolo,

²³ahaakakhanya nttittimiho na Muluku ohinkwa, elikanyihaka n'ilatarato soopakiwa s'atthu anikhwa, ni s'axipalame n'inama, n'itthu sothene siniipurula vathi.

²⁴Tivo, Muluku Ohavahererya sootthuna s'erutthu, seiyo sanlela murima aya, wira ehittittimiheke erutthu aya ni ya mukhw'aya,

²⁵tthiri awo ahaakakhanya ekeekhayi ya Muluku ni wootha, anakokhorela ni anarumeela itthu sipattuxiwe, emuhiyaka Muluku opattunxe seiyo. Yoowo okhanle oottittimihiwaka mahiku othene. Amen!

²⁶Mwaha wa itthu iya, Muluku ohaavahererya sinasivela murima aya, sowuuliha muru: Siiso, athiyana aya aahiya orupa n'axiiy'aya, khuyiira soonanara sinvirikanya makhalelo a ephattu alimaleliwe.

²⁷Siiso-tho, alopwana aahiya orupa n'athiyana, ntoko makhalelo a ephattu alimaleliwe, khuyasivelana mukina ni mukhw'awe, nave khuyarupihana alopwana-ru mukina ni mukhw'awe. Nto ahaakhela mweerutthuni mwaya ihukhumu saaphwanela mwaha wa itampi saya.

²⁸Nto okhala wira awo aakhootta omusuwela saana Muluku, Owo ohaavahererya murima woonanara, wira yiireke itthu sihimpwanela wiiriwa.

²⁹Mmirimani mwaya moosareya sootakhala sothene: Otakhala murima, milili, wira soonanara, nrima, wiiva, owana, wootha, ololo, olavilavi, wootherya.

³⁰Awo t'owaapa akhw'aya, awanani a Muluku, alipa ooruwana, oowiisona, oowiittottopa, oowiira sootakhala, oohiwiiwelela axitiithi aya;

³¹ahirina miruku, oohiroromeleya, ahinaaphenta akhw'aya, nnakhala ahinaamorela ikharari akhw'aya.

³²Awo enaamwi esuwelaka olamula wa Muluku, wira ale aniira itthu sene seiyo aniphwanela okhwa, hata esuwelaka siiso, annikhalela nnthiti sootakhala seiyo. Ohiya-tho vo, annattottopela ale aniira itthu seiyo.