Acts 24

¹Vaaviraly'aya mahiku mathanu, Ananiya mukhulupale a anamukuttho aahivenya vamosa ni mahumu, ni Tertulo mulipa-oowakiha, awo yaaronwe omuhimya Paulo ohoolo wa Kuvernatoro.

²Nto vaaihaniw'awe, Tertulo aahipacerya omotherya ahimyaka wira:

³Okhala wira mwa nyuwo nookhalana murettele munci-ene, ni mwaha wosuwela wanyu wettiherya, atthu ala annittottopela miteko sanyu, okathi wothene ni mapuro othene, nyuwo ooweryaxa Felisi hiyo nimphavela wosuwelihani-tho n'uxukhuru wahu wothene.

⁴Nto wira nihoopisiheni vanci-ene, kinnoovekelani n'uvilela wanyu wira muniwiriyane okathi vakhaani

⁵Nihoona wira mulopwana ola t'otakhalexa, ni onnikumiherya onyakulihana eriyari y'aYuta othene a olumwenku wothene, yoola t'uri muhooleli a muloko w'atthu a oNasareti.

⁶Ola aahiphavela-tho onanariha empa ya Muluku tivo vanvanry'ahu nto naatthuna omulamula ntoko sinrumaaya ikano.

⁷Okathi mukhulupale a anakhotto Lisia vaaphiyaly'awe aahimukumiha mmatatani mwahu n'uwali wuulupale,

⁸aarumaka ale yaamootherya orwa wa nyuwo nto nyuwo mwamukoha munomwiiwa sothene sinimuhimyan'ahu.

⁹Nave-tho aYuta yaahaakhuleliha yiiraka itthu iyo saahimyaniw'awe saari seiyo tthiri.

¹⁰Kuvernatoro aahimukwata Paulo wira alavule, Paulo aahaakhula iiraka: Tthiri koosuwela wira nyuwo soovira iyaakha sinci-ene mukhalaka mphuki a munlokoni mwahu, nuulipiherya waka wuulupale miyo kiniisaakiha ohoolo wanyu.

¹¹Tthiri nyuwo munowerya osuwela oratta-ene wira khavikanne mahiku muloko ni manli vaphiyalya'aka oYerusalemu wira kimukokhorele Muluku,

¹²Khaavo okiphwannye mpaani mwa Muluku kilavulaka ni mutthu, hata kivaanyihanaka n'atthu (musinakooka), mpaani moothukumana, nnakhala mmuttettheni.

¹³Hata mano vakhaani khanihimya wira itthu sikoothenry'aya ti s'ekeekhayi.

¹⁴Kinnoleelani wira: Miyo kintthara ephiro y'etiini yamukhaani yeeyo aYuta ehinitthunaya siiso miyo kimmurumeela Muluku a axitiith'ihu, kaaminiki sothene Silempwe mulivuruni mwa Ikano sa Monse ni sa maprofeta.

¹⁵Kinniroromela ohoolo wa Muluku ntoko yawo-tho sinroromel'aya, wira onokhala ohihimuwa w'alipa ookhwa, akhale anaxariya n'ale ahikhanle anaxariya.

¹⁶Tivo okathi wothene vamphavel'aka okhalana muupuwelo wooreera ohoolo wa Muluku n'uhoolo w'atthu.

¹⁷Vano sivinre-ene iyaakha sinci-ene kihoorwa kiruuhaka munlokoni mwaka isimula ni soovaha.

¹⁸Okathi yoowo kaahiphwanyiwa mpaani mwa Muluku kireerihiwe-ene, khiyaakhanle atthu anci-ene, nnakhala onyakulihana, yaari-mo aYuta akina yaakhuma wAsia.

¹⁹Awo tiyapwanenle okhala ohoolo wanyu wira ekihimyase yaakoonanne mulattu.

²⁰Wala, atthu yaala ehimyeke, mulattu xeeni wakiphwanyane aya okathi waaronw'aka ohoolo w'aphuki.

²¹Yaahikhaleru moolumo yaahimy'aka okathi kaary'aka ni yaawo wira: Olelo kiniphukiwa ni nyuwo mwaha woohihimuwa w'alipa ookhwa.

²²Nto Felisi vaaiwaly'awe itthu iya, aahinteiha ophukiwa, aahimeeryaka wira: Kinamuhimeeriwa oratta-ene ephiro eyo, okathi vanrw'awe mukhulupale a anakhotto Lisia, siiso kinoosuwelihiwa myaha sanyu sothene.

²³Owo aahimuruma mukhulupale a anakhotto wira amusuke mukhatteya amukhapelelaka n'umoonela othunku, ahimukhoottiheryaka orumeeliwa hata akhw'awe orwa okumana n'uwo.

²⁴Vaaviraly'a aya mahiku vakhaani, vaarwiy'awe Felisi ni mwar'awe iihaniwa Trusila aari muYuta, aahimwiihaniha Paulo, khumwiiwa alavulaka mwaha w'omwaamini wawe Kristu.

²⁵Nto okhala wira owo aalavula mwaha wa xariya ni mwaha wo wiiphimela ni mwaha wolamuliwa ontthuna orwa, Felisi oovaka aahaakhula wira: Vano rowakani, kakhalana okathi kinoowihanihani.

²⁶Nave-tho okathi yoowo Felisi aaniroromela ovahiwa musurukhu ni Paulo wira amukumihe mukhatteya tivo imaara sinci-ene aamwihanih'awe khuyalavula ni yoowo.

²⁷Vaaviraly'aya iyaakha piili, Felisi aahirantteliwa ni Porsiyo Festo, nto Felisi aphavelaka wasiveliha aYuta, aahimuhiya Paulo mukhatteya.