Acts 17

¹Paulo ni Sila yaahivira mittetthe sa w'Anfipoli ni w'Opolonia khuphiya muttetthe w'oTesalonika, weiwo waari-wo empa yothukumana y'aYuta.

²Ntoko saalimalenly'awe Paulo aahirowa weiwo, nto aahiviriha isaapatu tthaaru alavulaka ni yaawo mwaha wa Soolempwa.

³Aataphulelaka nave aaniwoniherya wira Kristu aahaana ohaawa n'uhihimuwa mookhwaani. Nave Yesu yoowo onolaleeryakani, aanihimya wira, owo ti Kristu.

⁴Akina a yaawo yaahaamini khukhala vamosa ni Paulo ni Sila, nave-tho yaahaamini aKereku anci-ene n'athiyana oosuwanyeya anci-ene.

⁵Nto aYuta oohiiwelela yaahisareya nrima, khwathukumanya atthu ootakhala murima eriyari y'atthu ootakhala nave yaahipaka nikhuru nuulupale khukumiherya onyakulihana mmuttettheni. Yaahituphela etthoko ya Yasoni emphavelaka Paulo ni Sila wira yaarowane ohoolo w'etripunali y'atthu.

⁶Nto okhala wira khiyamphwannye-wo, yaahinvara Yasoni n'axinna akina khwaapurulela ohoolo wa makhulupale a muttetthe, ekhuwelaka wira: Atthu ala annikumiherya onyakulihana mulaponi mothene, vano aaphiya nno tho,

⁷nave Yasoni aahiwaakhela owanny'awe. Atthu ala othene annivirikanya sooruma sa Kesari, ehimyaka wira ookhala mwene mukina, Yesu.

⁸Okathi muttitthi w'atthu ni makhulupale vaaiwaly'aya etthu iyo, yaahituthuwa vanci-ene.

⁹Khumukhanyereriha Yasoni n'atthu akina oliva musurukhu waahimmwe ehinatthi otaphuliwa.

¹⁰Ohiyu ene yoowo axinna yaahimwiirela Paulo ni Sila wira eroweke muttetthe w'oPereya. Okathi vaaphiyaly'aya wo, yaahirowa mpaani moothukumana mw'aYuta.

¹¹Ayuta a weiwo yaari ooreera murima wavikana aYuta a oTesalonika, awo yaahaakhela masu a Muluku ni murim'aya wothene nave mahiku othene yaanisoma Soolempwa sa Muluku wira yoone vakhala wira iye saahimy'awe Paulo saari siiso.

¹²Siiso nto, atthu anci-ene a yaawo yaahaamini, nave-tho n'athiyana a oKeresia, nnikhuru n'atthu oottittimiheya vamosa n'alopwana anci-ene.

¹³Nto okathi aYuta a oTesalonika vaasuwenly'aya wira Paulo aalaleya Masu a Muluku oPereya, yaahirowa weiwo khukelela okumiherya onyakula w'atthu envirikanyaka yoowo.

¹⁴Naanaanoru axinna yaahimuruma Paulo orowa ephiro y'ophareya, nto Sila ni Timotiyo yaahanle weiwo.

¹⁵Atthu yaamuhoola Paulo, yaahimurowana mpakha muttetthe wAthena. Numala yaahitthikela oPereya, eruuhaka mihupi sa Paulo wira Sila ni Timotiyo erowase voowakuveya okumana ni yoowo wAthena, yahivenya erowaka.

¹⁶Okathi waamwalitt'awe Sila ni Timotiyo wAthena, Paulo murima waahimuriipa vaawehaly'awe muttetthe ovahereriwe-ene vanci-ene wettela ilatarato.

¹⁷Tivo vaavanyihan'awe mpaani mothukumana n'aYuta n'atthu akina yaamwaamini Muluku, nave mahiku othene aanilavula-tho mmapuwani n'ale aaphwany'awe.

¹⁸Anamasuwela akina yaatthara moolumo a Epikuro ni a Sitowa yaahipacerya ovaanyihana ni yoowo. Akina yaanihimya wira: ?Onihimya exeeni namalavulas'ola?? Akina yaahihimya wira: Onkhala ntoko namalaleya a amuluku a amalapo yaanihimya siiso, okhala wira Paulo aanaalaleerya Yesu ni mwaha w'ohihimuwa.

¹⁹Nto yaahimurowana omuthukumanoni nipuro nenlo naaitthaniwa wAreopako nto yaahimukoha yiiraka: ?Hiyo nnowerya osuwela mwixuttih'ola wa naanaano nyuwo onixuttih'anyu?

²⁰Itthu sinnileel'anyu ti sootikiniha vanci-ene nto ninniphavela osuwela sinihimy'aya!?

²¹Tthiri, atthu a w'Athena n'anamurwi yaakhala wAthena, khiivo yiir'aya muteko aya waari ohimya ni wiiwa ihaali sa naanaano.

²²Nto Paulo aaheemela ohoolo w'Areopako, khuhimya wira: ?Nyuwo atthu a wAthena kinoona wira mw'atthu munattitthimiha oratta-ene amuluku anyu mwa sothene.

²³Tthiri keettettaka mmuttettheni mwanyu kihoona mapuro munaattittimih'anyu-mo amuluku, koowoona altaari amosa alempwe-vo moolumo ala.? Nipuro na Muluku oohisuweliwa. Tthiri, Muluku yoowo nyuwo munimukokhorel'anyu muhimusuwelaka, ti yoowo miyo onoolaleeryaakani.

²⁴Muluku yoowo opattunxe olumwenku ni sothene siri memmo ni ti Pwiya a wirimu ni vathi-va, nave khonikhala ipa sa Muluku sitekiwe n'atthu,

²⁵hata khonrumeeliwa n'atthu, ntoko mutthu oothoiwa, okhala wira ti yoowo onaavaha ekumi atthu othene, onaavaha omumula n'itthu sikina-tho.

²⁶Mwa mutthu mmosaru Muluku oohakumiha atthu a maloko othene khwaakhaliha mulaponi mothene mwa vathi. Ehinatthi atthu okhala aahathanlela okathi aya ni mikano sa mapuro mwaarow'aya okhala.

²⁷Aahiira siiso wira atthu emphaveleke Muluku, ni wira yiilipiheke wira emphwanye. Tthiri, owo khokhanle ottai-wene wa khula mmosa a hiyo.

²⁸Okhala wira ninkhala mwa yoowo, nneetta mwa yoowo, nave ninnikhala-mu mwa yoowo. Ntoko alepi anyu sihimmy'aya-tho wira: Tthiri hiyo n'atthu a nloko nawe.

²⁹Nto vakhanly'ahu nloko na Muluku, nihuupuweleke wira Muluku onoolikana n'ilatarato y'eweero wala y'eparatha wala ninluku nooreerihiwa nnakhala n'etthu epakiwe ni muupuwelo w'atthu.

³⁰Nave Muluku khaniweha-tho okathi atthu yett'aya vohisuwela vano onnaasuweliha atthu othene a mapuro othene, wira erukunuxe mirima.

³¹Oothanla nihiku noolamula olumwenku n'ixariya, muhina wa mutthu mmosa omuthanlaly'awe. Yoowo owoonihenry'awe atthu othene, omuhihimuxaka yoowo mookhwaani.

³²Okathi vaamwiiwaly'aya Paulo olavulaka mwaha wa ohihimuwa, yaahikhala akina yaamutheya, nave akina yaanihimya wira: ?Nnowiwakani mukwaha mukina mwaha yoowo.?

³³Siiso Paulo aahikhuma eriyari aya onarowa.

³⁴Siiso yaahikhala alopwana akina yaakenle mmulokoni mwawe khwaamini; mwa yaawo aari Tionisio, mukhulupale a mulaponi, ni muthiyana mmosa iihaniwa Tamari nave-tho atthu akina-ene.