Acts 20

¹Okathi wamanly'aya onyakulihana, Paulo aahiruma wiihaniwa awiixutti khwakurunuxa murima, numala aahaalaxerya khurowa oMasetonia.

²Aheetteetta mapuro awo othene, aalipihaka atthu oowaamini ni moolumo awe. Numala aahiphiya wAkhaya,

³weiwo waakhanly'awe miyeeri miraru. Aitthokihaka wira opakhire arowaka oSiria, vaasuwenly'awe wira aYuta yaahiiwanana omwiiva yoowo. Tivo aahitthika aviraka ephiro y'oMasetonia.

⁴Aahihooliwa ni Sopateri a muttetthe w'oPereya, n'Aristarku ni Sekuntu, oowanli aya yaari a oTesalonika, ni Kaio a oTerpe ni Timotiyo, ni Tikhiku ni Trofimu, yaari a elapo ya wAsiya.

⁵Atthu ala oowaamini yaahihoola, enanlipelela muttetthe w'oTrowate.

⁶Numala niira na Paasikha, naahipakhira ekalawa ephantari y'oFilipu, vaaviraly'aya mahiku mathanu, naahaaphwanya yaawo oTrowate. Khukhala weiwo esumana emosa.

⁷Nihiku n'opacerya na esumana awiixutti yaahithukumana wira elye vamosa. Paulo atthunaka okhuma mmeloni mwaya, aahilavula n'atthu oowaamini vano aahilaleya mpakha ohiyu eriyari.

⁸Yaathukumanne esaala y'osulu nave saahipattihiwa-mo ixamaniya sinci-ene.

⁹Mmiravo mmosa iihaniwa Eutiku aakilanthe vacanelani esaala ya neeraru y'osulu aahivoliwa ikhove maana Paulo aahirakamiha olavula. Siiso ikhove saahinveliha khumora, nave khukuxiwa ookhwa-ene.

¹⁰Vano Paulo aahikhuruwa, aahuurama, khunvara mmirav'owo, nto khwahimeerya atthu wira: ?Muhituthuwe, ola mukumi!?

¹¹Paulo aahitthikela omuthukumanoni, aahinna mukatthe okhuura, nto nlelo aahitthikela walaleerya mpakha oxa. Numala, aahirowa ekwah'awe.

¹²Vano mmirav'owo, aahiroohiwa owaani ari mukumi nave atthu othene yaahihakalalihiwa vanci-ene.

¹³Hiyo, naahirowa ohoolo, nrowaka n'ikalawa mpakha ephantari yo wAso, weiwo naarow'ahu omwaakhela Paulo. Owo aanirumme siiso okhala wira owo aarowa mweentto.

¹⁴Okathi vaaniphwanny'awe wAso, naahimwaakhelela nnamukuxa mukalawani nrowaka muttetthe w'oMitilene.

¹⁵Naahivenya weiwo, mmeeloni mwaya naahivira vakhiviru va ekisirwa y'oKhiyo. Nihiku na neeraru naahiphiya oSaamu mmeeloni mwaya n'ahiphiya oMiletto.

¹⁶Paulo khaatthunne weemela wEfesu, aaroxerema-wo wira ahipise mulaponi mwa w'Asia. Anarowa ni waakuva maana aaphavela okhala oYerusalemu, nihiku na niira na Pentekositi.

¹⁷Okathi Paulo aary'awe oMiletto aahirumiha mitthaka awiihanihaka mahumu a ekerexa ya wEfesu.

¹⁸Okathi vaaphiyaly'aya, Paulo aahahimeerya wira: Nyuwo moosuwela mweettelo aka okathi vaary'aka ni nyuwo okhuma nihiku naaphiyaly'aka elapo ya wAsia.

¹⁹Kaarumeelaka Apwiya ni wiiyeviha wothene ni wunla n'uttehattehiwa mwaha w'aYuta yakilupattha.

²⁰Nave-tho munnisuwela wira koowiirelani sothene, kiphavelaka wokhaliheryani. Kolaleeryakani Ehapari Yooreera kiixuttihaka mmithukumanoni ni mmawaani.

²¹Miyo kihalaleerya aYuta n'ale ahikhanle aYuta wira erukunuxe mirima saya, ni emwaamini Pwiy'ahu Yesu Kristu.

²²Vano kinrowa oYerusalemu kikuxiwaka ni Erooho Yooreera nkinisuwela sinrowa okikhumelela weiwo.

²³Kinsuwel'aka paahi wira Erooho Yooreera ennikihimeerya ohaawa wothene kinrow'aka ophwanya muttetthe ni muttetthe wira otthukweliwa ni mixankiho sinnikilipelela.

²⁴Nto miyo ekumi aka kahiyo etthu. Etthu emphavel'aka ophiya omukanoni n'umaliherya muteko kivahiw'aka n'Apwiya Yesu, w'olaleya Ehapari Yooreera ya mahala a Muluku.

²⁵Nto vano, veekeekhayi kinnisuwela wira wa nyuwo othene, kivinry'aka koolaleeryakani omwene wa Muluku, khamunoona-tho owitho waka.

²⁶Tivo olelo kinniwerya wohimeeryani wira, akhala mutthu onrowa orimeela kahiyo mulattu aka,

²⁷okhala wira kihoolaleeryani otthuna wothene wa Muluku kihoovitheryakani etthu.

²⁸Tivo mwiipasoopeke mmansinyu, mukhapeleleke ipwittipwitthi sothene sivahiw'anyu ni Erooho Yooreera. Mukhale amakampusi a Ekerexa ya Muluku y'eyo owo othummy'awe n'iphome ya Mwaan'awe.

²⁹Tthiri miyo koosuwela oratta-ene wira miyo karowa, sinookela munlokoni mwanyu miici soopwetexa sihinrowa olevelela ipwittipwitthi.

³⁰Nave-tho eriyari anyu anookhumelela atthu akina anrowa wixuttihaka mixuttiho soowootha yaahapuxaka awiixutti wira yaatthare.

³¹Tivo, mukhale nwehawehaka. Muupuweleke wira kookhala ni nyuwo iyaakha tthaaru othana n'uhiyu kinvahaka miruku khula mmosa a nyuwo kinlaka vanci-ene.

³²Vano-nto kinoovahereryani mmatatani mwa Muluku ni masu a mahal'awe, yawo arina owerya wo wacererya ekerexa ni wowovahani soohiyeriwa eriyari ya atthu othene athanliwe ni Muluku.

³³Nkinanlele itthu sa mutthu, nnakhala eparatha hata eweero, nnakhala soowara.

³⁴Ohiya vo, nyuwo munnisuwela oratta-ene wira saaphavel'aka miyo n'akhw'aka wira kiphwanye sothene seiyo miyo n'akhw'aka kiphwannye ni matataak'ala.

³⁵Koowoniheryani wa sothene wira nivaraka muteko siiso nnowerya wakhaliherya atthu oothoiwa, ni wuupuwela masu a Apwiya Yesu anihimya wira: ?Yotepaxa oreera ovaha ovikana ovahiwa.?

³⁶Paulo vaamanly'awe olavula moolumo ala, aahikokhora vamosa n'axinna othene khuvekela ni yaawo.

³⁷Othene aya yaahikelela wunla, emukhuparelaka ni envahaka epeeco Paulo.

³⁸Awo yaahiriipiwa murima vanci-ene mwaha woowahimerya wira khiyaarowa woona-tho owiitho wawe. Nto yahimuhoola mpakha okalawani.