Acts 26

¹Numala AKripa aahimuhimeerya Paulo wira: Vano munnitthuniheriwa wisaakiha. Nto Paulo aahittukhulela matat'awe osulu aisaakihaka khwaakhula wira:

²Nyuwo mwene AKripa, miyo kinoona wira olelo kooreeriwa kipaceryaka wisaakiha mwaha wa itthu sothene sootheriw'aka n'aYuta.

³Vanci-enexa miyo vansuwel'aka wira munnisuwela mulimalelo wothene ni myaha siri variyari v'aYuta, tivo kinnoovekelani wira mukiiwe n'upixa murima.

⁴Ayuta othene annisuwela mwettelo aka okhuma omiravo aka, enamuna seettaly'aka okhuma oYerusalemu eriyari y'atthu a nloko naka.

⁵Awo annikisuwela okhuma khalayi tivo vanwery'aya, yatthuna vale ohimya wira miyo kiheettiherya eFarisi kittharihelaka muloko wotepaxa othokorerya etiini ahu.

⁶Vano kiri va kiphukiwaka mwaha woomuroromela natiri yoowo Muluku aamanenly'awe axitiith'ihu.

⁷Yoowo maloko ahu muloko ni manli aninweherer'aya, ahihiyereryaka omurumeela Muluku ohiyu n'uthana anniroromela ophwanya sooreera iyo. Nyuwo mwene mwaha woororomela weiwo aYuta anikihimyan'aya.

⁸Nto munupuwela wira Muluku khanwerya wahihimuxa alipa-ookhwa?

⁹V'ekeekhayi miyo woovirikanya nsina na Yesu, muNasareti, miyo kaahuupuwela wiira itthu sinci-ene.

¹⁰Nave-tho ti yeeyo yiiraly'aka oYerusalemu. Tthiri kaahatthukela mukhatteya atthu ooreera murima anci-ene, n'uwerya waavahiw'aka ni makhulupale a anamukuttho, nave okathi vaalamuliw'aya wiiviwa, miyo kaanaakhulela okhwa waya.

¹¹Nto kaahaxaka imaara sinci-ene, (musinakooka) mpaani mwaya moothukumana mothene, mpakha waakhanyereriha oveeha. Nave kaakhalelaka owali muulupale kaanaalupattha hata mmittettheni mw'amalapo.

¹²Tivo vaavenny'aka kirowaka oTamasiku kirummwaka n'uwerya wa makhulupale a anamukuttho.

¹³Nyuwo mwene, othana eriyari kaahoona mphironi muthuko wa wirimu, yoowo waatutha ovikana waarya wa nsuwa, omwaleela waya waahikirukurerya miyo vamosa n'ale yaakihoola.

¹⁴Nto, othene ahu vaamorenly'ahu vathi, kaahiiwa nsu nimosa nikilavulihaka n'ilavulelo y'eHeperi nihimyaka wira: ?Saulo, Saulo, munikilupatthelani? Munnitepiha mulattu, munvirikanyaka onoottaruxani.

¹⁵Vano miyo kaahikoha kiiraka: Mwa pani nyuwo, Pwiya?? Apwiya yaahikaakhula wira: Miyo ka Yesu, yoowo onimulupatth'anyu.

¹⁶Vano nvenye mweemele oratta-ene, tthiri t'ila kookhumelenly'akani wira kookhaliheni murumeyi ni namoona a itthu soonaly'anyu n'iye sinrow'aka owoniheryani.

¹⁷Kinoowakihani w'aYuta ni w'ale ahikhanle aYuta, vano miyo kinoorumani wa yaawo,

¹⁸wira mwatthukule maitho ni wakumiha mweepiphini, nwoniherye muthuko, mwaakumihe mwepotthani mwa Satana mwaarowanaka wa Muluku, wira awo yaakhele oleveleliwa itampi ni ophwanya opuro w'ale areerihiwe muhina wookamini miyo.

¹⁹Nyuwo mwene AKripa, vaiwaly'aka, miyo nkihiyale wiwelela masu yakhumme wirimu.

²⁰Tthiri kaahipacerya walaleerya atthu a oTamasiku ni oYerusalemu, numala kihalaleerya atthu a elapo yothene y'oYuteya, wokiseryani kihalaleerya ale ahikhanle aYuta wira erukunuxe mirima saya, ehokolowele wa Muluku evaraka miteko sinooniherya orukunuxa murima

²¹Ti yeeyo aYuta akina ekivarenly'aya miyo vaary'aka mpaani mwa Muluku, nave yaahiphavela okiiva.

²²Nto kiphwanyaka wakihiwa ni Muluku, kookhala mpakha olelo kikhalaka onamoona ohoolo w'atthu alupale n'akhaani, khiivo enahimeeryaka ohiya seiye maprofeta ni Monse sihimaly'aya wira sinimwiiraneya,

²³eyo ti wira Kristu aahaana ohaawa ni okhala mutthu oopacerya ohihimuwa mw'alipa-ookhwa wira aalaleerye muthuko atthu ala n'ale ahikhanle aYuta.

²⁴Vaalavunly'awe moolumo awo aisaakihaka, Festo aahinteiha khuhimya akhuwelaka wira: Nyuwo Paulo munkhwa anepa! Osoma vanci-ene ohookhalihani mulolo.

²⁵Paulo aahaakhula wira: Mukhulupale Festo, miyo nkihiyo mulolo! Moolumo ahimaly'aka t'ekeekhayi ni ta miruku.

²⁶Okhala wira mwene AKripa onnisuwela itthu iya, tivo vanlavul'aka ohoolo wawe ni wiilipiha, tthiri kinnikupali wira khiivo etthu ehisuwely'awe, okhala wira khasiriwe wiiphiiini.

²⁷Nyuwo mwene AKripa munnaamini ilivuru sa maprofeta? Miyo koosuwela wira munnaamini.

²⁸Vano AKripa aahimuhimeerya Paulo wira: Vakhaani vakhaani mumphavela okithipeleliha wira mukikhalihe muKristu!

²⁹Paulo aahaakhula iiraka: Siiso Muluku atthuniherya wira, vakhaani wala vanci-ene kahiyo nyuwo paahi, nave-tho ale othene olelo anikiwiriyana, akhale ntoko miyo siry'aka, ohiya ikwirint'iya.

³⁰Vaamanly'awe olavula siiso mwene AKripa aaheemela vamosa ni Kuvernatoro ni Perenisi, hata n'ale yaakilaanthe ni yaawo.

³¹Vaakhumaly'aya-mo yaanilavula mukina ni mukhw'awe, yiiraka: Mulopwan'ola khiivo yiiraly'awe yoophwanelela wiiviwa nnakhala otthukweliwa.

³²Nto AKripa aahimuhimeerya Festo wira: Mulopwan'ola aanwerya otaphuliwa aahaavekenle orowaniwa wa Kesari.