Acts 25

¹Festo vaakenly'awe omwene w'omuttettheni, nuvira mahiku mararu aahikhuma okesareya arowaka oYerusalemu,

²nto naanaanoru aahirwa mukhulupale a anamukuttho ni makhulupale a aYuta ohimya mulattu wa Paulo, khunvekela

³amuxonttelaka wira amuroihe Paulo oYerusalemu, awo yaahiiwanana wira emwiive mphironi.

⁴Vano Festo aahiwaakhula wira Paulo ootthukeliwa oKesareya nave owo voohilekela aamurowa weiwo.

⁵Aahihimya wira ale tthiri ari eriyari anyu arina owerya ekitthareke nave mulopwan'ola yakhala etthu yootakhala yiiraly'awe yamuhimyeke.

⁶Owo khaapinse woovikana mahiku muloko, aahirowa oKesareya, mmeeloni mwaya aahikilaathi omilattuni, khumwiihaniha Paulo.

⁷Owo vaaphiyaly'awe, aYuta yaakhumme oYerusalemu erwaanaka myaha suulupale soomootherya yaahimurukurerya Paulo, khiyaawenrye othoonyerya wira s'ari seekekhayi.

⁸Vano owo aisaakihaka aahihimya wira: Miyo nkitthenk'etthu envirikanya ikano s'aYuta, nnakhala envirikanya empa ya Muluku hata enivirikanya Kesari.

⁹Vano Festo, aphavelaka wasiveliha aYuta, aahimwaakhula Paulo wira: Nyuwo mumphavela orowa oYerusalemu, wira mulattu anyu waphukiwe weiwo ohoolo waka?

¹⁰Nto Paulo aahaakhula wira: Kiri mpwaro mw'aYuta nkiwirinhe etthu yootakhala ntoko musuwenly'anyu oratta-ene.

¹¹Vano, kaatthenke, kiirale etthu yookiphwaneliha wiviwa, miyo nkinkhootta okhwa. Masi yahaakhanle etthu yeekeekhayi mwa sothene sinootheriw'aka ni yaawo, khaavo onwenrya okivahererya mmatatani mwaya, kinvekela orowaniwa wa Kesari.

¹²Nto Festo numala olavula n'anamiruku, aahaakhula wira: Munvekela orowaniwa wa Kesari? Munorowa wa Kesari.

¹³Vaaviraly'aya mahiku vakhaani, mwene AKripa ni Perenisi yaahirwa oKesareya omukhomasa Festo.

¹⁴Nto okhala wira weiwo yaahiviriha mahiku manci-ene, Festo aahimwaalikelela mwene myaha sa Paulo, ahimyaka wira: Ookhala va mulopwana mmosa, Felisi omuhiyaly'awe atthukiwe-ene,

¹⁵kaattittimihaka makhulupale a anamukuttho ni mahumu a aYuta, miyo kirye-ene oYerusalemu yaahirwa ohoolo waka, ekivekelaka wira kimulamule wiviwa.

¹⁶Awo kaahiwaakhula wira aRoma khalimalenle onvahererya mutthu wira aiviwe ahinatthi okumana n'ale amothenrye wira aweryeke wiisaakiha itthu sinootheriw'awe.

¹⁷Tivo, awo yaahirwaasa mmeeloni mwaya, voohipisa, kaahikilaathi omilattuni khuruma wira oruuhiwe mulopwan'owo.

¹⁸Alipa oomootherya vaavenyaly'aya khiyaahimmye itthu sootakhala mwa seiyo saanyihery'aka.

¹⁹Etthu yaarin'aya paahi, yaamuhimyana mwaha w'etiini awe ori mwaha wa Yesu okhwiye yoowo Paulo aamuhimy'awe wira mukumi.

²⁰Miyo nkoona yoowiira mwaha wa mulatt'uwo, nto kaahimukoha Paulo aatthunaka orowa oYerusalemu, wira mulattu awe waphukiwe weiwo.

²¹Nto Paulo aahivekela wira mulattu awe waphukiwe ni mwene Kesar, tivo vaarummy'aka wira asukiweke mpakha onveleeliha wa Kesari.

²²Vano AKripa aahimuhimeerya Kesar wira: Nave-tho miyo waanikisivela omwiiwa mulopwan'owo. Owo aahaakhula wira munomwiiwa meelo.

²³Mmeeloni mwaya vaarwiy'awe AKripa ni Pernisi ninlemeliho nawe nuulupale, yaahikela mpaani mwaaphukiwa milattu vamosa ni makhulupale oophuka milattu ni makhulupale a muttetthe, Festo aahiruma oruuhiwa Paulo.

²⁴Festo khwiira: Mwene Akripa ni nyuwo atthu muri vaava ni hiyo, mmoneke mulopwan'ola yoowo muttitthi wothene w'aYuta okivekenly'aya miyo, oYerusalemu hata wenno ekhuwelaka wira ola khamphwanela-tho okhala.

²⁵Vano miyo kihoona wira ola khiirale etthu yoophwanela wiiviwa, nave-tho okhala wira owo aavekela ophukiwa ni Akusto, tivo kuupuwenly'aka woveleeliheryani.

²⁶Vano wa mwah'awe, nkirina etthu yoosuwanyeya ekhanly'aka yoomulepela Pwiy'aka, tivo miyo kooruhenlyakani ohoolo wanyu, vaalupalexa ohoolo wanyu nyuwo mwene AKripa, wira mmukohe kiphwanye etthu ekhanly'aka yoolepa;

²⁷okhala wira kahiyo etthu yooloka onveleeliha mutthu ootthukweliwa, kihilempe itthu sinihimyaniw'awe.