Acts 9

¹Okathi owo Saulo khaahiya wuupuwela walupattha n'uwiiva atthu oowaamini Apwiya. Tivo, aahirowa okumana ni mukhulupale a anamukuttho,

²khunvekela ipaphelo soowoniherya mpaani moothukumana ni wira weiwo aatthukwe ale yaatthara ephiro y'Apwiya. Akhale alopwana hata athiyana, aarowa waatthukwa aarowane oYerusalemu.

³Nto okathi waarow'awe mukwah'awe, ahalaka ophiya oTamasiku, naanaanoru Saulo aahirukureriwa ni mutthuko w'akhuma osulu.

⁴Aahimorela vathi nto aahiiwa nsu naahimya wira: ?Saulo, Saulo, munikilupatthela-ni??

⁵Nave owo aahikoha wira: Ti pani nyuwo, Pwiya? Nave Apwiya yaahaakhula wira: ?Miyo ka Yesu, yoowo nyuwo munimulupatth'anyu. Wa nyuwo etthu yolipa ohiiwelela ele enoovahani ikuru.?

⁶Vano owo athukumelaka n'ututhuwa aahihimya wira: Pwiya muntthuna wira kiire exeeni? Nave Apwiya yaahimwaakhula wira: ?Nvenye mukele omuttettheni, nto weiwo munoohimeeriwa etthu ekhanly'anyu yoowiira.?

⁷Atthu y'ari ni Saulo yaheemela etikinihiwe-ene, okhala wira yaahiiwa nsu nlo nave khuhimoona mutthu.

⁸Saulo aheemela, vano atthukulaka maittho awe, khaawerya woona etthu. Aahivareleliwa ntata arowaniwaka oTamasiku.

⁹Aahikhala mahiku mararu ahoonaka, nave mahiku awo khaalyiiye etthu hata khaawunrye maasi.

¹⁰OTamasiku weiwo aanikhala mwiixutti iihaniwa Ananiya, yoowo Apwiya yaahimukhumelela khumuhimeerya wira: ?Ananiya!? Owo aahaakhula iiraka: ?Miyo va, Apwiya.?

¹¹Nto Apwiya yaahimuhimeerya wira: Nvenye, murowe Ephiro Yoowokowa, owanny'awe Yuta, mwamphavele mutthu onikhuma oTarsu, oniihaniwa Saulo. Tthiri uwo okathi ula onoovekela.

¹²Vano ntoko oloha, owo aahimoona mutthu avolowaka oniitthaniwa Ananiya nave amwiixaatheryaka matata vamuru vawe wira atthikele woona.

¹³Ananiya aahaakhula iiraka: Pwiya, koowiiwa atthu anci-ene elavulaka sa mulopwana yoowo, ni sootakhala sinci-ene siniir'awe oYerusalemu, awiirelaka atthu anyu ooreera murima.

¹⁴Nave wenno owo ookhalana owerya ovahiw'awe ni makhulupale a anamukuttho wira aatthukweke atthu othene anvekela nsina nanyu.

¹⁵Nto Apwiya yaahimuhimeerya Ananiya wira: ?Murowe, okhala wira miyo koomuthanla mulopwana owo wira alaleye sa miyo ohoolo w'atthu ohaamini ni wa mamwene ni w'ana a Isarayeli.

¹⁶Miyo kinomooniherya ohaawa wothene ontthun'awe ophwanya mwaha wa miyo.?

¹⁷Vano Ananiya aahirowa, khukela mpaani mwa Yuta, khumwiixatherya matat'awe vamuru va Saulo khumuhimeerya wira: ?Munn'aka Saulo, Apwiya Yesu yookhumelenleni mphironi, takirumme orwa okumana ni nyuwo, wira mutthikele woona ni mukhale oosareya Erooho Yooreera.?

¹⁸Okathi yoowo, mmaithoni mwawe saahimora itthu ntoko maapaliwe, nave khutthikela woona. Vano aahivenya khurowa opatisiwa.

¹⁹Numala, olya, mmakhuvani mwaahimulipa. Saulo aahikhala mahiku vakhaani n'awiixutti yaakhala oTamasiku.

²⁰Nto naanaanoru aahipacerya olaleya mpaani moothukumana iiraka Yesu ti Mwaana a Muluku.

²¹Othene ale yaamwiiwa yaanitikinihiwa nto enahimya wira: Ola kahi yoole aalupattha atthu oYerusalemu yaale yaaromola nsina nlo? Owo kharweenle nno wira aatthukwe aarowane wa makhulupale a anamukuttho?

²²Nto Saulo aanilipiherya vanci-ene, nto aYuta yaakhala oTamasiku yaanimwaanyiherya yoonaka wira owo aari Kristu.

²³Vaaviraly'aya mahiku manci-ene aYuta yaahithukumana khwiiwanana wira emwiive.

²⁴Nave Saulo aahisuwela mwaha owo waatthokihaly'aya. Nto okhala wira aYuta yaanilipelela mikhora sa mittetthe, ohiyu hata othana, wira emwiive,

²⁵nto ohiyu awiixutti awe yaahimuhela muttankani enviriha vasulu va ixiri emukuruxerya ota wa muttetthe.

²⁶Okathi Saulo vaaphiyaly'awe oYerusalemu aahitthuna okela munlokoni mw'awiixutti, nto othene aya yaanimoova okhala wira khiyaakupali wira nave-tho owo aahimwaamini Yesu.

²⁷Tivo, Parnapa aahimukuxa khumurowana wa arummwa khuwaalikelela enamuna saawonaly'awe Apwiya, n'enamuna awo saalavunly'aya n'uwo. Nave ahaahimeerya-tho wira oTamasiku Saulo aahilavula nulipiherya nsina na Yesu.

²⁸Nto Saulo aaneetta n'awo oYerusalemu avolowaka ni akhumaka,

²⁹nave aanilavula n'ulipiherya nsina na Yesu. Aanivaanela n'uvanyihana n'ayuta yaalavula ekereku, nto awo yaaniphavela omwiiva.

³⁰Okathi axinna vaasuwenly'aya eyo, yaahimurowana Saulo oKesareya, nave khumwiirela orowa oTarsu.

³¹Nto Ikerexa sothene saanikhala ni murettele elapo yothene y'oYuteya, n'uKalileya n'oSamariya. Yaanitepa olipihiwa yeettelaka waattittimiha Apwiya, yaanincerereya ekhaliheriwaka ni Erooho Yooreera.

³²Nto okathi Petru waavir'awe mapuro othene w'atthu ooreera murima, nto aahirowa waweha ale yaakhala oLita.

³³Aahimpwanya weiwo mutthu iihaniwa Eneya, yoowo aavirinhe iyaakha thanu na tthaaru, awereiwaka aaroorakala.

³⁴Vano Petru aahimuhimeerya wira: Eneya Yesu Kristu onnoovahani ekumi. Nvenye muukulule olili anyu. Naanaanoru owo aahivenya.

³⁵Atthu othene a oLita ni a elapo y'oSaroni yaahimoona, nave khuwaamini Apwiya.

³⁶Muttetthe wa oYoopi aahikhala mwiixutti muthiyana nsinan'awe Tapita, nsina nla nnihimya: ?Torka.? Owo aahisareya miteko sooreera ni isimula saavah'awe.

³⁷Mahiku awo aahiwereiwa khukhwa. Numala orapihiwa murutthu awe waahipwehiwa ekwarutu ya musulu.

³⁸Nto okhala wira oLita wahaattamela oYepe, awiixutti vaaiwaly'aya wira Petru aari weiwo, yaahaaruma alopwana anli, orowa onvekela wira ahipise orowa okumana n'awo.

³⁹Nto Petru aahirowa n'awo. Okathi vaaphiyaly'awe, aahihooliwa ekwarutu yaapwehiwe murutthu. Anaamukhweli othene yaahimurukurerya Petru, yinlaka ni emoonihaka malaya ni ikuwo sikina seiyo Tapita s'attotthaly'awe akhalaka n'awo

⁴⁰Nto Petru aahaaruma atthu othene okhumela vate. Aahikokhora khuvekela, nto awehaka murutthu aahiira: ?Tapita, nvenye!? Owo aahitthukula maitho, anwehaka Petru aahikilaathi.

⁴¹Petru aahinvarela ntata khumukhaliherya weemela. Numala aahiwiitthana atthu ooreera murima n'athiyana anaamukhweli, nto khuwooniherya arye-ene mukumi.

⁴²Etthu ila yaahisuweliwa muttetthe w'oYoopi nave atthu anci-ene yaahiwaamini Apwiya.

⁴³Petru aahikhala weiwo mahiku manci-ene owany'awe mulipa oottikittha isapala iihaniwa Simoni.