Acts 11

¹Arummwa n'axinna akina a oYuteya yaahiiwa wira nave-tho atthu yahaakhanle aYuta, yaahaakhela Masu a Muluku.

²Tivo, okathi Petru vaaphiyaly'awe oYerusalemu aahuulumeliwa n'ale y'ari oolyihiwa masoma.

³Awo yaanihimya wira: ?Mookela vatthokoni v'atthu oohilya masoma khulya ni yaawo!?

⁴Nto Petru aahiwaalikelela emosa-emosa iye saakhumelenle aahimeeryaka wira:

⁵Okathi kaary'aka omuttettheni w'oYoopi, kivekelaka, okathi yoowo kaahoona etthu ekhumelelaka. Mpuwa mwaya kaahoona etthu ntoko ekuwo yuulupale, yaakhuruwa wirimu evareleliwe-ene maveru oomaxexe khurwa mpakha vaary'aka.

⁶Kiwehexexaka muhina mwaya, kaahoona inama sa metto mixexe n'inama soowali, n'iye siniipurula, n'ipalame.

⁷Numala kaahiiwa nsu nakihimeerya wira: ?Petru, nvenye! Mwiiveke mukhuureke!?

⁸Nto miyo kaahaakhula wira: ?Hata mano vakhaani Pwiya. Mwaano mwaka khisinavire itthu soonanara ni sa mwiikho.?

⁹Nto nsu wirimu nahikihimeerya-tho wira: ?Muhiireleke sa mwiikho iye Muluku sireerihaly'awe.?

¹⁰Eyo yaahikhumelela imaara tthaaru, nto ekuwo eyo yahihokoloxeriwa wirimu.

¹¹Okathi yoowo, yaahiphiya vatthokoni vaavo miyo vaamakaly'aka atthu araru, yaarummwe ekhumaka oKesareya.

¹²Erooho ya Muluku yaahikihimeerya wira kaatthare, kihaanyiheryaka etthu. Nave-tho axinn'ala athanu na mosa yaahikihoola nto naahikela mpaani mwa Korneliyo,

¹³yoowo aanaalikelenle enamuna s'amoonaly'awe munkelo a Muluku ohoolo wawe emenle-ene owanny'awe omuhimeeryaka wira: Mwaarume atthu orowa oYoopi yamwiihane Simoni oniihaniwa-tho Petru.

¹⁴Owo onimoohimeeryani moolumo akhanly'anyu owoopowa, nyuwo n'etthoko anyu yothene.

¹⁵Okathi miyo waapacenry'aka olavula, Erooho Yooreera yahakhuruwela, siis'ale-tho saanikhuruwenly'aya hiyo wopaceryani.

¹⁶Nto kaahuupuwela ele Apwiya yaahimyaly'aya wira: Ekeekhayi wira Yohani aahipatisa ni maasi, nto nyuwo munoopatisiwa ni Erooho Yooreera.

¹⁸Okathi atthu vaaiwaly'aya moolumo ala, murima waahakhurunuwa ni yaahimuttottopela Muluku yiiraka: Ekhweeli wira Muluku ohaavaha-tho okathi worukunuxa murima ale ahikhanle aYuta wira ephwanye ekumi ehinimala!

¹⁹Okathi owo, atthu oowaamini yaahimwareya mwaha w'olupatthiwa weiwo waapacereiye okathi wo wiviwa Sitefano. Akina yaahirowa mpakha oFenisia, ni oXipre ni wAntiyokiya, nto khiyaamulaleerya mutthu ahikhanle aYuta paahi.

²⁰Akina yaari a oXipre ni a oKirene, yaahirowa mpakha muttetthe wo wAntiyokiya, nave-tho weiwo yaanaalaleerya Akereku Ehapari Yooreera ya Pwiya Yesu.

²¹Owerya w'Apwiya waari ni yaawo, nave atthu anci-ene yahaamini khurukunuxa mirima saya w'Apwiya.

²²Ihaali iya saahivuwa khuphiya mmaaruni mwa Ekerexa y'oYerusalemu, nto awo yaahimuruma Parnapa orowa wAntiyokiya.

²³Okathi owo vaaphiyaly'awe, aahoona mahala khwaatumererya othene aya wira ekhaleke mw'Apwiya ni murim'aya wothene.

²⁴Parnapa aari mutthu ooreera murima, oosareya Erooho Yooreera ni oowaamini. Siiso atthu anci-ene yahaataana n'Apwiya.

²⁵Numala Parnapa aahirowa muttetthe w'oTarsu amurowelaka Saulo, nto vaamphwanyaly'awe, aahimurowana w'Antiyokiya.

²⁶Nto eyaakha yothene yaahithukumana n'ekerexa y'eyo, ewixuttihaka atthu anci-ene Vano wAntiyokiya weiwo ti wapaceriw'aya awiixutti wiihaniwa AKristu.

²⁷Okathi owo, maprofeta makina yaahikhuma oYerusalemu erowaka wAntiokiya.

²⁸Mmosa a yaawo iihaniwa Hakapo, aaheemela eriyari y'aKristu khuhimya uupuxeriwaka ni Erooho Yooreera, wira yaarowa okhumelela etala yuulupale olumwenku wothene. Etala eyo yaahikhumelela okathi wa Klautiyo Kesari.

²⁹Nto aKristu a wAntiyokia yaahivarihana waveleeliherya mukhaliheryo axinna yaakhala oYuteya. Khula mmosa aanivaha ottharihelaka owerya wawe.

³⁰Tthiri yaahiira siiso, yaaveleeliheryaka soovaha iyo mahumu, mmatatani mwa Parnapa ni Saulo.