Acts 18

¹Numala itthu iya, Paulo aahivenya w'Athena khurowa oKorinto.

²Weiwo aahimphwanya muYuta mmosa iihaniwa Akila, aari a elapo y'oPonto, nave aarwiye naanaano akhumaka elapo ya wItalia, aari ni Prisila vamosa ni mwaar'awe. Awo yaahikhuma oRooma, okhala wira mwene Klautio aahiwoomola aYuta othene mulaponi mw'awe. Paulo aahirowa okumana ni yaawo.

³Nto okhala wira aavara muteko mmosaru, woottottha iheema, aahikhala ni yaawo onavara muteko ni yawo.

⁴Isaapatu sothene, owo anilaleya mpaani moothukumana ophavelaka owaaminiha aYuta n'aKereku.

⁵Okathi Sila ni Timotiyo vaaphiyaly'aya ekhumaka oMasetonia, Paulo aahiivahererya olaleya, alaleeryaka aYuta wira Yesu ti Kristu.

⁶Nto awo yaaninvirikanya Paulo enveehaka, vano Paulo aahitatha ntthupi na ikuwo sawe, aahimeeryaka wira: Nyuwo ephome anyu yoomoreleni nyuwo, miyo nkina mulattu okhuma olelo orowa ohoolo kinrowa walaleeryaka ale ahikhanle aYuta.

⁷Siiso aahivenya-vo khurowa owanny'awe mulopwana mmosa iihaniwa Tito Naxariya, yoowo eettela etiini y'aYuta, nave akhala waattamela empa yoothukumana.

⁸Nto Krispu mukhulupale a empa yoothukumana aahiwaamini Apwiya, vamosa n'etthoko awe. Atthu anci-ene a muttetthe w'oKorinto, vaaiwaly'aya olaleya wa Paulo, yaahaamini khupatisiwa.

⁹Ohiyu Apwiya yaahimukhumelela Paulo khumuhimeerya wira: ?Muhoove etthu! Nlelo mulaleyeke, muhimaale,

¹⁰okhala wira miyo kiri ni nyuwo. Khaavo onwerya owirihani yootakhala, okhala wira atthu aka khareere muttetthe ola.?

¹¹Nto Paulo aahikhala weiwo eyaakha emosa ni miyeri mithanu na mosa owixuttihaka atthu Masu a Muluku.

¹²Nto okathi Kalio vaary'awe Kuvernatoro a wAkhaya, aYuta yaahiiwanana onvirikanya Paulo, yaahimurowana ohoolo wa makhulupale oopuka milattu,

¹³nave yaahimuhimeerya Kuvernatoro wira: Mutth'ula onaatumererya atthu wira amukokhoreleke Muluku voovirikanya ikano!

¹⁴Paulo ophavelaka olavula, okathi yoowo Kalio aahahimeerya aYuta wira: ?Vaarokhala wira waari mulattu muulupale n'itthu yothakhala enihimyaniw'awe kaamphuka mulattu anyu enihimyaniw'awe n'exariya.

¹⁵Nto okhala wira mulatt'ula mwaha wa moolumo ni wa masina ni wa ikano sineettel'anyu, mphukeke mmansinyu, mulattu ntok'ola miyo nkintthuna okhala mphuki a myaha seiya!?

¹⁶Nto aahiwoomola ohoolo makhulupale oopuka milattu.

¹⁷Vano atthu othene yaahinvara Sostene mukhulupale a mpaani moothukumana khupacerya ommana, ohoolo makhulupale oopuka milattu. Nto Kalio khaacanle etthu iyo.

¹⁸Paulo nlelo aahikhala okathi munci-ene oKorinto, numala aahaalaxerya axinna khupakhira arowaka oSiria, aahimukuxa Prisila ni Akhila. OKenkhereya, aahimettha ikharari, wira ammaliherye natiri aamutthumkw'awe.

¹⁹Okathi vaaphiyaly'aya wEfesu, Paulo aahimuhiya weiwo Prisila ni Akhila. Khurowa mpaani moothukumana, analavula n'aYuta yaathukumanne memmo.

²⁰Awo yaahinvekela Paulo wira akhale n'awo mahiku manci-ene, nto owo khuhitthuna.

²¹Vano okathi vaarow'awe aahahimeerya wira: ?Muluku atthuna kinoohokolowela wenno.? Aahikhuma wEfesu

²²nto vaaphiyaly'awe oKesareya, aahirowa oYerusalemu, aahaakhomasa axinna a ekerexa ya weiwo, numala aahirowa wAntiyokiya.

²³Numala okhala weiwo mahiku vakhaani, aahivenya arowaka, kweetteetta ilapo s'oKalasia ni oFrixia, aalipiheryaka awiixutti othene.

²⁴Okathi yoowo aahiphiya wEfesu muYuta mmosa, iihaniwa Apolo a elapo ya wAlexatriya, owo aanilavula oratta-ene ni aanisuwela oratta-ene Soolempwa sa Muluku.

²⁵Owo aahiixuttihiwa ephiro y'Apwiya aari oolipa muroohoni, aanilavula ni wixuttiha oratta-ene myaha sa Yesu, onamwi aasuwenle epatisimu ya Yohani paahi.

²⁶Apolo aahikelela olavula mpaani moothukumana ni wilipiha wothene. Nto okathi Prisila ni Akhila vaamwiwaly'aya, yaahimukuxa khumutthokiherya oratta-ene ephiro ya Muluku.

²⁷Vano Apolo aahivenya arowaka wAkaia nave axinna yaahimukhaliherya, yaalepelaka axinna a weiwo, yaavekelaka wira emwaakhelele. Okathi vaaphiyaly'awe wAkaia, aahakhaliherya vanci-ene atthu oowaamini elipihiwaka ni mahala a Muluku,

²⁸tthiri avanyihanaka valupale mmuthukumanoni n'aYuta aanaawerya awoniheryaka mwa Soolempwa sa Muluku wira Yesu ti Kristu.