Acts 10

¹Muttetthe w'oKesareya aahikhala mutthu mmosa iihaniwa Korneliyo, yoowo aari mukhulupale a nikhuru n'asurutaato yaasuweliwa ni nsina na ?Italiyana.?

²Aari mutthu aamweettela Muluku ni oomoova Muluku n'etthoko awe yothene. Aanakhaliherya vanci-ene aYuta oothoiwa ni khaahiyererya onvekela Muluku.

³Nihiku nimosa wattamela iwoora tthaaru sa makaaripi, waahimukhumelela munkelo a Muluku nto omwaattamelaka aahimuhimeerya wira: ?Korneliyo!?

⁴Owo aahanle owehexexaka munkelo, asareiye-ene woova nto aahimukoha iiraka: ?Pwiya nyuwo mw'ani?? Vano munkelo waahiira: Mavekelo anyu ni wakhaliherya wanyu alipa oothoiwa woophiya wa Muluku, ti vo owo oowuupuwelani.

⁵Vano mwaarume atthu akina arowa oYoopi emurowele Simoni yoowo aniihaniwa-tho Petru.

⁶Owo omanke owanny'awe Simoni namattikittha isapala. Emp'awe eri oxerexere w'ephareya.

⁷Okathi munkelo vaamanly'awe omulavuliha Korneliyo aahiwiihana arumeyi awe anli, Surutaato mmosa oothunku owo aari mmosa a y'ale yaamurumeela.

⁸Aahataphulela sothene numala aahaaruma orowa oYoopi.

⁹Mmeeloni mwaya, awo arowaka ephiro aya ehalaka vakhaani ophiya omuttettheni, wattamela othana eriyari, Petru aahiwela vataratoni wira ovekele.

¹⁰Petru aahivoliwa etala khiyaphavela olya. Nto okathi weteteeliw'aya yolya, aahoona etthu emukhumelelaka.

¹¹Aahoona erimu etthukunwe-ene nave ekhuruwaka etthu iyo yaalikana n'ekuwu yuulupale etthukiwe-ene ni mavero maxexe.

¹²Muhina mwaya saahikhala, inama. Sothene sa metto mixexe n'iye siniipurula s'elapo ya vathi n'ipalame sa musulu.

¹³Vano Petru aahiiwa nsu, nimuhimeeryaka wira: ?Petru nvenye mwiiveke mukhuureke!?

¹⁴Petru aahaakhula iiraka: ?Ohiiraka-tho, Pwiya! Nkinakhuure itthu soonanara ni sa mwiikho.?

¹⁵Nsu nlo naahimuhimeerya tho wira: Muhiireleke sa mwiikho iye Muluku sireerihaly'awe.

¹⁶Eyo yaahikhumelela imaara tthaaru mpakha ekuwo eyo owelihiwa osulu.

¹⁷Petru aahihala aikohaka mwaha w'etthu ile yoonaly'awe yaarowa okhala exeeni, okathi yoowo yaahiphiya vamukhora vawe atthu yaarummwe ni Korneliyo, yaawo yaakohakoha empa ya Simoni.

¹⁸Yiitthanaka yaahikoha vakhala wira Somoni oniihaniwa-tho Petru aamanke etthoko yeyo.

¹⁹Petru iira uupuwelaka nlelo etthu ile yoonaly'awe, Erooho Yooreera yaahimuhimeerya wira: Aakhala atthu araru anoophavelani.

²⁰Nvenye, mukhuruwe, mwatthare muhaanyiheryaka etthu okhala wira ti miyo kaarumme.

²¹Nto Petru vaakhuruwenly'awe w'ari alopwana awo yaarummwe ni Korneliyo aahiira: ?Mutth'uwo onimphavel'anyu ti miyo. Murweenle-ni va??

²²Nto awo yaahakhula wira: ?Nirummwe ni Korneliyo mukhulupale a asurutaato, owo mutthu a xariya oneettela etiini y'aYuta ni onnittittimihiwa n'aYuta othene. Ohimeeriwe ni munkelo a Muluku wira oolattuleni orowa owanny'awe ni wira iiwe sirin'anyu omuhimeerya.?

²³Nto Petru aahakeliha mpaani, khuwaakhela owanny'awe, vaaxiiy'aya Petru aahivenya onarowa ni yaawo. Axinna akina yaakhala oYoopi nave-tho awo yaahimuhoola.

²⁴Mmurottoni mwaya yaahiphiya oKesareya. Korneliyo iira aawehereryaka vamosa n'amusi awe ni apatthani awe.

²⁵Okathi Petru vaaphiyaly'awe, Korneliyo aahirowa omwaakhelela akokhoraka ohoolo wawe aahuurama mpakha vathi amukokhorelaka.

²⁶Nto Petru aahinvenxa khumuhimeerya wira: Mweemele, okhala wira miyo-tho kamutthu ntoko nyuwo

²⁷Avaanelaka siiso, ni yoowo, Petru aahivolowa mpaani khwaaphwanya-mo atthu anci-ene ethukumanne-ene,

²⁸nto aahahimeerya wira: ?Nyuwo moosuwela wira aYuta annikhoottiheriwa othukumana n'amalapo hata ophiya vate vaya. Nto Muluku ookooniherya wira khaavo onwery'ahu omuhimya okhala oothanyeya wala a mwiikho.

²⁹Tivo, vinry'anyu n'ukiihana miyo kirwa kihaanyiheryaka etthu, tthiri. Vano kimphavela osuwela xeeni ekiihanenly'anyu.?

³⁰Korneliyo aahimwaakhula wira: Masuri miyo kiira kitthunkwe-ene mukhora w'emp'aka iwoora seiya kivekelaka owanny'aka, w'ari iwoora ttharu sa nxekuwa,

³¹aahikikhumelela mutthu aawanre ikuwo soowarya, khukihimeerya wira: Korneliyo, Muluku ohiiwa mavekelo anyu ni ohuupuwela wakhaliherya wanyu alipa-oothoiwa.

³²Murume oroiwa oYoopi, wiihaniwa Simoni oniihaniwa-tho Petru. Owo omanke owanny'awe Simoni, namattikittha isapala, onikhala oxerexere w'ephareya, owo arwa onimooleelani

³³Naanaanoru kaahaaruma atthu owiihanani, nto nyuwo muhiira saana murw'aka wenno. Vano othene ahu noothukumana va ohoolo wa Muluku, wira niiwe sothene sirummwaly'anyu ni Muluku wira munihimeerye.

³⁴Nto Petru aahihimya wira: ?Vano koosuwela oratta-ene wira tthiri Muluku khunaathanya atthu.

³⁵Tthiri owo onaaphenta atthu a khula enamuna, yale animuttittimiha ni aneettela exariya.

³⁶Nsu nenlo owo naarumihenlyawe atthu a Isarayeli, aalaleeryaka murettele muhina mwa Yesu Kristu, ori Pwiya a atthu othene.

³⁷Munnisuwela oratta-ene, nsu nlo, nikhumme oYuteya wothene, nipaceryaka oKalileya numala epatiximu yaalaleiwe ni Yohani.

³⁸Munnisuwela enamuna Muluku simuttikitthenly'awe Yesu muNasareti Erooho Yooreera n'uwerya. Owo oheetteetta ilapo sothene iiraka sooreera ni aavonihaka atthu othene yeettihiwa n'uwo.

³⁹Hiyo n'anamoona a itthu sothene siiraly'awe, kahiyo mmuttettheni-ru m'oYerusalemu paahi nave-tho mulaponi mw'aYuta. Nto awo khumwiiva amukhomelaka vamwiikimanyo.

⁴⁰Nto Muluku oomuhihimuxa mookhwaani mmurottoni mwaya ni khunvaha wira owo aisooniherye.

⁴¹Khaaisoonihenrye w'atthu othene, masi w'ale akhanle anamoon'awe okhuma khalayi yaathanliwe ni Muluku, hiyo n'aalyiiye n'uwurya vamosa ni yoowo, numala Muluku omuhihimuxa mookhwaani.

⁴²Owo ooniruma walaleerya atthu Ehapari Yooreera ni wakhalela onamoona wira Muluku oomukhaliha mphuki a atthu akumi n'ale akhwiiye.

⁴³Maprofeta othene annimukhalela onamoona ahimyaka wira atthu othene animwaamini anooleveleliwa itampi.?

⁴⁴Petru alavulaka nlelo, okathi yoowo Erooho Yooreera yaahakhuruwela atthu othene yaamwiiwa.

⁴⁵Ayuta oowaamini, yaarwiye ni Petru, yaahitikinihiwa vanci-ene voonalyaya wira hata atthu yahakhanle aYuta nave-tho Muluku aahaavaha Erooho Yooreera.

⁴⁶Okhala wira yaawiiwa elavulaka malavulelo ootikiniha ni ettottopelaka owerya wa Muluku.

⁴⁷Nto Petru aahaakhula wira: ?Ookhala oniwerya wakhoottiherya maasi wira apatisiwe atthu ala, y'ala-tho yaakhenle Erooho Yooreera ntoko hiyo??

⁴⁸Nto aahiruma wira epatisiwe ni nsina n'Apwiya. Numala yaahinvekela Petru wira akhale ni yaawo okathi vakhaani.