Acts 22

¹Axinn'aka n'axitiithi aka, vano mwiiwe wiisaakiha waka ohoolo wanyu.

²Nto vamwiiwalyaya alavulaka nintthava n'aya n'eHeperi, awo yahiikhalela oratta-ene. Nto Paulo aahahimeerya wira:

³Miyo ka muYuta, kiyariwe oTarsu w'oSilisia, nave muttetthe ola kinnuwenle kikhapeleliwa ni Kamaliyeli, okixuttihale oratta-ene ottharihela ekeekhayi ya ikano s'axitiith'ihu, kithokoreryaka itthu sa Muluku ntoko nyuwo siry'anyu olelo.

⁴Ni koolupattha ephiro ela mpakha owiiva, kaatthukwaka ni kaarihelaka mukhatteya alopwana hata athiyana.

⁵Nave-tho mukhulupale a anamukuttho vamosa ni mahumu othene anamoona, nave kivahiwaka ipaphelo ni yaawo saalepenly'aya axinna, kaahirowa oTamasiku wira kaaruhe ootthukiwa-ene, kaarowane oYerusalemu yaawo yaakhala weiwo wira yahukhummwe.

⁶Nto okathi keett'aka kirowaka, kihalaka ophiya oTamasiku, ehaleelaka ophiya othana eriyari, naanaanoru, muthuko muulupale waakhuma wirimu waahikirukurerya.

⁷Nto, kaahimorela vathi, ni kaahiiwa nsu naakihimeerya wira: ?Saulo! Saulo! Munkilupattelani??

⁸Kaahikoha wira: Nyuwo, mwa pani Pwiya? Owo khukaakhula wira: Miyo ki Yesu, muNasareti, yoowo nyuwo munimulupatth'anyu.

⁹Ale yaari ni miyo yaahoona warya iwo veekeekhayi nave yaahoova vanci-ene, nto khiyaamoonne ole aakilavuliha.

¹⁰Vano miyo kaahikoha wira: Pwiya kiire exeeni? Nave Apwiya yaahikihimeerya wira: Nvenye murowe oTamasiku, nto weiwo munoohimeeriwa sothene seiyo sinrow'anyu orummwa wira.

¹¹Nto okhala wira miyo nkoona mwaha wo warya wa muthuk'owo, kaahikuxiwa kivareliwaka ntata n'ale yaarin'aka nave kaahiphiya oTamasiku.

¹²Nto mulopwana mmosa iihaniwa Anania, aari oottittimiheya vamaithoni v'aYuta othene yaakhala weiwo.

¹³Arwaaka okumana ni miyo, aahikaattamela khukihimeerya wira munn'aka Saulo, mutthikele woona. Nto okathi-ene yoowo miyo kaahitthikela woona.

¹⁴Nave owo aahihimya wira: Muluku a axitiith'ihu okhuma khalayi ohoothanlani wira musuwele otthuna wawe, ni mmoone Naxariya awe, ni mwiiwe nsu na mwaano mwawe.

¹⁵Okhala wira munookhala namoona, eriyari y'atthu othene, wa iye sinoon'anyu ni siniiw'anyu.

¹⁶Nto vano munlipelelani, nvenye mpatisiwe, murapihe itampi sanyu, nvekelaka nsina n'Apwiya.

¹⁷Nto vaahokolowenly'aka oYerusalemu okathi kaavekel'aka mpaani mwa Muluku, kaahikhala ntoko kaamuloha,

¹⁸khumoona ole aakihimeerya wira: Mwaakuveke, nave mukhume oYerusalemu okhala wira onamoona anyu mwaha wa miyo khonrowa okupaliwa.

¹⁹Nto miyo kaahiira: Pwiya, awo annisuwela oratta-ene wira miyo kaanaarihela mukhatteya ni kaanamana (musinakooka) mpaani moothukumana ale yawaaminini.

²⁰Nave okathi ephome ya Sitefano namoon'anyu yaayehey'aya, nave-tho miyo kaari vaavo, ni kaahaakhulela wiiviwa wawe ni kaahisuka soowara s'atthu yaamwiiva.

²¹Vano aahikihimeerya wira: Rowani, okhala wira kinimoorumani w'ale ahikhanle aYuta ankhala ottai-wene.

²²Nave yaahinwiriyana mpakha nuulumo nla, vano khupacerya okhuwela ehimyaka wira: Mmukunihe mulaponi-mu mulopwan'owo, okhala wira khamphwanela okhala.

²³Nto awo ekhuwelaka yaanikhera soowara saya ni yaaniyeeherya etthaya osulu,

²⁴mukhulupale a anakhotto aahiruma wira Paulo akelihiwe nipuro noolipihiwa wira amaniwe mpakha ohimya mwaha xeeni atthu yaamukhuwelel'aya.

²⁵Nto okathi waatthukiw'awe n'ikwirinti, Paulo aahimuhimeerya mukhulupale a anakhotto aari vaavo wira: ?Munneemiheriwa ommana muRoma ohinatthi olamuliwa??

²⁶Nto vaaiwaly'awe moolumo awo mukhulupale a asurutaato, owo aahirowa omuhimeerya mukhulupale a anakhotto iiraka: Moone etthu entthun'anyu wira maana mulopwan'ole muRoma.

²⁷Nto mukhulupale a anakhotto vaarwiy'awe aahimukoha wira: Mukihimeerye nyuwo mwa muYuta? Owo aahaakhula wira: Ayo.

²⁸Mukhulupale owo aahihimya wira: Miyo, kilinve musurukhu munci-ene wira kiitthaniweke mutthu a elapo yeeyo. Paulo aahiira: Nto miyo ki muRoma oyariwa wene.

²⁹Naanaanoru atthu ale yaaphavela ommana Paulo yaahimwareya, hata mukhulupale a anakhotto aahoova, okathi vaasuwenly'awe wira aari muRoma, okhala wira aahimutthukwa.

³⁰Nto mmeeloni mwaya, aphavelaka osuwela mwaha xeeni wootheriw'awe n'aYuta, aahimutaphula, khuwiihaniha makhulupale a anamukuttho ni mahumu othene, nto amurowanaka Paulo aahimweemexa ohoolo waya.