Acts 28

¹Vano voopowaly'aya, yaahisuwela wira ekisirwa eyo yiihaniwa Malta.

²Atthu yaakhala ekisirwa eyo yaahinaakhela nniphento nuulupale mwaha w'epula yaarupa ni mwaha w'oriirya, awo yaahiseela mooro munci-ene, khuniirela hiyo othene wattamela wira n'ooreke.

³Vano Paulo aahithukumanya ikhuni sinci-ene nto vaarihenly'awe vaikho, yaahikhuma evili yaatthyawa oviha wa mooro, yaahimuluma ntata, khumpharelela

⁴Okathi atthu yahaakhanle a weiwo voonaly'aya enowa eyo empharelenle-ene vantatani vawe, yahihimeeryana wira: Vekeekhayi mulopwana ola mutakhali, okhala wira orimoopowaru mphareya, Exariya khenimutthuniherya okhala.

⁵Nto owo aahitathela vaikho enowa eyo, khuhoona owereya,

⁶nto awo yuupuwela wira owo aamwiipa wala aarowa okhwa naanaanoru. Nto, numala olipelela okathi munci-ene emoonaka ehimukhumelelaka etthu yootakhala yaahuupuwela etthu ekina khupacerya ohimya wira owo muluku.

⁷Wattamela nipuro nlo, saahikhala imatta saari sa mulopwana mmosa iihaniwa Pupliyo aari mukhulupale a ekisirwa eyo, owo aahinaakhela ni mureerelo, khunivaha opuro mpakha mahiku mararu.

⁸Vano atiithi awe Pupliyo owo yaanwereiwa mmurimani. Paulo aahirowa waxekurya nto aahaavekelela awiixatheryaka matata, khwavoniha.

⁹Atthu vaawehaly'aya etthu ila yaakhumelenle, nave-tho y'ahirwa aretta anci-ene a ekisirwa yeeyo khiyavonihiwa,

¹⁰awo yaahinittittimiha vanci-ene, nto okathi w'akelaahu mukalawani, yaahinivaha sothene saanihaleeliha.

¹¹Vaamanly'aya miyeri miraru, naahiwela ekalawa ya wAlexantriya, yeeyo yaavirinhe eyiita vakisirwa, eyo yaahikhalana empeleema yiihaniwa Tiyoxukhuru

¹²vaakhuruwaly'ahu oSirakusa, naahikhala weiwo mahiku mararu,

¹³vaakhumaly'ahu naahivira muxerexere mw'ephareya mpakha ophiya oRexiyo, mmeeloni mwaya yaahoopa epheyo y'okusini nto vaaviraly'aya mahiku manli naahiphiya oPotiyoli.

¹⁴Weiwo naahaaphwanya axinna akina yaawo yaanivekela okhala ni yaawo mahiku mathanu ni manli.

¹⁵Axinna a weiwo vaaiwaly'aya ihaali sahu, yaahirwa okumana ni hiyo mpwaro w'Apio ni wa ilooca tthaaru, Paulo vaawehaly'awe atthu awo, aahimuxukhuru Muluku ni khulipiha murima.

¹⁶Vaaphiyaly'ahu oRooma mukhulupale a anakhotto aahinvahererya mukhulupale a asurutaato atthu yaatthukweliwe, vano Paulo aahimutthuniherya okhala meekhaawe ni Surutaato mmosa oomweettelela.

¹⁷Vaaviraly'aya mahiku mararu, Paulo aahalattula makhulupale a Ayuta, nto vaathukumanne aya aahahimeerya wira: Axinn'aka, miyo nkiiral'etthu enavirikanya atthu ahu wala envirikanya ikano s'axitiith'ihu, kirwiye kitthukiwe-ene, okhuma oYerusalemu, khuvahereriwa mmatatani mw'aRoma;

¹⁸Awo vaakikohaly'aya, yaaphavela okitaphula, mwaha woohikiphwanyana etthu yootakhala yaaphwanela wiveliwa.

¹⁹Nto aYuta khiyaatthunne, kahikhanyererihiwa ovekela orowaniwa wa Kesari, kihikhalanaka etthu yoowahimyana atthu a nloko naka,

²⁰Mwaha yoowo kiwiihanaly'akani wira kooweheeni ni woolavulihani okhala wira mwaha woororomela wa Isarayeli t'uwarenly'aka ikwirint'iya.

²¹Nto awo yaahimwaakhula yiiraka: Hiyo khinaakhenle ipaphelo sookhuma oYuteya ihimyaka mwah'anyu, nnakhala khaavo mmus'ihu a weiwo arwiye wenno wira anleele ihaali wala wira oohimyaneni etthu yootakhala.

²²Vano nimphavela owiiwani sinuupuwel'anyu, maana noosuwela wira etiini ennivaanyiwa mapuro othene.

²³Vano y'ahivaanela nihiku n'othukumana, nihiku nenlo atthu anci-ene yaahirowa okumana n'uwo nipuro naamanky'awe, nto owo aanataphulela n'onamoona wooreera, omwene wa Muluku ni aaniphavela waalakiherya oratta-ene mwaha womwaamini Yesu, muhina wa moolumo a Ikano hata a maprofeta.

²⁴Nto atthu akina yaahikupali moolumo a Paulo, nto akina khiyaatthunne.

²⁵Vano okhala wira yaworu khiyaiwanana, yaahilaxeryana, Paulo aahahimeerya moolumo ala wira: Erooho Yooreera yaahihimya ekekhayi elavulaka n'axitiith'ihu ni moolumo a profeta Yesaya.

²⁶Yaahimaly'aya wira: Murowe w'atthu awo mwaahimeerye wira: Munimwiiwa oratta-ene nto khamunrowa osuwela munoowehexexa oratta-ene nto khamunrowa woona

²⁷Okhala wira atthu awo ahuumiha mirima saya; aattiyena maaru aya Akhuneela maitho aya wira ehoone-tho wira ehoone ni maitho aya hata ni maaru aya ehiiwe, ni wira ehisuwele ni murim'aya wira ehokolowele wa miyo wira kaavonihe.

²⁸Tthiri mukhale oosuwela wira woopola onikhuma wa Muluku onnirowaniwa w'ale ahikhanle aYuta, nave awo animwiiwelela.

²⁹Nto numala olavula moolumo ala, aYuta yaahivenya, evaanyihanaka vanci-ene yaaworu.

³⁰Paulo aahikhala iyaakha piili soomalela, empa yaamanky'awe, owo aaniwaakhela othene yaarowa omuxekurya,

³¹aanilaleya omwene wa Muluku, aanixuttiha s'Apwiya Yesu Kristu n'ikekhayi ni wiilipiha ahikhoottiheriwaka ni mutthu.