Acts 16

¹Paulo aahiphiya muttetthe w'oTerpe ni oListra. Weiwo aahikhala mwiixutti mmosa iihaniwa Timotiyo, mwaana a muKristu muthiyana muYuta, tiithi awe aari muKereku.

²Atthu othene oowaamini oListra ni wIkonio yaanitthapela mukhalelo awe.

³Paulo aahitthuna omukuxa Timotiyo wira eettaneke nto aahimukuxa khumulyiha masoma mwaha w'aYuta yaakhala mapuro yaawo, okhala wira atthu othene yaahisuwela wira tiithi awe Timotiyo aari a oKresia.

⁴Mmittettheni mothene mwaavir'aya, yaanahimeerya aKristu wira ikano saavahereriw'aya n'arummwa ni mahumu oYerusalemu wira siiweleliweke.

⁵Siiso ikerexa saanilipiherya waamini ni mwaattelo w'atthu oowaamini waanincerereya khula nihiku.

⁶Paulo ni Sila yaahivira elapo y'oFrixia ni y'oKalasia, maana Erooho Yooreera khiyaatthunihenrye olaleya masu a Muluku mulaponi mwa w'Asia.

⁷Vaaphiyaly'aya oMisiya yaahiphavela orowa oPitinia nto Erooho ya Yesu yahaakhoottiherya.

⁸Vano yaahivikana oMisia khurowa mpakha oTrowate.

⁹Ohiyu, Paulo ahoona etthu yotikiniha aahimoona mulopwana a oMasetonia eemenle-ene ohoolo wawe anvekelaka wira: ?Nvire oMasetonia munikhaliherye.?

¹⁰Paulo numala woona ele yaamukhumelenle, aahiiwanana voohilekela orowa oMasetonia, akupaliki wira Muluku aamwiitthanela orowa weiwo olaleerya Ehapari Yooreera.

¹¹Vano naahipakhira mukalawani oTrowate nnarowa mpakha oluluwana ekisirwa y'oSamotrasia. Mmeloni mwaya, naahiphiya ephantari ya oNeapoli.

¹²Naakhumaly'ahu naahirowa oFilipu okhanle muttetthe woopacerya muulupale w'elapo y'oMasetonia. Weiwo naahiviriha mahuku vakhaani.

¹³Esaapatu, naahikhuma mmuttettheni nirowaka oxere-xere wa muro, nipuro nuupuwel'ahu okhala nipuro n'ovekela. Naahikalaathi weiwo nto naahipacerya ovaanela n'athiyana yaathukumanne vaavo.

¹⁴Muthiyana mmosa, iihaniwa Litia aaniwiriyana oratta-ene iye saalavul'ahu, aari namatumiha a ikuwo soorika siihaniwa purpura, owo aakhumme muttetthe w'oTiyatira. Litia aanimukokhorela Muluku, nto Apwiya yaahimutthukula ankhili awe wira asuwele iye Paulo saahimy'awe.

¹⁵Owo vamosa n'etthoko awe yaahipatisiwa. Vano Litia aahinivekela anihimeeryaka moolumo ala: ?Mwaakupaliki wira miyo kinniwaamini Apwiya, nrowe mwakhale owanny'aka.? Nto khunikhanyereriha okhala weiwo.

¹⁶Nihiku nimosa, okathi vaarow'ahu ovekela, naahikumaana ni mwali aarina munepa woowaxerya ehako. Siiso axineene yaaniphwanya musurukhu mwa ehako yaaxery'awe.

¹⁷Mwali owo aahipacerya omutthara Paulo ni hiyo, akhuwelaka wira: Atthu ala anoolaleeryani ephiro y'owoopowa, arumeyi a Muluku a wirimu-rimu.

¹⁸Aahiira siiso mahiku manci-ene. Vano Paulo aahinyoonyiwa, aahirukunuwa khwiirela munepa owo wira: Mwa nsina na Yesu Kristu, kinnooruma wira okhume mwa muthiyan'ola! Nto naanaanoru munepa owo waahikhuma.

¹⁹Okathi voonaly'aya axineene epottha eyo yothiyana wira nroromelo naya n'ophwanya musuruku naahimala, yaahinvara Paulo ni Sila khwapurulela omuthukumanoni, ohoolo wa makhulupale.

²⁰Nto, vaaroihaly'aya ohoolo wa makhulupale a oRooma, yaahahimeerya wira: ?Atthu ala annikumiherya ohiiwanana mmuttettheni mwahu.

²¹Awo anniixuttiha ilimalela seiyo hiyo aRoma ninkhoottiheriw'ahu okupali hata ottharihela.?

²²Nto muttitthi w'atthu waahaatuphela yaawo, nave makhulupale awo yaahiruma okheriwa ikuwo saya n'umaniwa n'ikopo.

²³Yaahimaniwa vanci-ene, numala yaahatthukwela mukhatteya, emurumaka kwarta wira aalipeleleke oratta-ene.

²⁴Kwarta owo vaarummwaly'awe aahaarowana mukhatteya muhina nto aahaatthukwa metto aatthukwelela vamwirini.

²⁵Wattamela ohiyu eriyari, Paulo ni Sila yaanivekela ni yaaniipa isipo soomuttottopela Muluku. Nave atthu akina yaari mukhatteya yaanawiriyana.

²⁶Naanaanoru yaahikhumelela etetere yuulupale mpakha ottikinya malitti a ekhatteya. Okathi yoowo, mikhora sothene saahitthukuwa nave ikwirinti saatthukaniw'aya atthu awo saahitaphuwa.

²⁷Kwarta ahihimuwaka vaarup'awe, vaawehaly'awe mikhora s'ekhatteya sitthukunwe-ene, aahimutholola xoow'awe wira aixiive okhala wira uupuwela wira atthu yaatthukweliwe yaahitthyawaasa.

²⁸Nto Paulo aahimukhuwelela iiraka: ?Muhisiirihe etthu yootakhala! Othene ahu nri muumu!?

²⁹Vano kwarta aahivekela muthuko khuvolowa atthyawaka, othukumelaka aahikokhora ohoolo wa Paulo ni Sila.

³⁰Numala, aahaarowana ota khwaakoha wira: ?Mapwiy'aka, kiire exeeni wira koopowe??

³¹Awo yaahimwaakhula wira: ?Mmwaamini Pwiya Yesu munimoopowa, nyuwo n'etthoko anyu.?

³²Nto awo yaahimulaleerya masu a Muluku kwarta owo vamosa n'atthu othene yaakhala vatthokoni vawe.

³³Ohiyu yoowo, kwarta owo aahaakumiha mukhatteya khurowa waaloola makhwatt'aya. Numala, owo n'amusi awe aahirowa opatisiwa.

³⁴Vano-nto aahimukuxa Paulo ni Sila aarowanaka owanny'awe, khwaavaha yoolya. Kwarta vamosa n'amusi awe yaahitteeliwa murima vanci-ene mwaha w'omwaamini Muluku.

³⁵Vaxaakaru makhulupale yahaaruma asurutaato yaahimeeryaka wira: Mwaataphule alopwan'ale.

³⁶Kwarta aahimuleela Paulo moolumo ala ahimyaka wira: Makhulupale ooruma wira mutaphuliwe, vano mukhumeke muroweke ni murettele.

³⁷Nto Paulo aahihimya wira: Aanimana ohoolo w'atthu othene ahipacenrye onlamula, hiyo nri-ene aRoma, aanirihela mukhatteya, nto vano antthuna ontaphula wiiphini? Vahikhale siiso, masi erweeke axineene yaawo enikumiherye ota.

³⁸Vano asurutaato awo yaahirowa wahimeerya moolumo ala makhulupale, awo yaari aRoma.

³⁹Nto vaarwiy'aya, yaahaavekela yaxonttelaka, yaahakumiherya ota, khwavekela wira ekhume mmuttettheni.

⁴⁰Nto vaakhumaly'aya mukhatteya, yahirowa owanny'awe Litia, nave vaawehaly'aya axinnya yaahalipiha, numala khuvenya erowaka.