Acts 12

¹Okathi owo, mwene Heroti aahipacerya walupattha atthu akina a mukerexa ophavelaka wahaaxa.

²Aahimwiiviha ni xoowa Yakopo munn'awe Yohani.

³Nto vaawehaly'awe wira etthu iyo yaanasivela aYuta, nave-tho aahiruma otthukweliwa Petru. Eyo yaakhumelenle mahiku a mikatthe soohiheliwa miropo.

⁴Numala onvariha Petru, Heroti aahiruma otthukweliwa mukhatteya, alipeleliwaka ni makhuru maxexe a asurutaato, atthu axexe wa khula nikhuru. Heroti aaphavela omurowana ohoolo w'atthu n'uvira Paasikha.

⁵Petru atthukweliwe-ene mukhatteya, atthu oowaamini yaaninvekelela wa Muluku voohihiyererya.

⁶Ohiyu yoowo wa nihiku nenlo Heroti naarow'awe omurowana ohoolo w'atthu, Petru iira arupaka eriyari y'asurutaato anli. Atthukiwe-ene n'ikwirinti piili, ni yaahikhala makwarta yaalipelela mukhora w'ekhatteya.

⁷Naanaanoru, aahirwa munkelo a Apwiya, mukhatteya mothene mwaahikokola-mu. Munkelo waahimukwata Petru vanikhatani, onvenxaka, nto, waahimuhimeerya wira: ?Nvenye mwakuveke!? Okathi yoowo, ikwirinti saatthukwaniw'awe matata saahimora,

⁸nto munkelo waahimuhimeerya wira: ?Mwiitthukele musako ni nware isantaalya sanyu.? Nave owo aahiira siiso saahimeeriw'awe, nto nlelo munkelo waahimuhimeerya wira: ?Nware nlaya nanyu mmakhatani mukitthareke.?

⁹Nto akhumaka aanitthara munkelo. Nave khaasuwela wira yaari ekeekhayi ele yiiraneya, owo oona wira onooloha.

¹⁰Awo yaahaavikana makwarta a nikhuru nopacerya ni na neenli nave yaahiphiya vamukhora wa yuuma waaviriwa waaroiwaka omuttettheni. Mukhora owo waahitthukuwa mmans'awe, nave, awo yaahikhuma-mo. Yaahitthara ephiro, nto naanaanoru munkelo owo waahimuhiya vano Petru khuhala mekhaawe.

¹¹Nto Petru vaahanly'awe meekhawe aahihimya wira: Vano veekeekaayi koosuwela wira Apwiya amuruma munkelo aya, owo okoopola mmatatani mwa Heroti ni wa sothene aYuta saatthun'aya okiiriha.

¹²Nto uupuwelaka siiso etthu eyo, Petru aahirowa owanny'awe Maria mam'awe Yohani, nave yoowo iihaniwa-tho Marku. Weiwo yaahithukumana atthu anci-ene, enavekela.

¹³Petru aahimana mukhora wa vate vano murumeyi iihaniwa Rosa, aahirowa onwiriyana ti pani aamana.

¹⁴Owo aahisuwela nsu na Petru nto n'utteeliwa wawe murima wothene khaahunle mukhora, masi aahitthimaka orowa waleela atthu wira Petru aari vamukhora ota.

¹⁵Awo yaahimuhimeerya wira: ?Nyuwo mwa mulolo!? Nave owo aanihimya wira ekeekhayi ti yoowo. Nto awo yaahaakhula wira: ?Kahiyo yoowo; ti munkelo awe.?

¹⁶Okathi yoowo, Petru nlelo aanimana mukhora. Okathi vaahunly'aya yaahimoona Petru nto yaahitikinihiwa.

¹⁷Owo aahiwiirela ni ntata wira emaale, nto khuwaalikelela enamuna Apwiya saamukumihaly'aya mukhatteya. Numala aahahimeerya wira: Mmuleele Yakope n'axinna akina etthu ila. Vaahimaly'awe siiso aahivenya-vo arowaka okina.

¹⁸Vaxaakaru waahikhala onyakulihana wuulupale eriyari y'asurutaato, ehisuwelaka etthu yaamukhumenle Petru.

¹⁹Heroti aahiruma ophaveliwa nto khuhiphwanyiwa. Tivo, aahaakohakoha makwarta, khuruma wivakasiwa. Numala, Heroti aahivenya oYuteya khurowa okhala mahiku vakhaani muttetthe w'oKesareya.

²⁰Heroti aahinanariwa vanci-ene n'atthu a mittetthe s'oTiro ni oSitoni. Nto awo yaahiiwanana orowa okumana n'uwo. Awo yaahipatthana ni Plasto yoowo aari mukhulupale a namuteko a mwene. Numala yaahivekela murettele okhala wira elapo aya yaanaakhela soolya saakhuma mulaponi mwa mwene.

²¹Nto nihiku n'avarihaniwe owo aahiwara ikuwo s'omwene khukilaathi mpwaro khupacerya walavuliha.

²²Vano atthu yaahipacerya okhuwela yiiraka: ?Nsu na Muluku kanihiyo na mutthu!?

²³Naanaanoru munkelo mmosa a Apwiya waahinvulaliha Heroti, mwaha woohimuttittimiha Muluku. Heroti ahikhuriwa ni miyuku khukhwa.

²⁴Vano masu a Muluku yaanitepa omwareela ni wuncerereya mapuro othene.

²⁵Okathi Parnapa ni Saulo, vaamalihaly'aya muteko aya oYerusalemu, yaahihokolowela oYerusalemu emukunxe-ene Yohani, yoowo iihaniwa-tho Marku.