Acts 27

¹Okathi vaaiwananiwaya ekwah'ahu yoorowa wItalia, Paulo n'ale yaatthukelaniw'awe yaahivahereriwa mukhulupale a anakhotto a oRooma iihaniwa Xulio.

²Yaahiwela ekalawa ya wAtramiti, nikhuma nrowaka ephareya ya wAsia, Aristarko aarowa ni hiyo, aari a oMasetonia elapo y'oTesalonika.

³Mmeeloni mwaya, naahiphiya oSitoni, nave Xulio aanimukhapelela n'umureerela murima Paulo, aahimutthuniherya orowa waxekurya apatthani awe wira avahiwe saaphavel'awe.

⁴Vaavenyaly'ahu weiwo, naahirowa nikakhelaka epantte enikela epheyo ekisirwa y'Okipero okhala wira epheyo yaamunihuluxa.

⁵Nto vaalapunw'ahu nratta n'oSilisia oPanfilia, naahiphiya oMira muttetthe w'oLisia.

⁶Weiwo mukhulupale a anakhotto aahiphwanya ekalawa emosa ya wAlixantriya, yaarowa wItalia khuniirela opakhira memmo.

⁷Naahiviriha mahiku manci-ene neettaka vakhaani vakhaani, nave naahikhalana mixankiho s'ophiya elapo y'oKinito. Vano mwaha w'epheyo yaarwa ohoolo wahu khanaawerya-tho orowa ekhw'ahu. Tivo, naahirowa epantte y'okusini w'elapo y'oKereta, oluluwana oSalimona.

⁸Siiso naahivira neettaka mphareya n'uvelavela mpakha ophiya nipuro niihaniwa Iphantari Sooreera, wattamela muttetthe w'oLaseya.

⁹Numala oviriha okathi munci-ene woopihaka wetta mphareya, okhala wira mahiku ootthukwa yaahivira, vano Paulo aahaalopola,

¹⁰iiraka: Apatthani kinoona wira ekwaha ela enonuukhula valupale, nave itthu sinci-ene sinrowa ohononeya, kahiyo mirittiru n'ekalawa paahi, hata okumi ahu.

¹¹Vano mukhulupale a anakhotto aanimukupalixa nahota ni mwaneene ekalawa ohiya ele Paulo yaahimy'awe.

¹²Nipuro nlo, okhala wira khinaareerela oviriha eyiita atthu anci-ene yaahoona wira vaaphwanela ovenya-vo, wira yoone yaaweryaka ophiya oFenisi n'uviriha eyiita weiwo, okhala wira yaari ephantari y'oKereta, yeeyo yanooneela eriyari-neriyari yoonikhuma epheyo ni onikela nsuwa.

¹³Yaahikelela woopa epheyo vakhaani-vakhaani ekhumaka okusini awo yahoona wira vamwiraneya ntoko saatthokolel'aya, nto yaahihelela ntthanka khupacerya weetta oxerexere w'ephantari y'ekisirwa y'oKereta.

¹⁴Nto naanaanoru yaahoopa epheyo yuulupale, yiihaniwa Eurakilo, yaakhuma okerekhere y'ekisirwa.

¹⁵Nave ekalawa yaahipuruliwa n'uwali, nihiweryaka ovirikanya epheyo naahihiya epuruliwaka pure.

¹⁶Naahivira oxerexere w'ekisirwa yaamukhaani yiihaniwa Kauta naahiwerya ovara ekalawa yaamukhaani.

¹⁷Nto vaavinyaly'aya anahota yaahiphavela inamuna sootthukelela ekalawa eyo vakalawani yuulupale vano yoovaka orowa ophara vamihaavani v'oLipia, yaahikuruxela mmaasini mwiri wotthitteerya khuhiya ekalawa yeettaka pure.

¹⁸Mmeeloni mwaya epheyo yaahitepa onttikinya n'ikuru, tivo atthu yaahikolomowa orihela miritti mphareya.

¹⁹Nto mmurottoni mwaya hiyo ni matat'ahu, naahirihela mithalelo s'ekalawa mmaasini.

²⁰Vano naahivira mahiku manci-ene nihoonaka nsuwa nnakhala itheneeri nave epheyo yuulupale nlelo yaamutepa, khanaarina nroromelo noowoopowa.

²¹Naahiviriha mahiku manci-ene nihily'aka etthu, nto Paulo aaheemela variyari vaya khwahimeerya wira: Apatthani, nyuwo mwaakikupanli kiir'aka nihivenye-wo oKereta wira nihuluwe wuukhuwa nno n'upweteiwa.

²²Nto vano kinooleelani wira mulipihe murima khaavo a nyuwo onrowa okhwa, ekalawa paahi tinrowa opweteya.

²³Okhala wira ohiyu yoola ookikhumelela munkelo a Muluku kinimurumeel'aka,

²⁴khukihimeerya wira: Paulo muhoove! Muhaana orowa ohoolo wa Kesari, tthiri mwaha wa nyuwo Muluku onimoovahani ekumi y'atthu othene arin'anyu mukalawani.

²⁵Tivo, apatthani mulipihe murima, okhala wira miyo kinnimwaamini Muluku, wira vanimwiiraneya ntoko sihimeeriw'aka.

²⁶Vano hiyo nihaana orowa okhuruwa vakisirwa.

²⁷Nto okathi waaphiyaly'aya ohiyu muloko ni mixexe neettaka pure nipuruleliwaka mphareya ya wAntriya, vano ohiyu eriyari anahota yaahoona wira yaanattamela etthaya.

²⁸Awo vaaphimaly'aya yaahiphwanya wixerya waya imeturu miloko miraru n'ithanu na mosa, ohoolo waya yaahiphima-tho khuphwanya imeturu miloko miili ni imeturu thanu ni piili.

²⁹Nto yoovaka orowa omana maluku, yaahaarihela anamukura axexe ottuli w'ekalawa enalipelela oxa.

³⁰Vano ale yeettiha ekalawa ephavelaka otthyawa-mo yaahikuruxela ekalawa yaamukhaani mphareya, yoothereryaka wira yaaphavela warihela anamukura ohoolo w'ekalawa.

³¹Paulo aahimuhimeerya mukhulupale a anakhotto ni aahahimeerya anakhotto wira: ?Alopwan'ala yakhumaru mukalawani-mu, nyuwo khamurowa owerya woopowa.?

³²Okathi yoowo anakhotto yaahithikila mikhoyi s'ekalawa khuhiya emorelaka mmaasini.

³³Nto ewehereryaka siiso oxa, Paulo aahiwiirela atthu othene wira elye, ahimeeryaka wira: Olelo nihiku na namuloko ni maxexe, nyuwo mulipelelaka mutthunkwe-ene, muhilyaaka etthu.

³⁴Vano kinootumereryani wira mulyeeke, wira mulipihe ekumi anyu. Okhala wira hata ekharari emosa yammuruni mwanyu khenrowa opweteya.

³⁵Ahimyakaru siiso, Paulo aahikuxa mukatthe khureriha, ohoolo w'atthu othene, ni aahimeyanya khuyakhuura.

³⁶Nto vaalipihaly'aya murima, nave-tho othene aya yaahipacerya olya.

³⁷Nave othene ahu naari mukalawani naari atthu imiya piili ni miloko mithanu n'amiili n'atthu athanu namosa.

³⁸Vaavonaly'aya yaahirihela etriku mmaasini wira ekalawa evenye.

³⁹Vaaxiiy'aya khiyaasuwenle elapo yaaphiyaly'aya, nave yaahoona nipuro noohiixa na mphareya khuupuwela osuseriha weiwo ekalawa, ekohanaka wira yeemexeke weiwo ekalawa eyo.

⁴⁰Yahaattukhula anamukura khuhiya ekalawa ekelaka mphareya siiso-tho yaahitaphula mikhoyi s'eleemi yeettiheriwa ekalawa, numala yaaheemexerya ntthanka nuulupale n'opheyoni, eneetta erowaka ophareya.

⁴¹Nto ekalawa eyo y'ahiphiya nipuro n'ari mihaava sinci-ene khuphara vaavo nave epantte y'ohoolo yahiphara ehinattikinyeya, ni epantte y'ottuli yaanihuleya mwaha w'owali wa mawimpi.

⁴²Anakhotto yaahuupuwela wira ewiivakase ale yaatthukweliwe wira ahikhale onrowa otthyawa arapelelaka.

⁴³Nto mukhulupale a anakhotto otthunaka omoopola Paulo, aahaakhoottiherya wira saaphavel'aya, ni aahaaruma ale yaasuwela orapelela wira apacerye otuphela mmaasini, wira yoopowe ephiyaka oxerexere

⁴⁴Nto akina aahaaruma wira elapuweke n'ithaapwa, nave akina elapuweke ni miri s'ekalawa, siiso atthu othene yaahiphiya ota khwoopowa.