Acts 21

¹Waamanly'aya okathi wolaxeryana, naahipakhira mukalawani, nto naaheetta mpakha ophiya oKosi. Mmeeloni mwaya naakhumaly'ahu naahirowa mpakha muttetthe w'oPatara,

²weiwo naaphwanny'ahu ekalawa yaarowa oFenisia. Naahiwela-mu nnarowa mukwah'ahu.

³Niviraka n'ahoona ekisirwa y'oKipero yaari moono woolopwana, nto naaheetta nrowaka oSiria. Vano, okhala wira ekalawa eyo yaahikuxa miritti soohiya ephantari y'oTiro, naahikhuruwa weiwo.

⁴Muttetthe yoowo naahaaphwanya atthu akina oowaamini nave naahikhala n'awo esumana emosa. Nto awo asuwelihiwaka ni Erooho Yooreera yaahimwiirela Paulo wira ahirowe oYerusalemu.

⁵Nto, vaamanly'aya esumana eyo, naahittikela ekwah'ahu. Atthu othene oowaamini vamosa n'athiyana naan'aya yaahinihoola mpakha ota wa muttetthe. Vano othene ahu naahikokhora muxerexere mwa ephareya nnavekela.

⁶Numala olaxeryana, naahiwela mukalawani nave awo yaahihokolowela mmawanyeya.

⁷Naamalinh'ahu ekwah'ahu ya mphareya, naaheetta okhuma oTiro nirowaka oPotolemita. Naahaakhomasa aKristu khukhala ni yaawo nihiku nimosa.

⁸Mmeloni mwaya naahivenya ni Paulo nrowaka muttetthe w'oKesareya. Nto naahirowa owanny'awe Filipe namalaleya khukhala ni yoowo. Filipe aari mmosa w'alopwana ale athanu nanli.

⁹Owo aahikhalana an'awe axexe axithiyana imwali. Awo yaanilaleya Masu a Muluku.

¹⁰Naahiviriha mahiku vakhaani weiwo. Nto aahirwa profeta mmosa akhumaka oYuteya iihaniwa Akapo,

¹¹owo aahirwa vakhiviru vahu, aahitthukwa inawu sawe ni matat'awe ni musako wa Paulo; vano khuhimya iiraka: Erooho Yooreera enihimya wira aYuta anrowa omutthukwa siisa mwaneene musak'ola oYerusalemu numala anoonvahererya mmatatani mw'amalapo.

¹²Okathi vaaiwaly'ahu moolumo awo, hiyo n'axinna a weiwo naahinvekela vanci-ene wira Paulo ahirowe oYerusalemu.

¹³Nto owo aahinaakhula iiraka: ?Muninlelani, xeeni munkithukumelih'anyu murima? Tthiri miyo koolikana, ohiya otthukweliwaru paahi nto hata okhwa oYerusalemu mwaha w'Apwiya Yesu.?

¹⁴Nto okhala wira khinaawenrye omuttikiha, hiyo naahikurunuxana mirima nihimyaka. Yiireyeke ele Muluku entthun'awe!

¹⁵Vaamanly'aya mahiku awo n'ahiitthokiha nnavenya nrowaka oYerusalemu.

¹⁶Axinna akina a oKesareya yaahinihoola mpakha oKipero owanny'awe mulopwana mmosa iihaniwa Menasawu, yoowo aari mwiixutti okhuma khalayi. Naahikhala owanny'awe.

¹⁷Okathi vaaphiyaly'ahu oYerusalemu, axinna yaahinaakhela n'utteeliwa murima vaci-ene.

¹⁸Mmeeloni mwaya, naahirowa ni Paulo omuxekurya Yakopo, mahumu othene yahirwa weiwo.

¹⁹Vano Paulo aahaakhomasa nave khuwaalikelela sothene Muluku saamwiirenly'awe eriyari y'atthu yahaakhanle aYuta.

²⁰Okathi vaaiwaly'aya moolumo ala, othene aya yaahattottopela Apwiya, numala yaahimuhimeerya Paulo wira: ?Ayo munnihu, moone wira wenno akhala aYuta miloko miloko sene oowaamini, nave othene aya anneettela ikano sa Monse.

²¹Yaahimuhimeerya wira nyuwo munniwiixuttiha aYuta anikhala ilapo sikina wira ehiiweleleke ikano sa Monse mwahimeeryaka wira ehaalyiheke masona an'aya, hata eheetteleke ikano saya.

²²Nto niireke sayi? Tthiri vannireerela atthu othukumana maana awo animwiiwa vahimmwaka wira muri wenno.

²³Tivo mwiire ntoko sinrow'ahu wohimeeryani wira: Aakhala va alopwana axexe ammanne natiri.

²⁴Mwaakuxe murowe mwaireerihe vamosa n'awo numala mulive musurukhu aya wira emetthiwe ikharari. Siiso atthu othene anoosuwela wira itthu sinihimmwa mwaha wa nyuwo sinimoothiwa, nto ohiya vo nave-tho nyuwo munneettela Ikano sa Monse.

²⁵Nto mwaha w'ale ahikhanle aYuta ankela nloko n'aKristu hiyo nihaalepela epaphelo naleelaka suupuwenly'ahu, naahimeeryaka wira ehikhuureke enama enivahiwa amuluku, nnakhala ephome, hata inama soohihitiwa, ni wira eheetteke onamuttompe.?

²⁶Vano Paulo aahaakuxa alopwan'awo, mmeeloni mwaya aahipacerya niira noowiireeriha. Numala aahikela mpaani mwa Muluku wira aahimeerye anamukuttho okathi yaarow'aya omala mahiku oowiireeriha, eyo piiyo okathi w'arow'aya oheliwa mukuttho wa khula mmosa.

²⁷Nto mahiku awo mathanu na manli oowiireeriha ehalaka omala aYuta akina a wAsia yaahimoona Paulo mpaani mwa Muluku. Yahaakhanyereriha atthu othene yaari-mo khunvara,

²⁸nto yaanikhuwela yiiraka: ?Nyuwo aIsarayeli munaakihe! Ola ti y'ole oniwixuttiha atthu mapuro othene alaleeryaka wira evirikanyeke ikano sa Monse n'uvirikanya empa ya Muluku, ohiya vo ohaakeliha mpaani mwa Muluku atthu ahikhanle aYuta, siiso aananariha nipuro nooreera!?

²⁹Awo yaahihimya siiso okhala wira yapacenrye omoona omuttettheni ahooliwaka ni Trofimu a w'Efesu, nto enuupuwela wira Paulo aahimukeliha mpaani mwa Muluku.

³⁰Muttetthe wothene waahinyakuleleya nave muttitthi w'atthu waanitthimakela-wo. Nto yaahinvara Paulo empurulela ota w'empa ya Muluku nto naanaanoru mikhora saahiwaleya.

³¹Atthu yaaniphavela omwiiva Paulo, okathi mukhulupale a asurutaato a oRooma vaaiwaly'awe ihaal'iyo, wira omuttettheni wookhumelela onyakulihana.

³²Aahaathukumanya makhulupale makina n'asurutaato naanaanoru khutthimakela-wo. Vaamoonaly'aya mukhulupale n'asurutaato arw'aka atthu yaahihiya ommana Paulo.

³³Nto mukhulupale owo aahimwaattamela Paulo khunvara, khuruma otthukiwa n'ikwiriti piili. Numala aahikoha wira aari ti pani n'etthu yiiraly'awe.

³⁴W'atthu awo, akina yaahimya etthu ekina, nave akina yaahimya etthu ekina. Nto onyakula iwo waamutepa mpakha mukhulupale owo ohiwerya osuwela etthu yiiraneiye. Tivo aahaaruma asurutaato omurowana Paulo nipuro noolipihiwa.

³⁵Vaaphiyaly'aya nipuro naaweliwa, asurutaato yaahikhanyererihiwa omuteexa Paulo mwaha w'atthu yahaareere owali

³⁶okhala wira atthu yaanaatthara ottuli ekhuwelaka wira: Iiviwe! Iiviwe!

³⁷Ahalaka omukeliha nipuro noolipihiwa, Paulo aahimukoha mukhulupale wira: ?Munnikitthuniherya wohimeeryani etthu?? Mukhulupale aahimukoha wira munnisuwela ekereku?

³⁸Nanso khamuhiyo mwExitu yoole aakumihenrye ekhotto ahinatthi ophiya mahiku ala khwaarowana woothakoni anawiive miloko mixexe?

³⁹Paulo aahimwaakhula iiraka: Veekeekhayi miyo ka muYuta, kiyariwe oTarsu w'OSilisia, muttetthe woosuwelaxiwa; kinnoovekelani wira mukihiye kilavule n'atthu ala.

⁴⁰Nto veemiheriw'awe, Paulo aaheemela vaxikattani, aahaamaaliha atthu ni ntata nave atthu yaahimaala oratta-ene, aahaalavuliha n'ilavulelo y'eheeperi iiraka: