Acts 13

¹Ekerexa ya wAntiyokiya yaahikhala maprofeta n'awiixuttihi. Yaari Parnapa, Simoni (yoowo iihaniwa Nixeri), Lusio (a oKireni), Manase yoowo aari muleekhi a mwene Heroti, ni Saulo.

²Nihiku nimosa, okathi wamurumel'aya Muluku n'utthukwa, Erooho Yooreera yahaahimeerya wira Mukithanlele Parnapa ni Saulo wira yavare muteko yoowo kaathanlenly'aka.

³Nto awo numala otthukwa n'uvekela, yaahiwiixatherya matata khwahiya erowaka.

⁴Saulo ni Parnapa erummwale-ene ni Erooho Yooreera, yaahirowa mpakha muttetthe w'oSeleusia nto okhuma weiwo yaahiwela ekalawa erowaka oXipere.

⁵Okathi vaaphiyaly'aya oSalamina yaahipacerya olaleya moolumo a Muluku mpaani mothukumana mw'aYuta. Yohani iihaniwa-tho Marku akhala ni yaawo anakhaliherya.

⁶Yaahilapuwa ekisirwa khuphiya oPafu weiwo yaahimphwanya muYuta mmosa namaxitta aaipaka oprofeta, iitthaniwa Paryesu.

⁷Owo aari ni kuvernatoro Serxio Paulo mutthu a miruku. Kuvernatoro aahiruma wihaniwa Parnapa ni Saulo, okhala wira aaphavela wiiwa moolumo a Muluku.

⁸Nto Elima (nsina nawe nintaphulela namaxitta) aanaavirikanya arummwa aphavelaka omuhiiha Kuvernatoro wira ahaamini.

⁹Nto Saulo yowo-tho iihaniwa Paulo, asareiye-ene Erooho Yooreera aahimweemexa,

¹⁰Khumuhimeerya wira: ?Mwaana a Satana, nwanani a sothene! Nyuwo moosareya olavilavi ni otakhala murima. Munihiya lini ohonona iphiro soowokololowa s'Apwiya?

¹¹Tthiri vano owerya w'Apwiya onimoohukhumuni. Munookhala muhoonaka ni khamunrowa woonaka nsuwa mpakha okathi mukina.? Naanaanoru, Elima yaahimukhumelela epiphi khumukhuneela maitho, nto khukelela orukunuwasa, omphavelaka mutthu oonvarela ntata wira amwettiheke.

¹²Okathi kuvernatoro voonaly'awe etthu iyo aahaamini, khutikinihiwa ni mixuttiho s'Apwiya.

¹³Paulo vamosa n'apatthani awe yaahikhuma oPafu enarowa mpakha oPerxe, muttetthe w'oPanfilia. Nto Yohani Marku aahaahiya khuhokolowela oYerusalemu.

¹⁴Awo evenyaka oPerxe yaahiphiya wAntiyokiya muttetthe w'oPisitiya. Esaapatu yaahikela mpaani moothukumana khukilaathi.

¹⁵Numala osommwa eliivuru ya ikano sa Monse n'iliivuru sa maprofeta, makhulupale a mpaani moothukumana yaahiruma oleeliwa Paulo wira: Axinn'aka, mwaarina moolumo oowalipiha atthu, lavulakani.

¹⁶Nto Paulo aaheemela, khwaaruma atthu nintata wira emaale, vano khwaahimeerya wira: Atthu a Isarayeli, n'atthu a ilapo sikina munimukupali Muluku! Nwiriyane.

¹⁷Muluku a Isarayeli ohaathanla axitiith'ihu a khalayi ni aahiwuncererya atthu awe, okathi waakhanly'aya aletto elapo ya wExitu oohaakumiha-wo n'uwerya wawe

¹⁸ni ohaavilela atthu awo moothakoni mpakha iyaakha miloko mixexe.

¹⁹Oopwetexa maloko mathanu ni manli mulaponi m'okanani khwaavaha elapo aya atthu awe wira ekhale yawaya

²⁰eriyari ya, iyaakha waattamela miloko miloko mixexe n'iyaakha miloko mithanu. Numala, aahaavaha makhulupale wira yaalamuleleke, mpakha okathi wa profeta Samuweli.

²¹Nto atthu awo yaahivekela wira evahiwe mwene. Nto Muluku aahaavaha Samuweli mwaana a Kixi, a nihimo na Peniyamini yoowo aawettihenre mpakha iyaakha miloko mixexe.

²²Numala, omukhootta Sawulo, Muluku aahimuthanla Taviti khumukhaliha mwene nave mwaha wa yoowo, owo aahihimya wira: ?Koomphwanya Taviti mwaana a Yese, yoowo kaamphavel'aka, owo onimwiira sothene sintthun'aka.?

²³Mwa osuulu awe yoowo, atthariheliwaka natiri, Muluku oomuruuha Yesu wira akhale Moopoli a Isarayeli.

²⁴Yesu ohinathi orwa, Yohani Mpatisa tupacenrye orwa walaleerya atthu othene a Isarayeli epatisimu yoorukunuxa murima.

²⁵Nto Yohani ahalaka vakhaani omaliha muteko awe, aahahimeerya atthu wira: Nyuwo munuupuwela wira miyo ki pani? Miyo nkiho Kristu, vano nto, ottuli waka, onimoorwa yoowo miyo hata nkiniphwanela omukhaliherya otaphula isantaalya sawe.

²⁶Axinn'aka aana a osuulu w'Aparahaamu, ni nyuwo muri vaava munimoova Muluku, nyuwo munnivahiwa masu ala oowoopola.

²⁷Atthu a oYerusalemu ni makhulupale aya khiyaamusuwela Yesu owo, nto emulamulaka yaamaliherya moolumo a maprofeta yaawo ansommwa isaapatu sothene.

²⁸Hata vaahaaphwanny'aya mulattu wophwanela omwiiva, yaahinvekela Pilato wira orume wiiviwa.

²⁹Nto numala omaliherya sothene seiyo sihimmwale mwa soolempwa simuhimyaka yoowo, yaahimukuruxa vamwiikimanyo khurowa onvitha munikhukuni.

³⁰Nto Muluku khumuhihimuxa mookhwaani,

³¹mahiku manci-ene owo aahaakhumelela ale yaamutthanre okhuma oKalileya mpakha oYerusalemu. Vano awo takhanle anamoon'awe ohoolo w'atthu.

³²Hiyo ninnolaleeryani Ehapari Yooreera. Vano etthu Muluku yaaroromelinh'awe axitiith'ihu,

³³oomaliherya, wa hiyo an'awe amuhihimuxaka Yesu mookhwaani, ntoko silempw'aya muliivuruni mwa Masalmu a neenli wira: ?Nyuwo mwa mwan'aka, miyo kooyanreni olelo.?

³⁴Oomuhihimuxa Yesu wira ahikhwe-tho, ti siiso Muluku saahimaly'awe muhina wa moolumo ala: Kinimoovahani sooreera ni mareeriho oororomeleya a Taviti.

³⁵Tivo, tho owo onihimy'awe mulivuruni mwa Masalmo wira: ?Nyuwo khamunrowa omuhiya ooreera murim'anyu onttaka mmahiye.?

³⁶Okhala wira: V'ekeekhayi, Taviti okathi awe aahimurumeela attharihelaka otthuna wa Muluku. Numala kukhwa, murutthu awe khurowa ovithiwa vakhiviru v'axitiithi awe erutthu awe ehintta.

³⁷Nto ole Muluku omuhihimuxaly'awe, erutthu awe khiyaanttale.

³⁸Axinn'aka, tthiri mukhale, oosuwela wira ti muhina wa nsina na Yesu munlaleeriw'anyu oleveleliwa itampi.

³⁹Mwa yoowo, othene ale animwaamini annikhalihiwa anaxaiya wa itthu sothene sahaakhalihiwe sa xariya mwaha wa ikano sa Monse.

⁴⁰Mwiipasoope wira ehookhumeleleni etthu elempwale ni maprofeta wira:

⁴¹Nwiriyane, nyuwo anamathanya itthu iya; mutikinihiwe ni mulakaseye okhala wira miyo kinniira itthu suulupalexa mahiku yaala, seiyo hata nyuwo sihinkupaly'anyu. Hata okhalaka mutthu oowoleelihani.

⁴²Okathi aYuta vaavenny'aya mpaani moothukumana, aKereku yaahaavekela wira ehokolowe-tho esaapatu ekina wira elavule-tho mwaha yoowo mmosaru.

⁴³Vaamanly'awe muthukumano, aYuta anci-ene n'ale yahaakhanle aYuta yettela etiini y'aYuta yaahimuhoola Paulo ni Parnapa, yaawo yaanaavaha moolumo oowalipiha murima yatumereryaka wira ekhaleleke nthiti mahala a Apwiya.

⁴⁴Esaapatu yoottharelana, vannaanyiheriwa wira atthu othene yaahirowa omuttettheni wiiwa masu a Apwiya.

⁴⁵Okathi aYuta vaawehaly'aya atthu anci-ene, yaahisareya nrima nto khupacerya ovirikanya moolumo a Paulo.

⁴⁶Nto Paulo ni Parnapa yaahahimeerya ni wiilipiha wothene yiiraka: ?Vaaniphwanelela, opacerya woolaleeryani nyuwo masu a Muluku. Nto okhala wira munnikhootta nave munuupuwela wira khenoophwanelani ekumi ehinimala, nto hiyo ninrowa w'ale ahikhanle aYuta.

⁴⁷Siiso Apwiya tanrummy'aya wira: Miyo Koohenleni ntoko muthuko w'amalapo, wira mulaleye woopowa mpakha wokiseryani w'elapo.?

⁴⁸Atthu yahaakhanle aYuta vaaiwaly'aya moolumo ala yaahitteeliwa murima vanci-ene ni yaahipacerya ottottopela mihupi s'Apwiya. Nave othene ale Muluku aathanlenly'awe ekumi ehinimala yaahaamini moolumo awe.

⁴⁹Siiso masu a Apwiya yaahimwareela elapo ele yothene.

⁵⁰Nto aYuta yaahilavula n'athiyana akina yaari ana-tiini ni oottittimihiwa, vamosa n'alopwana oottittimiheya a mmuttettheni khwaruma omulupattha Paulo ni Parnapa, awo yahiwoomola mulaponi mwaya.

⁵¹Nave arummw'awo yaahitatha ntthupi na munawuni mwaya khuvenya erowaka w'Ikonio.

⁵²Okathi yoowo awiixutti yaahitteliwa murima vanci-ene, asareye-ene Erooho Yooreera.