Acts 15

¹Nto atthu akina yaakhumme oYuteya erowaka wAntiyokiya, yaahipacerya owiixuttiha atthu oowaamini yiiraka: ?Nyuwo mwahilyihiwe-ru masoma, ntoko sinirum'aya ikano sa Monse, khamunwerya woopowa.?

²Paulo ni Parnapa yaahavaanya, nto waahikhumelela ovaanyihana wuulupale n'awo. Vano yaahiiwanana wira Paulo ni Parnapa n'atthu akina erowe oYerusalemu yavaanele n'arummwa ni mahumu mwaha yoowo waavanyihaniwa.

³Nto siiso yaahiveleeliwa n'ekerexa ya w'Antiyokiya. Eviraka elapo y'oFenisia ni y'oSamariya, yaahiwaalikelela enamuna saamwaminny'aya Muluku ale yahaakhanle aYuta. Ehaal'ila yaahatteeliha murima axinna othene.

⁴Okathi vaaphiyaly'aya oYerusalemu, yaahakheleliwa n'Ekerexa n'arummwa, ni mahumu. Nto Paulo ni Parnapa yaahiwalikelela itthu suulupale Muluku saawiirenly'awe.

⁵Vano, atthu akina a etiini y'afarisi yaawo yaari oowaamini, yaaheemela khuhimya wira: ?Vannireerela walyiha masoma ale ahikhanle aYuta ari oowaamini ni waruma wiiwelela ikano sa Monse.?

⁶Nto arummwa ni mahumu yaahithukumana wira ephuke mwaha owo.

⁷Numala ovaanyihana wuulupale, Petru aaheemela khuhimya wira: Axinn'aka, nyuwo munnisuwela oratta-ene wira okhuma khalayi Muluku ookithanla eriyari anyu wira kaalaleerye Ehapari Yooreera ale ahikhanle aYuta, wira yaamini.

⁸Nto Muluku, onsuwela mirima s'atthu othene ohaavaha onamoona, aavahaka Erooho Yooreera siis'ale saanivahaly'awe hiyo.

⁹Muluku khanivirikanyihale hiyo n'awo, tthiri n'awo-tho ohareeriha mirima saya muhina wo waamini.

¹⁰Vano, xeeni nyuwo munimweherery'anyu Muluku mwareyaka awiixutti muritti yoowo axitiith'ihu, hata hiyo nihinwery'ahu okuxa.

¹¹Nto hiyo ninnaamini wira hiyo nooponwe mwa mahala a Apwiya Yesu, ntoko awo saaminni aya khoopowa.

¹²Othene yaahimaala, khuyamwiiwa Paulo ni Parnapa owaalikelelaka ithonyeryo ni miiriirya suulupale Muluku siiraly'awe mmatatani mwaya, ohoolo w'ale yahaakhanle aYuta.

¹³Nto vaamanly'aya olavula, Yakopo aahilavula iiraka: Axinn'aka mukiwiriyane.

¹⁴Simoni Petru oonalikelela enamuna Muluku sipacenry'awe waxekurya amalapo aathanla eriyari aya, nloko n'aitthaneliwa nsina nawe.

¹⁵Eyo ennaakhuleliha moolumo a maprofeta, ntoko silempw'aya wira:

¹⁶Numala itthu iya, kinootthika wira keemexe-tho empa ya Taviti, yeeyo emonre, kinimweemexa mme mpwexakaseiy'aya wira kiteke-tho,

¹⁷wira atthu akina yaaphaveleke Apwiya, n'amalapo othene, mwa yaawo nsina naka ninnikokhoreliwa. Anihimya siiso t'Apwiya, aniira itthu sothene,

¹⁸seiyo sisuwelihaly'aya okhuma khalayi.

¹⁹Tivo, miyo kinuupuwela wira nihiwukhule amalapo yaawo arukununxenrye mirima saya wa Muluku.

²⁰Nalepele epaphelo wira ehikhuureke enama eniheleliwa amuluku a ethiru, hata inama soohihitiwa nnakhala ephome aya, hata eheetteke enamuttompe.

²¹Okhala wira okhuma khalayi ikano sa Monse sinnilaleiwa khula muttetthe nave khula esaapatu sinnisommwa mpaani moothukumana.

²²Nto, arummwa ni mahumu voowiwanana n'ekerexa yothene y'oYerusalemu, yaahathanla atthu akina variyari vaya khwaaruma orowa vamosa ni Paulo ni Parnapa. Yaahithanliwa atthu ala: Yuta, iihaniwa-tho Parsapa ni Sila, yaari atthu oottittimihiwa eriyari y'axinna.

²³Yaahaavahererya epaphelo yaalempwale wira: Hiyo arummwa ni mahumu vamosa n'axinna ninnoveleeliheryani makhomaso nyuwo axinna muhikhanle aYuta, munkhala wAntiyokiya n'ilapo s'oSiria ni s'oSilisia.

²⁴Nihiiwa wira atthu akina akhumme variyari vahu awukhulani, ni aahuluxa mirima sanyu wa itthu sihimaly'aya. Nto hiyo khinaarumme wira elavule siiso.

²⁵Tivo vaathukumanny'ahu ni murima mmosa niiwanana wathanla atthu akina ni worumihelani. Awo anrowa n'axinn'ahu anaaphent'ahu Parnapa ni Paulo,

²⁶atthu alenve ekumi aya, mwaha woomphenta Pwiy'ahu Yesu Kristu.

²⁷Nave, nihaaruma orowa iwo, Yuta ni Sila, awo animoohimeeryani-tho itthu seiyo imosaru.

²⁸V'ekeekhayi Erooho Yooreera ni hiyo nihiiwanana ohookhanyererihani-tho etthu, sihikhanle itthu seiye sinreerela ntoko iya:

²⁹Muhikhuureke inama siheleliwe mukuttho amuluku a ethiru, nnakhala ephome aya, hata inama soohihitiwa, hata weetta onamuttompe. Mwaahiirekeru itthu iya munniira saana. Ekumi ekhale ni nyuwo!

³⁰Nto atthu awo yaahilaxerya enavenya erowaka wAntiyokiya. Yaahithukumana weiwo vamosa n'atthu oowaamini, khwaavahererya epaphelo.

³¹Vaamanly'aya osommwa, atthu othene yaahitteeliwa murima mwaha wa moolumo oowalipiha.

³²Yuta ni Sila, yawo-tho yaari maprofeta yaahatumererya axinna yaalipihaka ni moolumo manci-ene.

³³Numala oviriha mahiku vakhaani ni yaawo, yaahaalaxerya axinn'awo, nto yaahaaxonttela weetta ni murettele, ehokolowelaka w'arummwa.

³⁴Vano Sila aahitthuna ohala weiwo.

³⁵Paulo ni Parnapa yaahihala wAntiyokiya yixuttihaka ni elaleyaka n'atthu akina anci-ene moolumo a Apwiya.

³⁶Vaaviraly'aya mahiku vakhaani, Paulo aahimwirela Parnapa wira: ?Ntthikele naaxekurye axinna mmittettheni mothene mulaleiy'ahu Ehapari Yooreera y'Apwiya, wira nasuwele ihaali saya.?

³⁷Parnapa aaniphavela omukuxa-tho Yohani oniihaniwa Marku.

³⁸Nto Paulo aahuupuwela wira khivaareerela omukuxa yoowo aamwalanne ni yaawo elapo y'oPanfilia, khuhahoola yaawo mmutekoni.

³⁹Yaahivaanyihana valupale, mpakha omwalanasa, khula mmosa arowaka mpantt'awe. Parnapa aahimukuxa Yohani Marku khupakhira arowaka oKipero.

⁴⁰Paulo aahimuthanla Sila, vaamanly'aya oxontteliwa mahala a Apwiya, yaahivenya erowaka.

⁴¹Paulo aahivira oSiria n'oSilisia alipihaka ikerexa.