Acts 23

¹Nto Paulo aawehexexaka makhulupale awo, aahahimeerya wira: Nyuwo axinn'aka mpakha nihiku n'olelo kiheetta ohoolo wa Muluku ni murima wothene wooreera.

²Vano mukhulupale a anamukuttho, Ananiya aahaaruma ale yaamwaattamenle wira emmane iyano.

³Nto Paulo aahimuhimeerya wira: Muluku onimoomanani, exiri yotteelihiwa! Nyuwo mukilaanthe va wira mukiphuke muttharihelaka ikano vano munvirikanya ikano iyo murumaka wira kimaniwe.

⁴Nave ale yaari vaavo yaahiira: Muninveeha mukhulupale a anamukuttho a Muluku?

⁵Paulo aahaakhula wira: Axinn'aka miyo nkaasuwela wira owo mukhulupale a anamukuttho a Muluku, okhala wira vaalempwa wira: Muhinveehe mukhulupale a nloko nanyu.

⁶Vano Paulo asuwelaka wira epantte ekina yaari aSatukhi nave akina yaari aFarisi, aahikhuwela ohoolo wa makhulupale iiraka: Axinn'aka miyo ka nFarisi mwaana a nFarisi kinlamuleliwa mwaha wa nroromelo, n'uhihimuwa w'alipa ookhwa.

⁷Vaahimaly'awe siiso waahikhumelela ovaanyihana eriyari y'aFarisi ni a Satukhi nto atthu yaahikawanyeya.

⁸Okhala wira a Satukhi anihimya wira khiwaavo ohihimuwa w'alipa ookhwa, hata ankelo nnakhala munepa, vano aFarisi annamini itthu sothene.

⁹Siiso waahikhala onyakulihana, vano yaahemela awiixuttihi a ikano yaari muloko w'afarisi, yaanivaanyiha yiiraka: Khinimphwanyanne etthu yoonanara mutth'ula, vakhala wira olavulihiwe ni munepa hata munkelo, nihimukhoottele Muluku.

¹⁰Ovanyihana iwo wahitepeleleya, vano mukhulupale a anamukuttho oovaka wira atthu yaarowa omphwatakasa Paulo, aahaaruma anakhotto awe okela vathukumaniwe omukumiha-vo Paulo n'omukeliha nipuro noolipihiwa.

¹¹Ohiyu yoowo, Apwiya yaahimukhumelela, khumuhimeerya wira: Paulo mulipihe murima, okhala wira tthiri mookikhalela onamoona oYerusalemu, siiso-tho muhaana okikhalela-tho onamoona oRooma.

¹²Vaaxiy'aya aYuta akina yaahithukumana enavaanela nave yaahilapha wira khiyaarowa olya etthu hata owurya, ehipacenrye toko omwiiva Paulo.

¹³Ale yaalamphe siiso yaahivikana atthu miloko mixexe.

¹⁴Nto awo yaahirowa okumana ni makhulupale a anamukuttho ni mahumu, khwahimeerya wira: Noolapha, wira nikhale ootakhalihiwa, khaninlya etthu nihimwinve toko Paulo.

¹⁵Vano, nyuwo n'alipa oophuka milattu munvekele mukhulupale wira meelo omuruuhe Paulo, mukhale ntoko mumphavela ophuka mulattu awe oratta-ene, nto owo ahinatthi ophiya wenno hiyo nnoolikanana omwiiva.

¹⁶Nto mwaana mwamulopwana a murokor'awe Paulo vaaiwaly'awe mwah'ola waavaneliwe aahirowa khuvolowa nipuro noolipihiwa, khumuleela Paulo.

¹⁷Nto Paulo aahimwiihana mukhulupale mmosa a anakhotto khumuhimeerya wira: Mmurowane mmirav'ola wa mukhulupale a anakhotto, maana ookhalana etthu yoomuleela.

¹⁸Vaamukuxaly'awe aahimurowana wa mukhupale a anakhotto, khumuhimeerya wira: Paul'ule otthukweliwe ookiihana, khukivekela woruuhelani mmirav'ola, ookhalana etthu yowohimeeryani.

¹⁹Mukhulupale anvarelaka ntata mmirav'owo, aahimurowana okhwipi khumukoha wira: Murinani y'okileela?

²⁰Vano owo aahaakhula wira: Ayuta ahiiwanana wovekelani wira meelo mmurowane Paulo w'alipa oophuka milattu.

²¹Nto nyuwo muhitthune, okhala wira atthu oovikana miloko mixexe anrowa wipitha mphironi wira emwiive Paulo. Awo aalapha wira atakhalihiwe masi khanrowa olya nnakhala owurya ehimwiinve toko Paulo. Vano awo aalikanana, anlipelela wakhulela wanyu paahi

²²vano mukhulupale a anakhotto aahimuhiya mmirav'owo arowaka nave aahimuhimeerya wira: Muhimuleele mutthu wira mookitiherya ehaal'ila.

²³Mukhulupale owo aahiwitthana makhulupale manli a anakhotto khwahimeerya wira: ?Mwaathukumanye anakhotto miloko miloko miili ooweettaka mweentto ni anakhavalo miliko mithanu na miili ni anamavaka miloko miloko miili wira avenye iwoora thanu na xexe s'ohiyu arowaka oKesareya.

²⁴Mulokiherye-tho ikhavalo sikina wira simukuxe Paulo mmurowane wa mwene Felisi ori mukumi.?

²⁵Nave owo aahilepa epaphelo ahimyaka wira:

²⁶?Kinoolepelani ti miyo, Klautio Lisia, kinokhomasani nyuwo ooweryaxa kuvernatoro Felisi.

²⁷Mulopwana owo aahivariwa n'Ayuta nto yaahala vakhaani omwiiva, vano vaaiwaly'aka wira owo muRoma kaahivenya n'anakhotto aka orowa omwaakiha.

²⁸Kiphavelaka osuwela mwaha waahimyaniw'awe kaahimurowana ohoolo w'aphuki.

²⁹Khusuwela wira ootheriwa mwaha wa ikano, nto khiivo etthu yiiraly'awe yootakhala yaaphwanela wiiviwa hata otthukweliwa,

³⁰nto vaasuwelihiw'aka wira aYuta yaahiiwanana omwiiva mulopwana owo, naanaanoru kihoorumihelani, nave-tho ale yaamotherya ehimyeke ohoolo wanyu mulattu awe.

³¹Ohiyu yoowo asurutaato yaahimurowana Paulo wAntipatriti ntoko saarummw'aya.

³²Mmeeloni mwaya yaahahiya anakhavalo emuhoolaka Paulo akina yaahihokolowela nipuro noolipihiwa.

³³Awo vaaphiyaly'aya oKesareya anakhavalo awo yaahimunnyererya epaphelo Kuvernatoro, khunvahererya-tho Paulo.

³⁴Mukhulupale vaasommy'awe epaphelo aahikoha elapo awe, vaaiwaly'awe wira aari a oSilisia,

³⁵aahimuhimeerya wira kinoowiiwani yarwa ale aniwootheryani.? Vano aahiruma wira asukiwe owanny'awe Heroti.