Acts 14

¹Vaaphiyaly'aya muttetthe wo wIkonio, Paulo ni Parnapa yaahikela mpaani moothukumana mw'aYuta, khulavula-mo moolumo ookuxa murima vano aYuta anci-ene n'akereku yaahaamini.

²Nto aYuta oohaamini yaahaakhanyereriha ale yahaakhanle aYuta wira yaavirikanye amalapo yaaminni.

³Paulo ni Parnapa yaahikhala mahiku manci-ene elavulaka n'ulipiherya myaha s'Apwiya, iyo saanooniherya onamoona w'arwa ni masu a mahal'awe aatthuniheryaka opaka sootikiniha ni miiriirya mmatatani mwaya.

⁴Atthu a mmuttettheni yaahikawanyeya. Akina yaatthara aYuta nave akina yaatthara arummwa.

⁵Tivo aYuta n'ale yahaakhanle aYuta, vamosaru ni makhulupale aya, yaahiiwanana wahaaxa ni wavonyakasa maluku arummwa.

⁶Okathi Paulo ni Parnapa vaasuwenly'aya etthu iyo, yaahitthyawela oListra ni oTerpe, mittetthe sa ilapo s'oLikawonia ni mittetthe s'owattamela.

⁷Nto weiwo yaanilaleya Ehapari Yooreera.

⁸Oliistra aahikhala mutthu mahiku othene aamukilaathi, okhala wira aari oorakala, okhuma oyariwa wene, nave khaatonko weetta.

⁹Owo aahimwiiwa Paulo alavulaka, nto Paul'uwo khumoona wira aahikhalana waamini wanweriha ovonihiwa,

¹⁰nto aahimwirela arunyaka wira: ?Nvenye mweemele oratta-ene!? Nto atuphaka aaheemela khupacerya weetta.

¹¹Voonaly'aya etthu ile Paulo yiiraly'awe atthu yaahikelela okhuwela n'elavulelo y'eLikawonika yiiraka: ?Amuluku ahiikhaliha ntoko atthu, khurwa onixekurya!?

¹²Yaanimwiihana Parnapa muluku Yupitere, nave Paulo yaamwihana Merkurio, okhala wira Paulo t'alavula.

¹³Empa ya muluku Yupitere yaari ohoolo wa muttetthe. Tivo, namukuttho a muluku owo aahiruuha ohoolo wa mukhora wa muttetthe imompe n'ikhara sa ithutu, owo aaphavela omukokhorela vamosa n'atthu amuhelelaka mukuttho w'omwiivela inama.

¹⁴Nto okathi arummwa awo Parnapa ni Paulo vaaiwaly'aya etthu ila, yaahikhera soowarya saya, nave yaahitthimakela eriyari y'atthu ekhuwelaka wira:

¹⁵Alopwana muniirela-ni itthu iya? Hiyo-tho n'atthu ntoko nyuwo! Ninnihaawa vamosaru. Nri va wira noolaleeryeni Ehapari Yooreera, wira nyuwo muhiye wiisoona muhokolowele wa Muluku mukumi yoowo opanttunxe erimu, n'elapo ya vathi, n'ephareya n'itthu sothene siri-mo.

¹⁶Mahiku avinre Muluku aahaahiya atthu othene yettelaka iphiro saya,

¹⁷Aarimwiiraru siiso khaaihiyerenrye ahooniherya onamoon'awe awiirelakani Sooreera wirimu weiwo, onnoorupihelani epula onnoovahani soolya sa mmatta n'ukathi aya, ni onnosarihelani soolya n'utteeliwa murima mmurimani mwanyu.

¹⁸Vaahimaly'aya siiso, khayaawenrye wakhoottiherya atthu wira ehaahelele mukuttho.

¹⁹Okathi yoowo yaahirwa aYuta akina yaakhuma wAntiyokiya ni wIkonio, awo yaahiwoototha atthu. Yaahinvonyakasa maluku Paulo empurulela ota wa muttetthe, yuupuwelaka wira ohookhwa.

²⁰Nto okathi aKristu vaamurukurenry'aya, owo aaheemela khuvolowa-tho mmuttettheni. Mmeloni mwaya, Paulo ni Parnapa yaahirowa oTerpe.

²¹Paulo ni Parnapa Yaahilaleya Ehapari Yooreera muttetthe w'oTerpe weiwo yaahaamini atthu anci-ene. Numala, yaahihokolowela oListra ni wIkonio ni wAntiyokiya.

²²Weiwo yaanalipiha murima arummwa nave yaanatumererya wira nlelo ekhaleleke nthiti waamini, tthiri hiyo nnoophwanya-ru ohaawa wunci-ene etthu emphavel'ahu okela moomweneni mwa Muluku.

²³Nave-tho yaahathanla mahumu a khula Ekerexa. Numala ovekela n'utthukwa yaahaavahererya mmatatani mw'Apwiya, yaawo yaawaaminny'aya.

²⁴Numala, yaahilapuwa elapo y'oPisitia khuphiya oPanfilia.

²⁵Yaahilaleya masu a Muluku muttetthe w'oPerxe numala yaahirowa mpakha w'Italia.

²⁶Weiwo, yaahipakhira erowaka wAntiyokiya w'oSiria, muttetthe yoowo waavekeleliw'aya evahereriwaka mahala a Muluku mwaha wa muteko yoowo vano yaamalihaly'aya.

²⁷Okathi vaaphiyaly'aya-wo, yaahaathukumanya atthu a mukerexa nto khuwaalikelela sothene Muluku saawiirenly'awe ni enamuna saatthukunly'awe mukhora wo waamini w'ale ahikhanle aYuta.

²⁸Nto yaahikhala weiwo n'axinna mahiku manci-ene.