Acts 19

¹Okathi Apolo waary'awe oKorinto, Paulo aahivira mmittettheni khuphiya wEfesu; weiwo aahaaphwanya awiixutti akina,

²nto aahaakoha wira: ?Nyuwo okathi mwaminni anyu muhaakhela Erooho Yooreera?? Awo yaahaakhula yiiraka: Hiyo hata nlelo khiniiwale wira yookhala Erooho Yooreera!

³Nlelo Paulo aahaakoha wira: Epatisimu xeeni yaakhenly'anyu? Awo yaahaakhula wira: ?Epatisimu ya Yohani Mpatisa.?

⁴Nto Paulo aahahimeerya atthu wira: ?Epatisimu ya Yohani yaari yoorukunuxa murima, nave owo aanaahimeerya atthu wira yaahaana omwaamini ole aatthuna orwa ottuli wawe, eyo p'iyo omwaamini Yesu Kristu.?

⁵Nto ale yaaiwale siiso, yaahipatisiwa ni nsina n'Apwiya Yesu.

⁶Nto okathi Paulo vaawiixathenry'awe matata, Erooho Yooreera waahaakhuruwela, ni yaahipacerya olavula ilavulelo sotikiniha n'ulaleya ni nsina na Muluku.

⁷Othene aya yaari atthu vakhiviru muloko nanli.

⁸Paulo aanirowa mpaani moothukumana mw'aYuta mpakha miyeeri mixexe, alavulaka mwaha w'omwene wa Muluku.

⁹Nto atthu akina yaanumiha mirima saya, khuhiyaiwelela, yaaniveeha ephiro ya Muluku ohoolo w'atthu. Vano Paulo aahaahiya khwakuxa awiixutti awe, anawiixuttiha muxikola mwa Tirano, mahiku othene.

¹⁰Aahilaleya mpakha iyaakha piili, siiso atthu othene a wAsia, aYuta n'ale yahaakhanle aYuta yaahiiwa Masu a Apwiya.

¹¹Muluku aanipaka miiriirya suulupale mmatatani mwa Paulo.

¹²Yaanikuxa hata maleeso n'ikuwo sa Paulo saawar'awe enawiixatherya oretta, nave awo yaanivona iretta saya ni minepa sootakhala saanaahiya.

¹³Ayuta akina yetteetta yomolaka minepa sootakhala yaahererya ovekela nsina n'Apwiya Yesu wira yoomole minepa sootakhala saahaaxa aretta, yiiraka: ?Ni nsina na Yesu, yoowo Paulo onimulaley'awe, kinoorumani wira mukhume!?

¹⁴Awo yiira siiso yaari aana athanu nanli a muYuta mmosa iihaniwa Sikewa, aari mukhulupale a anamukuttho.

¹⁵Nto munepa wotakhala waahiwaakhula wira: Kinnimusuwela Yesu ni kinnimusuwela Paulo. Nto nyuwo mw'apani?

¹⁶Vano mutth'uwo aavariwe munepa wotakhala aahatuphela khwawerya othene aya khwaamanakasa vanci-ene mpakha otthyawasa etthoko eyo ehiwanre etthu esareiye-ene makhwatta.

¹⁷Atthu othene yaakhala w'Efesu, aYuta n'ale yahaakhanle aYuta, y'asuwenly'aya etthu iyo yaahoova vanci-ene, nto nsina n'Apwiya naanitepa ottittimihiwa.

¹⁸Nave atthu anci-ene oowaamini yaanirwa enahimya vamaithoni v'atthu othene sootakhala siiraly'aya.

¹⁹Nave-tho ale yaapaka maxitta ootakhala yaahirowana ilivuru saya khupahiwa ohoolo w'atthu othene. Vaawehiw'aya esisapo aya, musurukhu aya waaphiyerya ikonto miloko mithanu wa eparatha.

²⁰Siiso, masu a Apwiya y'anitepa omwareela mulaponi n'uwerya wulupale n'ulipihiwa.

²¹Numala okhumelela itthu iya, Paulo aahuupuwela orowa oYerusalemu, aviraka oMasetonia ni w'Akhaya nto aanihimya wira: ?Karowa oYerusalemu nave-tho kihaana orowa oRooma.?

²²Vano aahaaruma atthu anli yaavaran'awe muteko orowa oMasetonia, Timotiyo ni Erasito. Owo aahikhala wAsia weiwo mahiku vakhaani.

²³Okathi yoowo waahikhumelela onyakulihana wuulupale mwaha w'Ephiro y'Apwiya.

²⁴Maana mulipa-oohana itthu s'eparatha, iihaniwa Timetriyo yoowo aahana itthu saparatha alikanyihaka empa ya Tiyana siiso owo n'anamuteko awe yaaniphwanya musurukhu munci-ene.

²⁵Nto aahaathukumanya akhw'awe yaavaran'awe muteko mmosaru khwaahimeerye wira: ?Apatthani nyuwo moosuwela oratta-ene wira yoolya ahu enikhuma wa mutek'ola.

²⁶Nto nyuwo munnoona ni munniiwa itthu siniir'awe Paulo owo. Owo onnihimya wira amuluku atthu anaapak'aya kahiyo amuluku a ekeekhayi. Siiso ohaakupaliha ni wahapuxa atthu anci-ene, kahiyo wEfesu wenno paahi hata wAsiya wothene.

²⁷Etthu iyo ti yoowoopiha vanci-ene okhala wira kahiyo nakoso ahuru paahi onrowa okhoottiwaka, nto hata empa ya muluku muulupale Tiyana khenrowa otthuniwaka nave onrowa othanyiwaka ovuwa wawe muluk'uwo, yoowo onkokhoreliwa elapo yothene ya wAsia ni olumwenku wothene.?

²⁸Vaaiwaly'aya moolumo ala yaahinanariwa khukelela okhuwela yiiraka: ?Muulupale Tiyana a w'Efesu!?

²⁹Onyakulihana iwo waahimwareela muttetthe wothene, nave muttitthi wothene w'atthu waahirowa nipuro nuulupale naathukumaniwa, awo yaahimukuxa Kaio n'Aristarko yaari atthu ooMasetonia yawo yeetta vamosa ni Paulo.

³⁰Paulo aaphavela wisooniherya ohoolo wa muthukumano w'atthu, nto awiixutti yaahimukhoottiherya.

³¹Makhulupale makina a wAsiya, apatthani a Paulo nave-tho yaahinvekela wira ohirowe omuthukumanon'iwo.

³²Okathi uwo omuthukumanoni waahinyakuleleya, okhala wira atthu akina yaakhuwelela etthu ekina, akina etthu ekinaku. Atthu anci-ene khiyaasuwela etthu yaathukumanenly'aya.

³³Ayuta yaahimukakhela Alexantre ohoolo wa muthukumano nave atthu akina yaanimukhanyererya wira alavule, Alixantre aaheemexa ntata aamaalihaka atthu awo, atthunaka owaakiha.

³⁴Nto okathi vaasuwenly'aya wira owo aari muYuta, othene aya yaahikelela okhuwela mpakha vakhiviru iwoora piili ehimyaka wira: Muulupale ti Tiyana a wEfesu!

³⁵Vano mulipa oolepa a omuttettheni aahiwerya wamaaliha atthu khwaahimeerya wira: ?Nyuwo atthu a wEfesu, atthu othene annisuwela wira muttetthe ahu onnittittimiha empa ya muulupale Tiyana n'ilatarata awe ekhumme wa Yupiteri.

³⁶Nto okhala wira khaavo onwerya ovaanya, mmaale ehikhale eniir'anyu ni woova.

³⁷Nyuwo muhaaruuha atthu ala nto awo khavirikannye empa ya muluku ahu, hata khanveehale muluku anyu.

³⁸Vakhala wira Timetriyo n'akhw'awe anvaran'awe muteko yaarina mulattu, akhala mapuro aniphukiwa milattu ni makhulupale aniphuka, akhala aphukhi, yavaanyihaneke weiwo.

³⁹Nto wakhala mwaha mukina onvekel'anyu wira ophukiwe owo ohaana ophukiwa omuthukumanoni wa xariya.

⁴⁰V'ekeekhayi hata hiyo wannoopiha wotheriwa okhala awanani, mwaha w'etthu ila ekhumelenle olelo, okhala wira khiwaavo mwaha okhanly'ahu oohimya, mwaha w'onyakula nno.?

⁴¹Vaamanly'awe olavula siiso aahamwarya atthu.